SALMOS 98 - Nahuatl Huasteca (Western)

Ma tijpaquilismacaca Toteco pampa yaya xitlahuac tetlajtolsencahua

¹ Ma tihuicaca para TOTECO se huicatl yancuic, pampa yaya quichijtoc nochi nopa huejhueyi tiochicahual nextili. Yaya ya tlatlantoc ica ihueyi chicahualis huan ica imax catli tlatzejtzeloltic.

² TOTECO quipannextijtoc ipan nochi tlaltipactli para san yaya temaquixtía. Quinextijtoc iniixtla sequinoc tlalme para xitlahuac tetlajtolsencahua.

³ Yaya quielnamictoc catli techtencahuilijtoc pampa techicneli tojuanti tiisraelitame. Huan ama ipan nochi tlaltipactli quiitztoque quenicatza Toteco Dios techmaquixtijtoc tiimasehualhua.

⁴ Yeca ipan nochi tlaltipactli xijpaquilismacaca TOTECO huan xihuicaca ica miyac paquilistli.

⁵ Xijhuicatica TOTECO. Xijhueyimatica huan xitlatzotzonaca ica arpa.

⁶ Xijpitzaca nochi tlamantli tlapitzali huan xihuicaca ica yejyectzi iixpa TOTECO, yaya catli Tlanahuatijquetl.

⁷ ¡Ma mojmolini chicahuac tlen ihuexca nopa hueyi atl huan ma quipaquilismaca Toteco! Nochi tlaltipactli huan catli itztoque ipani ma tzajtzica huan ma quiijtoca: “Tijhueyitlalise Toteco.”

⁸ Nopa hueyame ma paquica, huan masehualme ma momatlatzinica, huan nochi tepeme ma huicaca ica paquilistli

⁹ iixpa TOTECO, pampa yaya huala para quintlajtolsencahuaqui xitlahuac nochi masehualme catli itztoque ipan ni tlaltipactli.