Tito 3 - El Nuevo Testamento

Ijkin noyekanaskej on tlaneltokakej

¹ Xkinmelnamikti on tlaneltokakej para ma kintlakaitakan on yejuan tlayekanaj niman on yejuan kipiyaj ueyitekiuayotl. Ma kintlakamatikan niman ma kipiyakan inyojlo para kichiuaskej nochi tlajtlamach* tlen kuajli.

² Maka yakaj ma kiteneuilikan on tlen xkuajli, yej ma nemikan inuan oksekimej ikan yolseuilistli, niman ma tenotskej, niman ma kiteititikan yolyemanilistli itech nochi tlakatl.

³ Achtopa tejuamej no xkuajli titlanemiliayaj niman xtitetlakamatiyaj. No tixpolijtinemiyaj niman tinemiyaj ipan nochi sesekneka eleuilistli* niman pakilisyotl yejuan xkuajli. Tinemiyaj ipan on tlen xkuajli niman ipan nexikolyotl. Oksekimej techtlauelitayaj niman tikintlauelitayaj.

⁴ Pero ijkuak Dios toTemakixtijkatsin otechititij inekilis niman itetlajsojtlalis*,

⁵ otechmakixtij. Pero otechmakixtij xpampa tejuamej otikchijkej on tlen kuajli, yej pampa yejua otechiknelij. Otechmakixtij ikan iEspíritu Santo yejuan otechpajpak para tikpiyaskej yenkuik nemilistli, niman yejua otechyenkuilij.

⁶ Dios otechtlayokolij sanoyej* miyek iEspíritu itechkopa JesuCristo toTemakixtijkatsin,

⁷ para ikan iueyitetlajsojtlalis* JesuCristo, Dios kiteneua ika nochi totlajtlakoluan yokintlapojpoluij, niman ijki tikseliskej nemilistli para nochipa yejuan tikmachixtokej.

⁸ Yejua in tlajtojli sanoyej melauak, niman nikneki para xtlanauati sanoyej ika in tlajtlamach* para on yejuan kineltokaj Dios ma notakan sano yejuamej para kichiuaskej on tlen kuajli. Yejua in tlajtlamach* sanoyej kuajli niman kimpaleuis nochimej.

⁹ Pero xtlalkaui on kamauijsokilistli yejuan xitlaj* kijtosnekij, de on tlen kijkuilouaj inka toachtojtajuan, niman on tlauejli yejuan kipiyaj niman kamauijsokilistli ika on itlanauatil Moisés. Nochi on xuelis kimpaleuis nion xitlaj* kijtosneki.

¹⁰ Tla yakaj kinxexelosneki on yejuan tlaneltokaj, xchikajkanotsa sejpa noso okpa para maka ma kichiua. Tla xmitstenkaki, xkauili ma uiya,

¹¹ pampa ika on tlen kichiua tikmatis ika on tlakatl kitlalkauiya on tlen kuajli niman kichiua tlajtlakojli. Niman sano yejua notlajtlakolmaka.

Pablo kimaka Tito sa ika nochi tlanauatijli

¹² Ijkuak nejua niktitlanis motech Artemas noso Tíquico, xchiua kanika para xnechitaki ne Nikópolis, pampa nejua nikneki para ompa nikpanos on invierno.

¹³ Nochi ika on tlen tiuelis xpaleui Zenas, on tepantlajtojketl, niman Apolos. Xkinmaka nochi tlen uelis para ika yaskej, niman maka itlaj ma kimpolo.

¹⁴ Niman on tokniuan no ma kipiyakan impan inyojlo para kichiuaskej on tlen kuajli niman ijkon uelis kimpaleuiskej oksekimej ika on tlen kimpoloua. Ijkon innemilis itlaj ika ma tlapaleuikan.

Tlajpalouilistli niman tlatiochiualistli

¹⁵ Nochimej yejuan nouan nemij mitstlajpalouaj. Xkintlajpalo on totetlajsojkaikniuan* yejuan kipiyaj imintlaneltok ken tejuamej. Ma Dios mechtiochiua nochimej nemejuamej ikan iueyitetlajsojtlalis*. Ma ijki nochiua.