SALMOS 8 - Nahuatl Huasteca (Western)

Masehualme huan ihueyitilis Toteco Dios

¹ ¡TOTECO, ta Catli Tijpiya Nochi Tlanahuatili! Mohueyitilis quitemitía nochi tlaltipactli. Huan motlatlanex quionpano ilhuicactli. Nochi quimatij ta tlahuel tihueyi.

² Tiquinnextilijtoc coneme huan pilconetzitzi catli noja chichij ma mitzpaquilismacaca. Mocualancaitacahua quiitase huan momacase cuenta para tlahuel pano hueyi mochicahualis huan yeca ayacmo molinise.

³ Quema niquita ilhuicactli catli tijsencajqui, huan nopa metztli huan sitlalime catli tiquinchijchijqui,

⁴ nimoyolilhuía: ¿Ajqueya tojuanti timasehualme para ta timocuatotonía huan timoilhuía tlen tojuanti? Nelquentzi topati timasehualme para ta techmocuitlahuis.

⁵ Techchijtoc timasehualme más tihuejhueyi moixpa que nochi sequinoc. Techmacatoc tohueyitilis moixpa huan tijsencajtoc para nochi catli tijchijtoc ma techtlepanitaca. San ta, TOTECO, tieltoc más tihueyi huan techtlani ica mohueyitilis.

⁶ Techmacatoc timasehualme tlanahuatili ica nochi tlapiyalme catli tiquinchijtoc. Quena, techmacatoc timasehualme para ma tijpiyaca tequiticayotl ica nochi tlamantli.

⁷ Tiquinnahuatíaj nochi borregojme, huacaxme huan nochi tecuanime catli mosisiníaj.

⁸ Tijpiyaj tequiticayotl ica nochi tlamantli totome huan michime, huan ica nochi catli itztoque ipan hueyi atl.

⁹ ¡TOTECO, ta Catli Tijpiya Nochi Tlanahuatili! Nochi masehualme campa hueli ipan nochi tlaltipactli quimatij ta tlahuel tihueyi.