Tito 2 - El Nuevo Testamento

On kuajli temachtilistli

¹ Pero on tlen tikijtos ika onkaj kuajli iuan nouikas on kuajli tlamachtijli.

² Xkimijli on ueuentsitsimej ma kintelti inxkuajlieleuilis, ma nemikan ken uelis kintlakaitaskej, ma nemikan ikan kuajli tlamachilistli, ma kipiyakan kuajli intlaneltok niman on tetlajsojtlalistli* niman ma kipiyakan ijyouilistli.

³ No ijki xkimijli on lamajtsitsimej ma yolchipajkanemikan, maka ma tetejteneuakan niman maka sa tlauantinemikan. Yejuamej ma kitemachtikan on tlen kuajli.

⁴ Ma kintitikan on siuamej yejuan kokonej kenijki kintlajsojtlaskej inueuentsitsiuan, niman inkoneuan.

⁵ No ijki ma kiteltikan iminxkuajlieleuilis, ma noyekanakan kuajli, ma chipajkanemikan, ma tlayekanakan kuajli ipan inchan, ma yolyemankanemikan, niman ma kintlakamatikan inueuentsitsiuan ikan tetlakaitalistli, para maka yakaj kijtouilis tlen xkuajli on itlajtoltsin Dios.

⁶ No ijki xkinyoleua on telpokamej para no ma kuajli kitetlalikan iminxkuajlieleuilis.

⁷ Niman tejua xkinmachti ikan moejemplo nochi tlajtlamach* tlen kuajli. Ijkuak tikinmachtis, xkinmachti ikan tlen melauak niman ikan nochi moyojlo.

⁸ Nochipa xtemachti tlen kuajli para maka yakaj kijtouilis tlen xkuajli on temachtiltin, niman ijkon pinauas san akinon yejuan kinekis techistlakos.

⁹ Xkinyoleua on esclavos para ma kintlakamatikan inteko ikan nochi tlen kuajli tekitl. Ma kinyolpaktikan, niman maka ma tenajnankilikan.

¹⁰ Niman xkinnauati maka ma tlachtekikan, yej kemaj nochi kuajli ma kichiuakan para on inteko kintlaliskej inyojlo intech. Ijkon tej, nochimej kimatiskej ika on itlemachtil Dios toTemakixtijkau yejua sanoyej* kuajli.

¹¹ Dios ikan iueyitetlajsojtlalis yejuan xakaj tlakatl kitocarouaya kiselis yokipanextij temakixtilistli para nochi tlakatl.

¹² On iueyitetlajsojtlalis* Dios techmachtia ma tikajkauakan nochi tlen xkuajli niman nochi xkuajli eleuilistli* yejuan onkaj ipan in tlaltikpaktli. Niman no techmachtia ma kuajli titouikakan, ma tiyolmelajkanemikan niman ma tiyeknemikan ipan in tlaltikpaktli.

¹³ Ijkin ma tikchiuakan chika yejko on ueyi tonajli yejuan itech tikpiyaj totlamachalis*. Ipan on ueyi tonajli uajlas toueyi Dios yejuan toTemakixtijkatsin JesuCristo.

¹⁴ Yejua san topampa onotemakak ipan mikilistli para techmakixtia itech nochi kech tlajtlakojli onkaj, niman para techchipaua kuajli. Yejua otechchipau para technoyaxkatia*, niman para tikpiyaskej miyek nekilistli para tikchiuaskej nochi tlen kuajli.

¹⁵ In yejua xtemachti. No ijki xteyoleua niman xtechikajkanotsa ikan nochi motlanauatil. Xmota tejua, maka yakaj mitspijpinauis.