1 Ŋakiro a ŋirwa 14 - Ebaibul

Kiboikin Daudi Yerusalem

¹ Kiyakiya Iram erwosit ŋolo a Tiro ŋituŋa neni a Daudi. Kitaya ikes ŋakito ŋuna a cedar ka ŋikeceak ŋabaoi ta ŋikadukok, aŋuna ka adukokin Daudi akai ŋina ka apukan.

² Toanyu nai Daudi apaki ŋin atemar adau Ekapolon akiwuakin iŋes aruwor erwosit a Isirael daadaŋ, ido etopoloo apukan keŋ aŋuna a Ŋisirael, a ŋituŋa a ŋulu ka Akuj.

³ Alo Yerusalem, abu Daudi toryamu ŋaberu ŋuna alalak, ido abu touru ŋidwe ŋulu alalak ŋulusapa ka ŋulupesur.

⁴ Ŋirorwa a ŋidwe a ŋulu abu Daudi touru alo Yerusalem ikes lu: Samua, Sobab, Nasan, Solomon,

⁵ Ibar, Elisua, Elepelet,

⁶ Noga, Nepeg, Yapia,

⁷ Elisama, Beliada ka Elipelet.

Tobwaŋae Ŋipilistin

⁸ Ani iirarete Ŋipilistin atemar aseun Daudi aruwor erwosit a Isirael daadaŋ, toŋaasi Ŋipilistin daadaŋ ajore alosit akiwarit Daudi. Nai kebu Daudi kiira ŋakiro ŋun, ido abu tolot kiŋa akisiryam ikes.

⁹ Apaki ŋin, keris Ŋipilistin kedolut kielakin akirem akadipaalat ŋina a Repaim.

¹⁰ Kiŋit Daudi Akuj ŋuna emaikina iŋes kitiya tema, “Alosi ba etipeiyo esiiryak Ŋipilistin? Ipedori iyoŋ ajalakin ikes neni kaŋ a?” Toboŋok Ekapolon Daudi tema, “Ape, kitipeiyo; anerae akajalakini ayoŋ iyoŋ ikes.”

¹¹ Aŋun, abu Daudi kitipeiyo Baal-Perasim, kitiji Ŋipilistin a nen tobwaŋ, ido tema, “Esipuma Ekapolon ŋimoe kaŋ alokiŋaren kaŋ lopite ŋolo ipumaror akalele.” Aŋun, enyaritae ekiro ka akibois a ŋin Baal-Perasim.

¹² Apotu Ŋipilistin kimyekis ŋitorubei a ŋakujo kec a nen, ido abu Daudi tolimok ŋituŋa kicunyasi ikes.

¹³ Toboŋut nabo Ŋipilistin akirem akadipaalat ŋin.

¹⁴ Ani nabo iŋisi Daudi Akuj ŋuna emaikina iŋes kitiya, toboŋok Akuj iŋes tema, “Nyemaikina iyoŋ kitipeiyo totumeiyar neni kec, ape tomana kaku kec nabusya, ido kitoitoun alokito a ŋulu enyaritae Balsam.

¹⁵ Ani iirari iyoŋ ŋakejen erwosi ikamete ŋikito a Balsam alokidiama, toten ejok; anerae apaki ŋin, adau Akuj akiŋarenikin iyoŋ akiar ŋajorei a Ŋipilistin.”

¹⁶ Abu Daudi kitiya ikwa alimokinitor Akuj iŋes, toara ŋituŋa a Daudi Ŋipilistin akisyakin alo Gibeon erot daadaŋ tari Geser.

¹⁷ Abu nai arwonu a Daudi todol nakwapin daadaŋ, ido abu Ekapolon inak akuryanu nakwapin daadaŋ aŋuna a Daudi.