1 Ŋakiro a ŋirwa 12 - Ebaibul

Ŋirukitos a Daudi analoŋisat

¹ Apotu ŋikilyok ŋice toloto neni a Daudi apaki ŋina ayakar iŋes Sikilag, ŋina pa apedoritor akirimit aŋuna a Saul alokoku a Kis; arae ŋikilyok ŋul ŋulu kepotu sek ekiŋaren kiŋarakis Daudi alojie.

² Ayakatar ikes ŋikaleŋeleŋe, ido ayenete nooi akigum ŋikaleŋeleŋe, kori adoiyanar ŋamoru ka adoe isitiyaete teten, kori kedyeny. Arae ikes ŋiyeneta a Saul ŋulu anateker a Benjamin.

³ Ŋikilyok ŋul ikes lu: Aieser ŋolo arae ekarikon kec ka Yoas ŋidwe a Semaa a ŋolo alo Gibea ŋulusapa; Yesiel ka Pelet ŋidwe ka Asimapes; Bereka, Yeu ŋolo alo Anasos,

⁴ Isimaya ŋolo alo Gibeon ŋolo arae ekajion ŋolo etiron alokidiŋ ŋulutomoniuni; arae iŋes apolokinit ŋulutomoniuni; Yeremia, Yasiel, Yoanan, Yosabad ŋolo alo Gedera,

⁵ Elusai, Yerimos, Bealia, Semaria ka Sepatia ŋolo alo Arup;

⁶ Elikana, Isia, Asarel, Yoeser ka Yasobeam ŋolo alo Kora;

⁷ Yoela ka Sebadia ŋidwe a Yeroam a ŋolo alo Gedor.

⁸ Apotu Ŋigadi ŋice toloto neni a Daudi apaki ŋina ayakar naloŋisat neni eboiyo iŋes anaturukan. Arae ikes ŋikajiok ŋulu atitinyok, ŋulu etemokino ajiore, ido apedorito akitiŋ ŋaupala ka ŋakwaaras. Atakanete ikes aloreetin esibit ŋiŋatunyo, ido apiraka ekote ŋagetei ŋuna eya lokamukumukui.

⁹ Arae Eser iŋes apolokinit ikes, Obadia iŋes ŋolo a ŋiarei ka Eliab iŋes ŋolo a ŋiuni,

¹⁰ Misimana iŋes ŋolo a ŋiomwon, Yeremia iŋes ŋolo a ŋikan,

¹¹ Atai iŋes ŋolo a ŋikanikapei, Eliel iŋes ŋolo a ŋikanikaarei,

¹² Yoanan iŋes ŋolo a ŋikanikauni, Elisabad iŋes ŋolo a ŋikanikaomwon,

¹³ Yeremia iŋes ŋolo a ŋitomon, ido Macibanai iŋes ŋolo a ŋitomon ka epei.

¹⁴ Arae Ŋigadi ŋul ŋikarikok a ŋasigarya; ajore kec ŋina adit arae ŋituŋa amiat, ŋina apolon nooi arae ŋituŋa aliput.

¹⁵ Arae ikes apotu todokut ekekwalo aŋolol Yorodan elap ŋolo esyaunan, apaki ŋina elelebar epakitor alokipetotyo a daadaŋ. Apotu ikes kitijikis ŋituŋa daadaŋ ŋulu eboiyete anakadipaalae a ŋuna alo Kide ka To.

¹⁶ Apotu daŋ ŋituŋa a Benjamin ka ŋulu a Yuda ŋice potu neni a Daudi neni eboiyo anaturukan.

¹⁷ Tolot Daudi kisiryam ikes tema, “Ani kiponito iyes neni kaŋ ke ekisil, akiŋarakin ayoŋ, ekejauni ayoŋ iyes emorikinos ka ayoŋ. Nai ani kiponito iyes arikor ayoŋ neni a ŋimoe kaŋ, tomam aronis etiyat ayoŋ, elipi ayoŋ Akuj ŋina atapapaa yok kiŋolik ŋun, ido itotubok iyes.”

¹⁸ Abu nai etau ka Akuj bu neni ka Amasai a ŋolo arae ekarikon a ŋikilyok a ŋulutomoniuni, ido abu tema, “Okoe Daudi, ikirae isua ŋulu kon! Okoe lokoku a Yese, ikiriit isua ka iyoŋ! Kiryama ka ekisil, kiryama ka ekisil, ekisil toyai neni a ŋulu iriitotor iyoŋ, anerae ikiŋarakinit iyoŋ Akuj kon.” Aŋun, abu Daudi kijau ikes, ido abu kituruwo ikes ŋikarikok a ŋajorei keŋ.

¹⁹ Apotu ŋituŋa a Manase ŋice toriwo neni a Daudi apaki ŋina alosyoto Daudi ka Ŋipilistin akitijiore Saul. (Nai abu Daudi ka ŋikajiok keŋ nyiŋarakis Ŋipilistin, anerae ani kedaut Ŋipilistin a kimima ŋakiro a Daudi, apotu kiritasi Daudi ka ŋirukitos keŋ nariet. Temasi, “Ikicakari iwon akiyar yok kikiruko ka iŋes, ido toriwo iŋes ka Saul.”)

²⁰ Ani apaki ŋin elosi Daudi Sikilag, apotu ŋituŋa a Manase lu toriwo ka iŋes: Adina, Yosabad, Yediel, Mikael, Yosabad, Eliu ka Silesai, arae ikes ŋikarikok a ŋajorei a ŋuna aya ŋituŋa aliput alo Manase.

²¹ Apotu ikes kiŋarakis Daudi akitijiore ŋajorei, anerae arae ikes daadaŋ ŋikajiok ŋulu atitiny ka arae ikes ŋikarikok a ŋasigarya a Daudi.

²² Aŋinakoloŋit, aponeneete ŋituŋa neni a Daudi akirii ka akiŋarakin iŋes, akitodol ŋina abunio Daudi toryamunia ŋasigarya ŋuna alalak ka ŋuna etirok.

Ŋasigarya a Daudi alo Eburon

²³ Erae lo ekimar a ŋasigarya a ŋuna ayakatar ŋiboro ŋulujiet, a ŋuna apotu toloto neni a Daudi alo Eburon, aŋuna ka akikamar apukan a Saul inakinae Daudi, lopite ŋolo kelimunitor Ekapolon.

²⁴ Ŋikilyok ŋulu aponito alokabila a Yuda, ŋulu ayakatar ŋaupala ka ŋakwaaras itemokino aŋuna ke ejie, arae ŋalipyo ŋakanikapei ka ŋamiae a ŋakanikauni.

²⁵ Ŋikilyok ŋulu aponito alokabila a Simeon, ŋulu ajiok ŋulu etemokino aŋuna ke ejie, arae ŋalipyo ŋakanikaarei ka amiat;

²⁶ ŋikilyok ŋulu aponito alokabila a Lepi, arae ŋalipyo ŋaomwon ka ŋamiae ŋakanikapei.

²⁷ Arukito ekarikon a ekal ka Aron ŋolo anyaritae Yeoiada ka ŋikilyok ŋalipyo ŋauni ka ŋamiae ŋakanikaarei,

²⁸ arukito esorokit ŋolo anyaritae Sadok, ekajion ŋolo atitinyon ka ŋikapolok ŋatomoniarei ka ŋiarei ŋulu anateker keŋ.

²⁹ Ŋikilyok ŋulu aponito alokabila a Benjamin, ŋiyeneta a Saul, arae ŋalipyo ŋauni, alalak sek ekiŋaren ikes ŋulu ariito ka ŋituŋa a ekal a Saul akitodol apaki ŋin;

³⁰ ŋikilyok ŋulu aponito alokabila ka Epuraim, ŋikajiok ŋulu atitinyok, ŋulu arwok anatekerin kec, arae ŋalipyo ŋatomoniarei ka ŋamiae ŋakanikauni;

³¹ ŋikilyok ŋulu aponito anatutubet a apei a ekabila a Manase ŋulu keponi tonyaraunae alosit akituruwor Daudi erwosit, arae ŋalipyo ŋatomon ka ŋakanikauni

³² ŋikilyok ŋulu keponito alokabila a Isakar, ŋulu kepedorito ayenun ŋakiro iteete ŋikacer ŋuna itiyakinosi ka ŋuna emaikina Ŋisirael kitiyata, arae ŋikarikok ŋamiae ŋaarei, arukito ikes kaapei ka ŋiyeneta kec ŋulu arae ikes apolokinito.

³³ Ŋikilyok ŋulu aponito alokabila a Sebulon, ŋulu ayenete nooi ejie, ŋulu etemokino ajiore a ŋiboro a ŋulujiet a daadaŋ, ido ariito ikes daadaŋ akiŋarakin Daudi bon, arae ŋalipyo ŋatomonikan.

³⁴ Ŋikilyok ŋulu aponito alokabila a Naputali arae ŋikarikok aliput ka ŋuluce ŋalipyo ŋatomoniuni ka ŋakanikaarei ŋulu ayakatar ŋaupala ka ŋakwaaras.

³⁵ Ŋikilyok ŋulu aponito alokabila a Dan, ŋulu etemokino aŋuna ke ejie, arae ŋalipyo ŋatomoniare ka ŋakanikauni ka ŋamiae ŋakanikapei.

³⁶ Ŋikilyok ŋulu aponito alokabila ka Aser, ŋulu ayenete nooi ejie, ŋulu etemokino aŋuna ke ejie, arae ŋalipyo ŋatomoniomwon.

³⁷ Ŋikilyok ŋulu aponito alo Kide Yorodan, ŋulu alokabila a Ruben ka Gad ta ŋulu ka atutubet a apei a ekabila a Manase ŋulu ayakatar ŋiboro daadaŋ ŋulujiet, arae ŋalipyo amiat ka ŋatomoniarei.

³⁸ Apotu ŋikajiok ŋul daadaŋ ŋulu etemokino aŋuna ke ejie, toloto Eburon, acamito ikes jik akituruwor Daudi erwosit anakwap a Isirael a daadaŋ. Emorikina Ŋisirael daadaŋ anacamit a ŋin.

³⁹ Apotu ŋikajiok ŋul kiboiyoto ka Daudi alo Eburon ŋirwa ŋiuni, imujete ka emasete akimuj ŋina ainunito ŋituŋa ka akwap kec ikes.

⁴⁰ Ayaunito daŋ neni kec akimuj ŋikidunyetkec ŋulu alo Isakar, Sebulon ka Naputali. Aayeneneo akimuj ŋin neni kec a ŋisigirya, a ŋikaala, a ŋaŋolei-sigirya ka a ŋimoŋin. Alalak ŋamuja ŋun nooi, ido arae ikes nu: Ŋakirya, ŋimugati ŋulu ipounitoe a ŋaboboryo, ŋaboboryo ŋuna erukitoe esibit ŋamugati, epiini, akimyet, ŋimoŋin ka ŋamesekin. Etoodiunito ŋul daadaŋ alelyanu ŋina ayai Isirael daadaŋ.