SALMOS 149 - Nahuatl Huasteca (Western)

Nochime ma quipaquilismacaca Toteco

¹ Xijpaquilismacaca TOTECO. Xihuicaca para TOTECO se huicatl yancuic. Nochi amojuanti animasehualhua, xijhuicatica Toteco por nochi catli quichijtoc.

² Anisraelitame, ximopaquilismacaca ipan Toteco pampa yaya anmechchijchijqui. Anmasehualme ipan altepetl Jerusalén, ximopaquilismacaca ipan amotlanahuatijca.

³ Xijpaquilismacaca TOTECO ica mijtotilistli. Huan xihuicaca ica pandero huan ica arpa.

⁴ Pampa Toteco quipantía paquilistli ipan imasehualhua, huan quinmaquixtía catli moechcapanohuaj iixpa.

⁵ Nochi catli iaxcahua TOTECO ma paquica pampa yaya tlahuel hueyi ihueyitilis. Huan hasta quema ya motectoque ipan inintlapech noja ma quihuicatica.

⁶ Ma quihueyitlalica TOTECO nochi imasehualhua. Quipixtoc ipan imax se machete catli oncac tlatequi,

⁷ para ica quincuepilis nopa sequinoc tlalme catli quinchihuilijque catli amo cuali, huan para ica quintlatzacuiltis.

⁸ Ma quinilpica inintlanahuatijcahua huan inintlayacancahua ica tepos cadena,

⁹ para quiselise nopa tlatzacuiltili catli ya eltoc tlasencahuali. Huan ica ni TOTECO quinhueyitlalis nochi itlatzejtzeloltijca masehualhua. ¡Ma nochi quipaquilismacaca TOTECO!