SALMOS 4 - Nahuatl Huasteca (Western)

Monequi timotemachise ipan Toteco Dios

¹ Toteco Dios, ta techchijtoc nixitlahuac moixpa, Se favor technanquili quema nimitznojnotza. Ta catli nochipa techpalehuía quema nitlaijiyohuía, ama sempa techtlasojtla huan xijcaqui quema nimotlatlajtía.

² Huan Toteco quinanquilía. “Anmasehualme, xijtlacaquilica ya ni: ¿Hasta quema tlamis para annoca paquise na, catli más quinamiqui nijselis tlatlepanitacayotl? ¿Hasta quema noja anquinhueyichihuase tlaixcopincayome catli amo neli ya Dios? ¿Hasta quema noja anmocahuase ma anmechcajcayahuaca?”

³ Anmasehualme, xijmatica ya ni. TOTECO techiyocatlalijtoc para tiiaxcahua nochi tojuanti catli techcojtoc. Huan yaya nechtlacaquilía quema nijnojnotza huan nechchihuilía catli nijtlajtlanía.

⁴ Masque anhuihuipicaj ica cualantli, amo xitlajtlacolchihuaca. Quema anmotectose ipan amotlapech huan amo tleno molinía, ximonejnehuilica catli eltoc ipan amoyolo.

⁵ Xijchihuaca catli quinequi TOTECO huan ya nopa elis quen anquimacasquíaj se tlacajcahualistli catli quipactía. Quena, ximotemachica ipan ya.

⁶ Miyac quiijtohuaj: “Amo aqui huelis techpalehuis.” Pero ta tihueli, TOTECO. Techcualita huan techtiochihua.

⁷ Ta tijtlalijtoc ipan noyolo más paquilistli, huan amo quen catli quipiyaj masehualme catli quipixcaj miyac trigo, o quipiyaj miyac xocomecatl iayo.

⁸ Yeca na nimotecas ica paquilistli ipan noyolo huan ica cuali nicochis, pampa nijmati san ta, TOTECO, techmanahuía huan amo aqui huelis tlen nechchihuilis.