2 Corintios 6 - El Nuevo Testamento

¹ Nejame̱n nisentekipanowaj wa̱n Dios, nimitzijliáj iga iná̱n ankimatij iga Dios mitzcho̱kiliáj, amo bá̱ldejsan xikmatika̱n.

² Porque Dios kijtowa: Kua̱ꞌ asiꞌ hora iga manimitzcho̱kili, nimitzkaguiꞌ; kua̱ꞌ nokta tiknektoya iga manimitzma̱nawi, nimitzpale̱wij. Iná̱n Dios kineki mamitzo̱mema̱wi̱ka̱n; a̱man wel mitzma̱nawiáj.

³ Nejamej aniknekij agaj makipo̱powa notekipano̱lmej. Inó̱n iga ayá̱ꞌ nikchi̱waj nité̱ yej agaj makiki̱xti ipan iyojwi toTe̱ko.

⁴ Ma̱jwaꞌ nimomelaꞌne̱xtiáj iga nejame̱n itekipanowa̱nimej Dios, nikijyo̱wiáj kua̱ꞌ ne‑ikno̱chi̱waj, kua̱ꞌ ayá̱ꞌ nikpiáj nité̱, iwá̱n kua̱ꞌ onoꞌ tejté̱ yej ne̱yo̱lmiktiáj.

⁵ Ne̱magakej iwá̱n ne̱pre̱sojwijkej. Ne‑ikno̱chijkej kua̱ꞌ ne̱se̱sempo̱lojkej. Poxsan nitekipanowaj, a veces senyówal ayá̱ꞌ nikochij iwá̱n a veces ayá̱ꞌ nitakuaj.

⁶ Malej iga nipanowaj ipan nochi iní̱n, niye̱ꞌnemij. Niki̱xmatij itájto̱l Dios iwá̱n nikijyo̱wiáj nochi yej ne̱yo̱lmiktiáj. Nite‑ijikni̱mej, iga ipan nejamej onoꞌ iyEspí̱ritoj Dios wa̱n nikmelaꞌnekij nokta tokni̱mej.

⁷ Dios ne̱pale̱wiáj iga nikpowaj ye̱ꞌnoti̱ciaj. Kua̱ꞌ nimote̱nki̱tzkiáj wa̱n agaj, iga nikma̱nawiáj ye̱ꞌnoti̱ciaj, nikijtowaj yej melaꞌcie̱rtoj.

⁸ Onoꞌ ka̱n ne̱ye̱ꞌitaj, kanaj ne̱po̱powaj, kanaj ye̱ꞌtajto̱lo iga nejamej, kanaj ayá̱ꞌ ye̱ꞌtajto̱lo iga nejamej, kanaj ne‑ijliáj iga nitakajkaya̱waj, malej iga nejamej nikijtowaj petz yej cierto.

⁹ Malej ne‑i̱xmatij, eꞌ ne‑itaj ken ayá̱ꞌ ne‑i̱xmatij. Kanaj ne̱mikti̱jnekij, eꞌ malej ijkó̱n, nonókejoꞌ. Ne‑ikno̱chi̱waj, eꞌ ayá̱ꞌ ne̱melaꞌmiktiaja.

¹⁰ Né̱sikiꞌ nimokno̱matij, eꞌ nochipa niyo̱lpa̱ktokej. Malej animotapialiáj, eꞌ miaꞌya ye̱ꞌonokej iyi̱xtaj toTe̱ko iga nejamej nikpowilijkej de Cristo. Né̱sikiꞌ ayá̱ꞌ nikpiáj nité̱, sie̱mpa nikpiáj nochi.

¹¹ Nokni̱wa̱n yej ancha̱ntitokej Corinto, nimitznojma‑ijlijkej yej cierto; nochi yej nikpiayaj ipan noa̱lmajmej, ankimátija.

¹² Nejamej ayá̱ꞌ nikajte̱waj iga nimitznekij, eꞌ ne̱si amejwa̱n ayá̱ꞌ ijko̱nsan no̱ iga anne̱nekij.

¹³ Nimitztekiꞌtajtaniliáj ken tikita nej amotaj, iga xine̱nekika̱n kensan nejame̱n nimitznekij.

Tejame̱n ken kua̱ꞌ itio̱pan Dios

¹⁴ Amo ximose̱tili̱ka̱n iwá̱n yej ayá̱ꞌ kicre̱dojtokej Cristo. ¿Ix wel sen‑onos se̱ yej kichi̱wa yej ye̱kti wa̱n se̱ yej kichijtoꞌ yej aye̱kti? ¿o ix wel sen‑onos ta̱wi̱lyo̱ꞌ wa̱n tako̱mitilyo̱ꞌ?

¹⁵ ¿Ix Cristo wel moye̱ꞌita wa̱n Tzitzimiꞌ? Niga yej kicre̱dojtoꞌ Dios awel kipiá se̱san iya̱lmaj wa̱n yej ayá̱ꞌ kicre̱dojtoꞌ Dios.

¹⁶ Iwá̱n ka̱n itio̱pan Dios awel no̱ ono i̱dolojmej, porque tejame̱n ken kua̱ꞌ itio̱pan Dios yej isatoꞌ iwá̱n yéj kijtoj: Nia nicha̱ntitoti iwá̱n yejame̱n wa̱n nia ninemiti iwá̱n yejame̱n; nej nimochi̱was iDio̱s iwá̱n yejame̱n yawi mochi̱watij notatki.

¹⁷ Inó̱n iga ijkí̱n kijtowa toTe̱ko: Xiki̱saka̱n ka̱n amonokej itza̱la̱n yejamej, ximoyokati̱ka̱n; amo xikchijchimika̱n yej aye̱kti. Iwá̱n nej nia nimitzo̱mema̱wi̱tij.

¹⁸ Iwá̱n nej nimochi̱was amotaj, iwá̱n amejwa̱n anmochi̱waskej nopilowa̱n. Kijtowa toTe̱ko yej nochi wel kichi̱wa.