1 Ŋakiro a ŋirwa 11 - Ebaibul

Toseunae Daudi aruwor erwosit alo Isirael daadaŋ

¹ Ekaku a ŋun, tocunun ŋatekerin a Isirael daadaŋ Eburon neni a Daudi temasi, “Kiira, ikirae isua akuwan kon ka ŋaokot kon.

² Ani paaran eriŋa Saul ikipukat isua, iyoŋ ibu torik ŋajorei a Isirael, ido mam ituŋanan ibu iyoŋ tocaka. Abu Ekapolon Akuj kon tema neni kon, ‘Iyoŋ iruwor ekeyokon a ŋituŋa kaŋ a Ŋisirael, iyoŋ iruwor ekepukan kec.’ ”

³ Aŋun, tocunun ŋikasikou alo Isirael daadaŋ Eburon neni a Daudi, ido tocamunos erwosit Daudi ka ikes alo Eburon alokiŋaren Ekapolon. Toseut nai ikes Daudi kituruwosi erwosit a Isirael daadaŋ lopite ŋolo alimunitor Ekapolon aneni a Samuel.

Kikama Daudi Yerusalem

⁴ Toŋaasi Daudi ka Ŋisirael daadaŋ ajore akirem Yerusalem, iŋes atemar Yebus, neni eboiyoto ŋituŋa ŋulu anyaritae Ŋiyebusi, ŋulu arae ŋulu ka akwap a ŋin.

⁵ Temasi ŋituŋa a Yebus neni a Daudi, “Nyipedorete iyes alomun ne.” Tari daŋ kelimunito ikes ikoŋina, abu Daudi torem Sion etaun kec eryenyaana nooi kikama. Enyaritae tokona etaun ŋol ebe, “Etaun a Daudi.”

⁶ Aris Daudi kelimu akoloŋit ŋin ebe, “Ituŋanan daadaŋ ŋini isyauni akitijikin Ŋiyebusi, eruwor ekarikon ŋolo a ŋikajiok.” Abu nai Yoab lokoku a Seruia kiŋarenik ŋikajiok, aŋun, abu iŋes toruwor ekarikon.

⁷ Kiboikin Daudi naduketait ŋinajiet ŋina ayai lotaun ŋol. Aŋun, aponi tonyarae etaun ŋol ebe, “Etaun a Daudi.”

⁸ Abu Daudi todukok arwatata a etaun a ŋol kisiryam, akisyakin anakititis a ŋina ayai Kide etaun kiryam cib; tosubanak nai Yoab etaun neni ce daadaŋ.

⁹ Kiyata a ŋinakoloŋit akipuro ŋituŋa Daudi, anerae arukito Ekapolon Akuj ŋina a ŋajoresyo ka Daudi.

Ŋikajiok a Daudi ŋulu arwok

¹⁰ Arae ŋulu imarunitae a ne ŋikarikok ka ajore a Daudi ŋulu arwok, apotu ikes kaapei ka Ŋisirael daadaŋ kitogogoŋo apukan, kiyatakis neni epukat Daudi kiryam akwap ŋin daadaŋ, lopite ŋolo eikinitor Ekapolon Ŋisirael.

¹¹ Ŋirorwa a ŋikajiok a ŋulu ayakar Daudi ikes lu: Yasobeam ŋolo abunit alo Acimon. Arae iŋes apolokinit ŋikapolok ŋuluuni; abu iŋes akoloŋit apei kitijik ŋikilyok ŋamiae ŋauni toar daadaŋ.

¹² Ŋolo ewuapit iŋes arae Eleasar lokoku a Dodo a ŋolo anateker ka Aoi, arae iŋes epei alokidiŋ ŋuluuni ŋulu arwok ŋul.

¹³ Ariito iŋes ka Daudi apaki ŋina etijioto ikes Ŋipilistin alo Pas-Damim. Ayai Eleasar lomanikor ŋolo a ŋikinyom a ŋulu ikwaan ke erau apaki ŋina abwaŋatar Ŋisirael,

¹⁴ nai abu Eleasar ka ŋirukitos keŋ ta Daudi toryediko alokidiŋ emanikor ŋol. Kiuryasi Ŋipilistin nyedolut nen, ido apotu toara Ŋipilistin, inak Ekapolon ikes akiloun ŋina apolon nooi.

¹⁵ Potu ŋikapolok a Ŋisirael ŋiuni alotooma ŋulutomoniuni neni a Daudi a ŋolo ayai apaki ŋin naturukan ŋina ayai nataaba ŋina enyaritae Adulam, ayai ajore a Ŋipilistin apaki ŋin nakadipaalat ŋina a Repaim.

¹⁶ Apaki ŋin, ayai Daudi naturukan a emoru pa iryaŋiryaŋa, ido ayai ajore a Ŋipilistin Betelem.

¹⁷ Tonyam akure Daudi a nen, ido tema, “Okoe, kerae ca okookok ituŋanan idio ŋakipi anakare a ŋina idunyit epuke a Betelem omat!”

¹⁸ Apotu nai ŋikilyok ŋulu arwok ŋuluuni ŋul toemaros neni a Ŋipilistin, totubo alokidiŋ, tookut ŋakipi anakare a ŋina edunyit epuke a Betelem, kiwokosi neni a Daudi. Nai abu Daudi nyemat ŋakipi ŋun; abu tobukok kiŋaren Ekapolon erae ainakinet.

¹⁹ Tema Daudi, “Nyikiryama ka akimat ŋakipi nu!” Tema nabo, “Emaikina mono ayoŋ omat ŋaokot a ŋikilyok a lu a ŋulu apotu tojala akiyar kec a? Apotu kire ikes todaŋa abukor ŋaokot kec anakiwom ŋakipi!” Aŋun, abu Daudi nyemat ŋakipi ŋun. Ŋakiro ŋun ikes apotu ŋikarwok ŋul ŋiuni kitiyata.

²⁰ Arae Abisai lokaato keŋ a Yoab, ido arae Abisai ekarikon a ŋikapolok a ŋulutomoniuni. Abu Abisai kitiji ŋimoe ŋamiae ŋauni toar ka akwara keŋ, torwoniar iŋes, kikwaanikin arwonu keŋ ka ŋina a ŋuluuni.

²¹ Abu Abisai torwoniar aneni a ŋulutomoniuni; ido abu toruwor ekarikon kec; nai pa etopolooritae iŋes ikwa ŋuluuni.

²² Arae Benaia lokoku a Yeoiada ekajion ŋolo adedeŋan ŋolo abunit alo Kabiseel. Etiyae iŋes ŋakiro ŋuna ka aumokin. Abu iŋes toar ŋidwe ka Ariel ŋulusapa ŋiarei ŋulu arae ŋarwonita a Moab. Abu daŋ iŋes akoloŋit apei ŋina alalaata ŋakako, toloma nadui, toar eŋatuny.

²³ Abu Benaia toar Ejipitanoit ŋoloti arae aoyau keŋ ŋimitae ŋiarei. Atiŋit Ejipitanoit ŋol akwara, nai abu Benaia nyeker iŋes, abu totunar neni keŋ etiŋit abiro, tosodi tomojiriu akwara anakan a Ejipitanoit, toar Ejipitanoit a akwara keŋ pei.

²⁴ Ekote nen ŋakiro ŋuna abu Benaia lokoku a Yeoiada kitiya, ido torwoniar iŋes kikwaanikin arwonu keŋ ka ŋina a ŋikajiok a ŋulu arwok a ŋuluuni.

²⁵ Abu Benaia torwoniar akilo ŋuluuni; nai pa etopolooritae iŋes ikwa ŋuluuni. Abu Daudi kituruwo iŋes ekapolokiniton ŋasigarya ŋuna eteete Daudi.

²⁶ Ŋirorwa a ŋikajiok ikes lu: Asael lokaato a Yoab, Elanan lokoku a Dodo a ŋolo alo Betelem,

²⁷ Samimos ŋolo alo Arod, Eles ŋolo alo Peloni,

²⁸ Ira lokoku a Ikes a ŋolo alo Tekoa, Abieser ŋolo alo Anasos,

²⁹ Sibecai ŋolo alo Usasi, Ilai ŋolo alo Aoi,

³⁰ Maarai ŋolo alo Netopa, Eled lokoku a Baana a ŋolo alo Netopa,

³¹ Isai lokoku a Ribai a ŋolo alo Gibea a ŋina alo Benjamin, Benaia ŋolo alo Pirason,

³² Urai ŋolo anakadipaalae a ŋuna a Gaas, Abiel ŋolo alo Araba,

³³ Asimapes ŋolo alo Baurum, Eliaba ŋolo alo Saalibon,

³⁴ ŋidwe ka Asem a ŋolo alo Gisoni ŋulusapa, Yonasan lokoku a Sagee a ŋolo alo Ara,

³⁵ Aiam lokoku a Sakar a ŋolo alo Ara, Elipal lokoku a Ur,

³⁶ Eper ŋolo alo Mekeras, Aija ŋolo alo Pelon,

³⁷ Esiro ŋolo alo Karimel, Naarai lokoku ka Esibai,

³⁸ Yoel lokaato a Nasan, Mibar lokoku ka Agiri,

³⁹ Selek ŋolo alo Amon, Naarai ŋolo alo Beeros ŋolo aryoŋit ŋiboro a Yoab alokoku a Seruia ŋulu ke ejie,

⁴⁰ Ira ŋolo alo Isir, Gareb ŋolo alo Isir,

⁴¹ Uria ŋolo alo Itit, Sabad lokoku ka Alai,

⁴² Adina lokoku a Sisa a ŋolo alokabila a Ruben ŋolo arae ekarikon a Ŋirubeni, kaapei ka ŋulutomoniuni ŋulu arukito ka iŋes,

⁴³ Anan lokoku a Maaka, Yosapat ŋolo alo Misini,

⁴⁴ Usia ŋolo alo Asiterasi, Sama ka Yeiel ŋidwe ka Osam ŋulusapa, arae Osam ŋolo alo Aroer.

⁴⁵ Yediael lokoku a Simiri ka lokaato keŋ Yoa ŋolo alo Tisi

⁴⁶ Eliel ŋolo alo Maapi, Yeribai ka Yosapia ŋidwe ka Elinaam ŋulusapa, Isima ŋolo alo Moab,

⁴⁷ Eliel, Obed ka Yaasiel ŋolo alo Mesobai.