2 Corintios 13 - El Nuevo Testamento

Pablo tano̱no̱tza

¹ Iga nia̱j sej nimitzitatij, masis e̱yi ve̱jya iga nimitzpaxa̱lowiliáj. Xikejla̱mikika̱n ken kijtowa itájto̱l toTe̱ko: Iga agaj mamote̱lwi, kineki ompa maono o̱me o e̱yi yej makijto̱ka̱n iga kitakej yej ayompa mochij.

² Iga sej nimitzpaxa̱lowili̱to̱yaj nimitzno̱no̱tzkej iga ayá̱ꞌ nia nimitzcho̱kili̱tij amejwa̱n wa̱n sekin siga ayá̱ꞌ ankikajte̱waj iga ankichi̱waj yej aye̱kti. Malej wejka iná̱n nonoꞌ, sej nimitzno̱no̱tzaj ken kua̱ꞌ nonoꞌ amote̱noj.

³ Amejwa̱n ankinekij xikitaka̱n siga kua̱ꞌ nej nitajtowa, melá̱ꞌ iga Cristo ne̱tajto̱lmaka. Cristo ayéj iga awel mitzchi̱wiliáj tejté̱ iga mamitzcastiga̱ro̱ka̱n, sino que ipan amejwa̱n mone̱xtiá iga kipiá poder.

⁴ Melá̱ꞌ iga kua̱ꞌ kiclava̱rojkej Cristo ipan cruz, ayá̱ꞌ katka tajpalej, eꞌ iná̱n isatoꞌ iga ipode̱r Dios. Ijko̱nsan no̱ ken onoya Cristo, nejamej ayá̱ꞌ nitajpalejkej, eꞌ iga nise̱titokej wa̱n Cristo, nisatoskej iga ipode̱r Dios iga manimitzpale̱wi̱ka̱n amejwa̱n.

⁵ Améjwa̱nsan ximomachi̱li̱ka̱n siga anmoconfia̱rojtokej ipan toTe̱ko. ¿Ix ayá̱ꞌ ankimatij iga ipan amejwa̱n onoꞌ Jesucristo? Siga ayá̱ꞌ anmomelaꞌconfia̱rojtokej ipan Cristo, ijkó̱n sí anmopojpolójkeja.

⁶ Nejamej nikijtowaj iga ankimelaꞌmatij iga nejamej ayá̱ꞌ nemi nimoma̱polowaj.

⁷ Iwá̱n niktajtaniliáj Dios iga amejwa̱n iga amo xikchi̱waka̱n nité̱ yej aye̱kti. Ayéj iga nejamej manimone̱xtika̱n iga niye̱ꞌnemij, sino que iga amejwa̱n xikchi̱waka̱n yej ye̱kti, malej iga mane̱si iga nejamej aniwelitiakej.

⁸ Nejamej awel nikchi̱waj tejté̱ yej kitzakuiliá iga mamokaki itájto̱l toTe̱ko, welsan nikchi̱waj tejté̱ iga mapi̱wi itájto̱l toTe̱ko yej melaꞌcie̱rtoj.

⁹ Inó̱n iga, si amejwa̱n má̱j antajpalejkej, nejamej nipa̱kij iga ayá̱ꞌ nitajpalejkej. Iwá̱n ni‑ora̱dowaj iga má̱j xiye̱ꞌnemika̱n ipan iyojwi Cristo.

¹⁰ Nimitzijkuilowiliáj iní̱n a̱maꞌ kua̱ꞌ aya nia nimitzitatij iga weljoꞌ ximoyo̱lpataka̱n, ijkó̱n kua̱ꞌ nasis ayá̱ꞌ nimitzajajwaskej. Dios ne̱máꞌ iga manimanda̱ro iga manimitzpale̱wi̱ka̱n ayéj iga manimitzpolo̱ka̱n.

Pablo monawatiá

¹¹ Ino̱nsan nimitzijliáj nokni̱wa̱n iga nimonawatiá iwá̱n amejwa̱n. Nimitztajtaniliáj iga xipa̱ktoka̱n, xikchi̱waka̱n iga má̱j xiye̱ꞌnemika̱n, se̱san amoa̱lmajmej wa̱n sekin, iwá̱n xonoka̱n tamelá̱, iwá̱n Dios yej te̱poxneki onos wa̱n amejwa̱n.

¹² Ximopipitzo̱ka̱n iga ximosaluda̱ro̱ka̱n ken Dios kiye̱ꞌita.

¹³ Nochi tokni̱wa̱n yej kitokaj Cristo mitzejla̱mikij.

¹⁴ ToTe̱ko Jesucristo mamitzcho̱kili̱ka̱n, Dios mamitznekika̱n iwá̱n iyEspí̱ritoj maono wa̱n amejwa̱n. Ijkó̱nyawaꞌ.