1 Ŋakiro a ŋirwa 13 - Ebaibul

Yaunae Asaduku ŋina ka Acamunet Yerusalem

¹ Tolot Daudi akirworiun ka ŋikarikok a ŋikajiok a ŋulu arae ŋalipyo ka ŋulu arae ŋamiae.

² Tema iŋes neni a Ŋisirael a daadaŋ, “Ani kejokak ŋakiro nu aneni kus ka kerae acamit ŋina ke Ekapolon Akuj yok, eyakiyasi akirot neni alwanan ka lowaetin daadaŋ, neni a ŋikaitotoi yok a ŋulu eya nakwap a Isirael daadaŋ ka neni a ŋisacaradotin ka ŋilepi ŋulu erukito ka ŋituŋa ŋul alotaunio kec ka anadakarisinei kec; ikotere ikes potu emorikinos ka iwon.

³ Apena enyakutu Asaduku ŋina ka Akuj yok, ŋina aponi iwon tojamakinae alorwa a ŋulu araakar Saul erwosit.”

⁴ Tocamut ŋituŋa daadaŋ ŋakiro ŋun, anerae arae ŋuna eyookino aneni a daadaŋ.

⁵ Aŋun, abu Daudi tocunak Ŋisirael daadaŋ, akisyakin alo To a anaŋolol a ŋina enyaritae Sikor alo Ijipit tari Kide neni enyaritae Leboamas, aŋuna ka ayaun Asaduku ŋina ka Acamunet ka Akuj a ŋina arae Ekapolon alo Kirias-Yearim.

⁶ Torotokis Daudi ka Ŋisirael ŋul daadaŋ, toloto Baala (iŋes Kirias-Yearim) ŋina alo Yudaya, akiom a nen Asaduku ka Akuj a ŋina erae Ekapolon ŋolo eyai kidiama ŋisubuna ŋulu a ŋabebenuk, Asaduku ŋina anyaritae ke ekiro ke Ekapolon.

⁷ Todakut ikes Asaduku ka Akuj iwuakinitae nagaari ŋina kitete, kipudut alokai ka Abinadab. Arae Usa ka Aio ameto ŋibaren ŋulu erito agaari ŋin,

⁸ kidoŋaete Daudi ka Ŋisirael daadaŋ a agogoŋu kec a daadaŋ alokiŋaren Akuj, toeos eramete ŋagitae, ŋaduŋgui, ŋiburin ka ŋitworoi ta ŋarupepe.

⁹ Ani edolunete ikes nalos ŋina a Kidon, kiopeiyo Usa akan keŋ Nasaduku ŋina ka Acamunet akigaŋ iŋes nyimasar, anerae adikino ŋimoŋin imasarete.

¹⁰ Toŋo Ekapolon nooi aŋuna a Usa, toar Ekapolon Usa aŋuna abunio totapya Asaduku ŋina ka Acamunet. Totwanik iŋes nen kiŋaren Akuj.

¹¹ Toŋo Daudi aŋuna abunio Ekapolon tonyunyurikinor Usa toar, ido akitodol akoloŋit na, enyaritae akibois ŋin Peres Usa.

¹² Tokuryaniar Daudi akoloŋit ŋin aŋuna ke Ekapolon kiŋis bon tema, “Alipite apedorya ayoŋ ayaun Asaduku ŋina ka Acamunet neni kaŋ?”

¹³ Aŋun, abu Daudi nyeya Asaduku akiboi ka iŋes alotaun a Daudi. Akilo akiya nen, abu ya kai ke Egititait a ŋolo anyaritae Obededom.

¹⁴ Kiboi Asaduku ŋina ka Acamunet alotuŋa ka Obededom alo kai keŋ ŋilapyo ŋiuni. Kiterereŋ Ekapolon Obededom ka ŋituŋa a ekal keŋ ta ibore daadaŋ ŋini ayakar iŋes.