SALMOS 100 - Nahuatl Huasteca (Western)

Ma tijtlascamatica Toteco

¹ Xihuicaca ica paquilistli para TOTECO, nochi anmasehualme catli anitztoque ipan ni tlaltipactli.

² Xijtequipanoca TOTECO ica paquilistli. Huan quema anhualahuij iixpa, xihuicatihualaca.

³ Xijmatica cuali para TOTECO, yaya Toteco Dios. Yaya techchijchijqui. Amo timochijchijtoque tojuanti. Tojuanti tiimasehualhua huan tiitztoque quen tiiborregojhua catli techpixtoc ipan ipotrero para techmocuitlahuis.

⁴ Quema ticalaquij ipan itiopa, ma tijtlascamatica miyac. Huan quema tinemij icalixpa, ma tihuicaca. Quena, ma tijtlascamatica huan ma tijpaquilismacaca.

⁵ Pampa TOTECO yaya nelía cuali. Nochipa teicnelía huan tetlasojtla. Yaya itztos temachtli para nochipa ica nochi masehualme catli tlacajtihualahuij.