SALMOS 11 - Nahuatl Huasteca (Western)

Ma timotemachica ipan Toteco para techpalehuis

¹ Amo techilhui: “Ximochololti cuatitla huan ximomanahuiti quen se tototl.” Amo monequi nicholos pampa na nimotemachijtoc ipan TOTECO.

² Nochi quiijtohuaj: “Xiquita, nopa masehualme catli mosisiníaj quicualtlalíaj cuahuitoli huan cuatlamintli, huan onmotlatijtoque para quinmaquilise masehualme catli itztoque xitlahuaque.” Masque quej nopa quiijtohuaj, amo melahuac.

³ Masque quiijtohuaj: “Ayacmo oncas leyes huan amo aqui tlanahuatis xitlahuac, huan huajca monequi masehualme catli cuali ininyolo ma choloca pampa amo aqui huelis quinmanahuis”, amo neli inincamanal.

⁴ TOTECO noja itztoc ipan itiopa catli tlatzejtzeloltic nepa ilhuicac. Quena, yaya mosehuijtoc ipan isiya yejyectzi huan noja tlanahuatía. Quiita nochi catli quichihuaj masehualme. Quitlajtlachilía sese inemilis.

⁵ TOTECO quinyejyecohua catli quichihuaj catli cuali, pero masehualme catli amo cuajcualme huan catli quinpactía mosisiníaj, amo quinequi quinitas.

⁶ TOTECO quichihuas ma huetzi tlicoli catli xahuantoc ininpani catli quichihuaj catli amo cuali. Quena, quintitlanilis azufre catli lementoc para ma huetzi ininpani, huan quintlatis ica se ajacatl catli tlahuel totonic.

⁷ TOTECO, yaya nelcuali. Quinicnelía catli nemij xitlahuac. Huan masehualme catli xitlahuac ininyolo quiixitase, huan quimatise para Toteco quicualita catli quichihuaj.