San Juan 21 - El Nuevo Testamento

Jesús ki̱xne̱xtiliá siete idisci̱polojmej

¹ Kua̱ꞌ tamiꞌ iní̱n, Jesús ki̱xne̱xtilij sej idisci̱polojmej ipan lagu̱najte̱n. Inó̱n laguna ito̱ka̱ꞌ Tiberias. Ijkí̱n kichij:

² Seka̱n onoyaj Simón Pedro, Tomás yej kijlia̱yaj Kua̱tej, Natanael yej de Caná del estado de Galilea, ipilowa̱n Zebedeo iwá̱n sewoꞌ má̱j o̱me̱n disci̱polojmej.

³ Simón Pedro kijtoj: —Nia nimichma̱ti. Yejamej kijtojkej: —Nejamej no̱ niawij mowa̱n. Tejkajkej ipan se̱ á̱ka̱l, iwá̱n yajkij; eꞌ inó̱n yówal ayá̱ꞌ kiki̱tzkijkej nisé̱.

⁴ Kua̱ꞌ tane̱stiwi̱tzeyay, Jesús ne̱siko ipan a̱te̱n, eꞌ idisci̱polojmej ayá̱ꞌ kimatiáj siga yéj.

⁵ Iwá̱n Jesús kijtoj: —Nokni̱wa̱n, ¿ix acha̱ ankiki̱tzkijkej michin? Yejame̱n kijtojkej: —Ni se̱.

⁶ Iwá̱n Jesús kijtoj: —Xikmo̱taka̱n amorre̱dej ila̱doj moye̱ꞌka̱mpa amoá̱ka̱l iwá̱n ankiki̱tzki̱skej. Ijkó̱n kichijkej, iwá̱n ayꞌya wel kiki̱xtia̱yaj re̱dej iga komati michin kipiaya.

⁷ Iwá̱n inó̱n discípulo yej Jesús kipoxnekiá, kijlij Pedro: —¡Ino̱nwaꞌ toTe̱ko! Kua̱ꞌ kikáꞌ Simón Pedro iga toTe̱ko, motaajakij, iga ayá̱ꞌ kakijtoya itzótzol, iwá̱n momo̱taꞌ a̱tampa.

⁸ Sekin disci̱polojmej asikej ipan playa iwá̱n á̱ka̱l, kitila̱ntiajkij re̱dej yej kipiaya komati michimej, puej onoyaj ken cien metros iga a̱te̱n.

⁹ Kua̱ꞌ temójkeja ipan á̱ka̱l kasitoj Jesús kipiá pa̱n iwá̱n nemi kixka se̱ michin pan tékol.

¹⁰ Jesús kijtoj: —Xikuajligaka̱n achi michin yej ankiki̱tzkíjkejoꞌ.

¹¹ Simón Pedro tejkaj ipan á̱ka̱l iwá̱n kiwawatatzoj este ipan playa inó̱n re̱dej yej kiwajligaya ciento cincuenta y tres wejweyi michin; malej iga komati, eꞌ re̱dej ayá̱ꞌ tzaya̱niꞌ

¹² Iwá̱n Jesús kijtoj: —Xitakuá̱kija. Iwá̱n nisé̱ de idisci̱polojmej ami̱xe̱wia̱ya iga kitajtaniáj a̱ꞌyéj in yéj, iga kimatiáj iga toTe̱ko.

¹³ Iwá̱n Jesús tana̱ꞌtechoj, kikuiꞌ pa̱n iwá̱n kimajmakakej yejame̱n; ijko̱nsan no̱ kichij iwá̱n michin.

¹⁴ Iga iní̱n e̱yi ve̱ja iga Jesús ki̱xne̱xtilij idisci̱polojmej kua̱ꞌ ojpa‑isaꞌ.

Jesús tajtowa iwá̱n Simón Pedro

¹⁵ Kua̱ꞌ tamiꞌ takuajkej, Jesús kitajtan Simón Pedro: —Simón, ipiltzi̱n Jonás, ¿ix tine̱neki má̱j que ini̱mej? Pedro kijtoj: —Kena noTe̱ko, tej tikmati iga nimitzneki. Iwá̱n Jesús kijtoj: —Xine̱cuida̱rowíliwaꞌ noborre̱gojtzitzi̱n.

¹⁶ Sej kitajtan, iga iní̱n o̱me ve̱jya: —Simón, ipiltzi̱n Jonás, ¿ix tine̱neki? Pedro kijtoj: —Kena noTe̱ko, tej tikmati iga nimitzneki. Jesús kijtoj: —Xicuida̱ro noborre̱gojmej.

¹⁷ Iga iní̱n e̱yi ve̱ja kitajtan: —Simón, ipiltzi̱n Jonás, ¿ix tine̱neki? Pedro mokno̱matiꞌ iga e̱yi ve̱ja kitajtanij iga si kineki; iwá̱n kijlij: —NoTe̱ko, tej nochi tikmati; tej tikmati iga nimitzneki. Jesús kijtoj: —Xicuida̱ro noborre̱gojtzitzi̱n.

¹⁸ Nimitznojma‑ijliá iga kua̱ꞌ tichokótzi̱noꞌ, timotaajakia̱ya iga tia̱ya ka̱n tej tikneki; eꞌ kua̱ꞌ tiwé̱weja, tikmela̱was moma̱ꞌ iwá̱n seꞌ mitztaajaki̱lti̱j iwá̱n mitzwi̱gas ka̱n ayá̱ꞌ tikneki.

¹⁹ Iga iní̱n kijtoj, Jesús nemi kijtowa kén iga Pedro yawi mikiti iwá̱n ijkó̱n kiweyimati̱lti̱j Dios. Iwá̱n Jesús kijtoj: —¡Xine̱toka!

Discípulo yej Jesús kipoxneki

²⁰ Kua̱ꞌ Pedro tacháꞌ itepotztajpa, kitaꞌ iga kitokatiwa̱laj inó̱n yej Jesús kipoxnekiá, ino̱nsan yej e̱watoya ite̱noj kua̱ꞌ cena̱rojtoyaj iwá̱n kitajtan: “NoTe̱ko, ¿a̱ꞌyéj in yej yawi mitzne̱xti̱ti iga mamitzki̱tzki̱ka̱n?”

²¹ Kua̱ꞌ Pedro kitaꞌ, kitajtan Jesús: —NoTe̱ko, in iní̱n ¿te̱ yawi kipasa̱ro̱ti?

²² Jesús kijtoj: —Siga nikneki ma‑isato este kua̱ꞌ nej niwi̱ꞌ, inó̱n tej atikmati. Tej xine̱toka.

²³ Iwá̱n mopowaꞌ iga inó̱n discípulo ayá̱ꞌ mikis. Eꞌ Jesús ayá̱ꞌ kijtoj iga ayá̱ꞌ mikis, sino que kijtoj: “Siga nikneki ma‑isato este kua̱ꞌ nej niwi̱ꞌ, inó̱n tej atikmati.”

²⁴ Nejsan in inó̱n discípulo yej nikpowa nochi iní̱n yej nikitaꞌ, iwá̱n nikijkuiloj. Iwá̱n nikmati iga ayá̱ꞌ nitakajkaya̱wa.

²⁵ Ónogoꞌ má̱j yej Jesús kichij; siga mamo‑ijkuilo katka sejsé̱ sejsé̱, anka ipan inewi ta̱jli akitolo̱j a̱mamej yej mo‑ijkuilo̱j. Ijkó̱nyawaꞌ.