SALMOS 130 - Nahuatl Huasteca (Western)

Ximotemachica ipan Toteco para anmechmanahuis

¹ TOTECO, quema nimopantía ipan se hueyi tlaohuijcayotl, na nimitztzajtzilía para techtitlanilis motlapalehuil.

² Toteco, techtlacaquili quema nimitznojnotza. Techchihuili cuenta catli nimitztlajtlanía huan techpalehui.

³ TOTECO, sintla tiquelnamiquisquía nochi totlajtlacolhua, amo aqui huelisquía moquetzas moixpa.

⁴ Pero ta nelía titetlapojpolhuía, para nochi masehualme ma mitztlepanitaca.

⁵ Na nimochiya ipan ta, TOTECO, para techpalehuis, Quena, ica nochi noyolo nimotemachía ipan nopa catli techtlajtolcahuilijtoc ipan mocamanal.

⁶ Ipan noalma senquistoc nitlachixtoc para ta, TOTECO, xitequiti. Nitlachixtoc para techpalehuis, quen nopa tlamocuitlahuiani quichiyaj ma tlanesi. Quena, más nitlachixtoc huan amo quen tlamocuitlahuiani catli tlahuel quinequij ma tlanesi.

⁷ Nochi anisraelitame, ximotemachica ipan TOTECO, pampa san yaya quipiya hueyi iyolo huan san yaya temaquixtía tlatoctzitzi.

⁸ Yaya quinmaquixtis israelitame tlen nochi inintlajtlacolhua.