1 Ŋakiro a ŋirwa 10 - Ebaibul

Atwanare a Saul ka ŋidwe keŋ ŋulusapa

¹ Apotu Ŋipilistin ŋulu aŋaarito ajore kitijikis Ŋisirael; tobwaŋas Ŋisirael, toarakis Ŋipilistin ikes ŋulu alalak lomukura ŋolo a Gilboa.

² Toditasi Ŋipilistin Saul ka ŋidwe keŋ ŋulusapa. Toara ikes ŋidwe a Saul ŋulusapa lu: Yonasan ka Abinadab ta Maliki-Sua.

³ Topotyor ejie nooi aneni ayai Saul; toditasi iŋes ŋulu atiŋito ŋikaleŋeleŋe, apotu towana iŋes nooi a ŋikaleŋeleŋe.

⁴ Tema nai Saul neni a ekile a ŋolo aryoŋit ŋiboro keŋ ŋulu ke ejie, “Tolemu ekileŋ kon ikicumya ayoŋ, ikotere nyepotu ŋituŋa ŋul ŋulu nyileŋeritae akicum ayoŋ, ido okokyenatar.” Nai abu ŋolo aryoŋit ŋiboro a Saul ŋulu ke ejie nyecamu akicum Saul, anerae eilit iŋes. Aŋun, abu Saul tolemu ekileŋ keŋ a elope, toramakin lokileŋ, kicumakin bon.

⁵ Ani iŋolikini ŋolo aryoŋit ŋiboro a Saul ŋulu ke ejie atemar eridak Saul, toramakin iŋes daŋ lokileŋ keŋ a elope kicumakin bon totwaka ikes kaapei.

⁶ Aŋun, apotu Saul ka ŋidwe keŋ ŋulusapa ŋiuni ka ŋolo aryoŋit ŋiboro keŋ ŋulu ke ejie ta ŋikajiok ŋulu arukito ka iŋes daadaŋ totwaka akoloŋit apei.

⁷ Ani iŋolikinete Ŋisirael ŋulu ayakasi nakadipaalat atemar abwaŋasi ŋikajiok ka aari Saul ka ŋidwe keŋ ŋulusapa, apotu kimyekis ŋitaunio kec, toema nariet. Apotu nai Ŋipilistin potu toloma lotaunio ŋul.

⁸ Ani akoloŋit ŋina atupakini ŋin, toloto Ŋipilistin akilac ŋituŋa ŋulu aris ikes keara ŋul. Toryamut akuwan a Saul ka ŋuna a ŋidwe keŋ a ŋulusapa a ŋuluuni eperete alomukura a ŋolo a Gilboa.

⁹ Tolaca ikes Saul, totubosi akou, ido yaasi kaapei ka aupal keŋ, kiyakiyasi ŋituŋa nakwap a Ŋipilistin daadaŋ alimor ŋakiro ŋuna ajokak ŋuna ka akiloun a ŋin; ikotere elimoryo ŋakiro ŋun anakais a ŋakujo kec ka lotuŋa kec daadaŋ.

¹⁰ Kiwuakis Ŋipilistin aupal a Saul kai a ŋakujo kec, ido toenikis akou keŋ kai ka akuj a ŋina anyaritae Dagon.

¹¹ Ani iirarete ŋituŋa ŋulu a Yabes-Gilead ŋakiro daadaŋ ŋuna kitiyata Ŋipilistin neni a Saul,

¹² tonyout ŋikilyok a Yabes-Gilead daadaŋ ŋulu adedeŋak, tolemut akuwan a Saul ka ŋuna a ŋidwe keŋ a ŋulusapa, yaut Yabes. Tonukakis kwap ekitoe ŋolo ayai Yabes ŋolo apolon nooi ŋolo esibit ekwaakwaa, ido kiredakis akiron ŋirwa ŋikanikaarei.

¹³ Abu Saul totwana, anerae pa ekinyomit iŋes Akuj; pa ewuapit iŋes ŋakiro ŋuna ke Ekapolon, abu daŋ tolot neni a ŋimurok aanyun ŋuna kitiyakina.

¹⁴ abu nyiŋit Ekapolon ŋuna kitiyakina. Aŋun, abu Ekapolon kimyek iŋes totwan, ido abu Ekapolon inak Daudi lokoku a Yese toruwor ekepukan.