Santiago 3 - El Nuevo Testamento

On tlaneltokakej noneki kuajli kinemachtiskej innenepil

¹ Nokniuan, maka san akinon ma kalaki para temachtis, pampa nenkimatstokej ika Dios más techtlajtlakoltis tejuamej yejuan titemachtiaj tla xkuajli titemachtiaj.

² Tinochimej tikchiuaj miyek tlajtlamach* tlen xkuajli. Pero tla yakaj ikan inenepil nochipa san kijtoua tlen kuajli, yejua melauak de nochi kuajli tlakatl, niman ueli kuajli kimandaroua nochi itlalnakayo.

³ Ijkuak tikintlaliliaj teposkualijli* ipan inkamak on caballos para techtlakamatij, tiuelij tikinuikaj kampa tiknekij.

⁴ Xtlanemilikan intechkopa on barcos. Maski sekimej barcos sanoyej* uejueyimej niman maski sanoyej chikauak ajaka, san ika sen kojtli* pitentsin on tlakatl yejuan kiyekana on barco ueli kuika kampaka kineki.

⁵ Ijkon nochiua ikan sen nenepijli. Maski yejua sanoyej pitentsin ipan totlalnakayo, ijkuak tlajtoua miyek tlamach nochiua. Xtlanemilikan de on tlitl. On tlitl peua pitentsin, pero ueli noskaltia niman hasta ueli kitlatia sen ueyi tepetl.

⁶ Niman tonenepil ken itlaj tlitl yejuan miktlan ualejtikaj itliyo. Yejua onkaj ipan totlalnakayo, niman tlajtlajtoua de nochi tlajtlamach* tlen xkuajli ipan in tlaltikpaktli. Kijtlakoua nochi tonemilis niman yejua techajmana ipan toyojlo ipampa on tlen ika tikijtouaj.

⁷ On tlakamej uelij kinnemachtiaj nochi tlajtlamach* yolkej, totomej, kouamej* niman on yolkej yejuan ipan mar nemij, niman ye kinnemachtianij.

⁸ Pero xakaj ueli kinemachtia inenepil. On nenepijli ken itlaj kouatl. Yejua sen nexikouani yejuan xakaj ueli kinemachtia, niman tentikaj ikan ipajyo yejuan ueli temiktia.

⁹ Ikan tonenepil tikyekteneuaj Dios toTajtsin, niman no ikan tonenepil tikinteneuiliaj tlen xkuajli on tlakamej yejuan Dios okinchijchiu ken yejua nemi.

¹⁰ Sano ipan on kamaktli, kisa yekteneualistli niman tlauijuikaltilistli. Notlajsojkaikniuan, xkuajli para ijkon tikchiuaskej.

¹¹ ¿Ueli meya atl yejuan xpoyek niman atl yejuan poyek san ipan se ameyajli? ¡Melauak ika ka! On xueli.

¹² Nokniuan, ¿ueli sen kojtli* itoka higuera* kitlakitis sen tlakijlotl itoka aceituna, noso on ikuamekayo* uvas kitlakitis sen tlakijlotl itoka higos? ¡Melauak ika ka! On xueli. No sano ijki tej, sen ameyajli poyek xuelis kueponaltis atl yejuan xpoyek.

Tlamatkilistli yejuan melauak

¹³ Tla nemotsajlan nemi on yejuan noteneua ika sanoyej tlamatki* niman nochi kajsikamati, ma kiteititi ikan kuajli inemilis, iyolyemanilis niman itlamatkilis*.

¹⁴ Pero tla nenkipiyaj nexikolistli ipan nemoyojlo noso nochipa nenkinemiliaj tlen kuajli san para nemejuamej, tla ijkon, maka xmoueyimatikan yejua ika on nemotlamatkilis*. Maka xnemilikan ika nenkipiyaj tlamatkilistli, pampa xnejli nenkipiyaj.

¹⁵ Tlamatkilistli ken on xualeua itech Dios, yej kistikaj nikan ipan in tlaltikpaktli. Yejua in tlamatkilistli kistikaj intech in tlajtlakolejkej niman itech on diablo*.

¹⁶ On tlakamej yejuan tenexikolitaj niman san kinemiliaj on tlen kuajli para yejuamej, sano yejuamej xkuajli nouikaj, niman intech onkaj nochi on tlajtlamach* tlen xkuajli.

¹⁷ Pero on yejuan kipiyaj itlamatkilis* Dios, nemij chipajkej. Niman no kinekij yolseuilistli inuan oksekimej, niman nemij yolyemankej, niman kuelitaj teuan nouikaskej. No ijki yejuamej sanoyej* teiknelianij*, niman kitechiuiliaj miyek tlajtlamach* tlen kuajli, niman xkaman techikoitaj, niman nochi on kichiuaj ikan nochi inyojlo.

¹⁸ Yejuamej kichiuaj kanika para onyas yolseuilistli niman yolmelajkilistli.