1 Juan 4 - El Nuevo Testamento

Amo mamitzkajkaya̱waka̱n yej kijtówajkiꞌ iga Dios kimaka tájto̱l iga makijto

¹ Nokni̱wa̱n yej nimitzpoxnekij, amo xicre̱do̱ka̱n nochi ino̱mej yej kijtowaj iga iyEspí̱ritoj Dios kitajto̱lmakaj, sino que xikitaka̱n siga inó̱n espíritu yej onoꞌ ipan yejamej, wi̱ꞌ de Dios o ayéj. Iga ipan iní̱n ta̱jli poxsan nemi pi̱wij yej takajkaya̱waj, ino̱mej yej ayéj melaꞌprofe̱tajmej yej kijtowaj iga Dio̱skiꞌ tajtowa pan yejame̱n.

² Ijkó̱n amejwa̱n wel ankimatiskej a̱ꞌyéj kipiá iyEspí̱ritoj Dios: nochi yej kijtowa iga Jesucristo kipiáꞌ icue̱rpoj ken nochi ta̱gaꞌ kua̱ꞌ wa̱lka ipan ta̱jli, inó̱n kipiá iyEspí̱ritoj Dios.

³ Nochi yej ayá̱ꞌ kijtowa iga Jesucristo kipiáꞌ icue̱rpoj ken nochi ta̱gaꞌ kua̱ꞌ wa̱lka ipan ta̱jli, inó̱n ayá̱ꞌ kipiá iyEspí̱ritoj Dios; sino que kipiá iyespí̱ritoj yej ayéj melaꞌCri̱stoj; yej amejwa̱n ankimátija iga inó̱n espíritu yawi wi̱kiti, iwá̱n iná̱n ónoꞌya ipan iní̱n ta̱jli.

⁴ Nopilowa̱n, amejwa̱n itatki Dios iwá̱n ankita̱nilíjkeja ino̱mej yej ayéj melaꞌprofe̱tajmej, yej takajkaya̱waj, iga inó̱n iyEspí̱ritoj Dios yej onoꞌ ipan amejwa̱n má̱j weliti que inó̱n espíritu yej onoꞌ ipan ino̱mej yej ayá̱ꞌ kichi̱waj ken kineki toTe̱ko.

⁵ Ino̱mej yej takajkaya̱waj de inó̱mejpa yej akitokaj toTe̱ko, takajkaya̱waj kensan motekichi̱wa ipan iní̱n ta̱jli, inó̱n iga sekin yej no̱ akitokaj toTe̱ko kitajto̱lkakij ino̱mej yej ayéj melaꞌprofe̱tajmej.

⁶ Eꞌ tejamej itatki Dios. Yej ki̱xmati Dios, te̱tajto̱lkaki, eꞌ yej ayéj itatki Dios ayá̱ꞌ te̱tajto̱lkakij. Ijkó̱n wel tikmatij a̱ꞌyéj kipiá iyEspí̱ritoj Dios yej atakajkaya̱wa iwá̱n a̱ꞌyéj kipiá espíritu yej takajkaya̱wa.

Dios nochipa te̱neki

⁷ Nokni̱wa̱n yej nimitzpoxnekij, matimosepannekika̱n, iga Dios kichi̱wa iga wel matiknekika̱n tokni̱wa̱n. Nochi yej kineki iyikni̱n, inó̱n ipiltzi̱n Dios iwá̱n ki̱xmati Dios.

⁸ Eꞌ yej ayá̱ꞌ kineki iyikni̱n, inó̱n ayá̱ꞌ ki̱xmati Dios, iga Dios nochipa te̱neki.

⁹ Dios kine̱xtij iga te̱poxneki kua̱ꞌ kiti̱tan ise̱lPiltzi̱n ipan iní̱n ta̱jli, iga timoconfia̱rowaj pan yéj, nochipa tonoskej wa̱n Dios.

¹⁰ Ipan iní̱n ne̱si iga te̱neki: ayéj iga tejamej tikpoxnekikej Dios, sino que yéj te̱neguiꞌ iwá̱n kiti̱tan iPiltzi̱n iga yéj mamiki iga tejamej iga wel mate̱perdona̱rowili yej tejamej tikchijkej yej aye̱kti.

¹¹ Nokni̱wa̱n yej nimitzpoxnekij, siga Dios ijkó̱n te̱neguiꞌ, tejamej no̱ matimonekika̱n.

¹² Dios ayagaj kitaꞌ nike̱man; eꞌ siga timosepannekij, Dios se̱titoꞌ iwá̱n tejamej iwá̱n tejamej tise̱titokej wa̱n yéj, iwá̱n ijkó̱n momelaꞌne̱xtiá ken iga Dios te̱poxneki.

¹³ Ijkí̱n tikmatij iga tise̱titokej wa̱n Dios iwá̱n Dios se̱titoꞌ wa̱n tejamej: iga iyEspí̱ritoj yej yéj te̱máꞌ.

¹⁴ Iwá̱n nejamej nikitakej iwá̱n niknojma‑ijtowaj iga toTaj kiti̱tan iPiltzi̱n iga makisalva̱ro nochi gente.

¹⁵ Dios se̱titoꞌ wa̱n nochi yej kinojma‑ijtowa iga Jesús nokta iPiltzi̱n Dios. Ijkó̱n wel tise̱titoskej wa̱n Dios iwá̱n Dios wa̱n tejamej.

¹⁶ Tikmatij wa̱n ticre̱dowaj iga Dios te̱neki. Dios te̱neki, iwá̱n yej kineki iyikni̱n, se̱titoꞌ wa̱n Dios, iwá̱n Dios se̱titoꞌ wa̱n yéj.

¹⁷ Siga melá̱ꞌ tiknekij tokni̱wa̱n iwá̱n tikchi̱waj ken kichij Jesucristo kua̱ꞌ onoya ipan iní̱n ta̱jli, tijyaskej kensan yéj ken iga te̱neki, iwá̱n ayá̱ꞌ timajmawiskej kua̱ꞌ Dios tajuzga̱ro̱j.

¹⁸ Yej kimati iga Dios kineki, ayá̱ꞌ majmawi. Kua̱ꞌ tikmatij iga Dios te̱poxneki, ni alí̱n atimajmawij. Iga yej majmawi kimati iga Dios yawi kicastiga̱ro̱ti. Inó̱n iga, si agaj majmawi, aya kimelaꞌmati iga Dios kipoxneki.

¹⁹ Tejamej tiknekij Dios iwá̱n tiknekij tokni̱wa̱n iga Dios achto te̱neguiꞌ.

²⁰ Siga agaj kijtowa: “Nej nikneki Dios”, eꞌ kijiya iyikni̱n, inó̱n takajkaya̱wa. Pues siga ayá̱ꞌ kineki iyikni̱n yej wel kita, awel kineki Dios yej ayá̱ꞌ kita.

²¹ Jesucristo ijkí̱n te‑ijliá iga matikchi̱waka̱n: Yej kineki Dios, no̱ makineki iyikni̱n.