Santiago 2 - El Nuevo Testamento

On tlaneltokakej xkitocaroua nochikoitaskej

¹ Nokniuan, nemejuamej yejuan nenkineltokaj toueyiTEKO JesuCristo, maka xchikoitakan* sen tlakatl iuan okse.

² Ma tikonijtokan ika sen tlakatl yejuan rico onkalaki kampa nosentlaliaj on tlaneltokaj. Yejua sa majpilpetlantiu ikan anillos de oro, niman no kitlalijtiu itlaken yejuan patioj. Niman no ma tikonijtokan ika sen tlakatl mayankitsin no onkalaki, pero yejua ikan itlaken sosoltsin.

³ Niman aman ma tikonijtokan ika nemejuamej nenkitlakaitaj on yejuan notlakentia ikan itlaken patioj niman nenkijliaj: “Xmotlali nikan ipan in kuajli sieta”, pero on tlakatl mayankitsin nenkijliaj: “Tejua xmotelketsa ne”, noso nenkijliaj: “Xmotlali ne ipan tlajli.”

⁴ Tla ijkon nenkichiuaj, kitosneki nenkichikoitaj sen tlakatl iuan okse, niman nenteixtlalouaj ikan xkuajli nemoyojlo.

⁵ Notlajsojkaikniuan, xkakikan in: Dios okintlapejpenij on yejuan mayankej ipan in tlaltikpaktli para ma ricojtikan ikan tlaneltoktli, niman para nemiskej ne kampa Dios tlamandaroua ijkon ken okitlalij ipan ipromesa para on yejuan kitlajsojtlaj*.

⁶ Yejua ika, ¿tline* nemejuamej xnenkintlakaitaj on mayankej? Xkelnamikikan ika on yejuan ricos mechtekitiltiaj niman no mechteuilanaj intech on tekiuajkej.

⁷ Niman no xkelnamikikan ika on ricos kiteneuiliaj tlen xkuajli itokatsin Cristo yejuan nochimej noneki kitlakaitaskej niman no san ipampa mechtokayotiaj Cristianos.

⁸ On tlanauatijli yejuan más ueyi kijtosneki ipan on Yektlajkuilojli sano yejua in: “Xkintlajsojtla oksekimej ijkon ken tejua timotlajsojtla.” Tla melauak nenkichiuaj on tlen kijtoua in tlanauatijli, kuajli nenkichiuaj.

⁹ Pero tla nenkichikoitaj sen tlakatl iuan okse, nentlajtlakouaj, niman Dios mechtlajtlakolmakas pampa xnenkitlakamatij itlanauatil.

¹⁰ Xkelnamikikan yejua in: Tla sen tlakatl san se tlanauatijli xkitlakamati, yejua sanken* tlajtlakolej maski kintlakamatiskia nochimej on oksekimej tlanauatiltin.

¹¹ Dios yejuan okijtoj: “Maka xsiuapapatlakan nion maka xtlakapapatlakan”, no okijtoj: “Maka xtemiktikan.” Ijkon tej, tla yakaj xosiuapapatlak noso xotlakapapatlak, pero otemiktij, tla ijkon yejua tlajtlakolej.

¹² Nemejuamej xtlajtokan niman xmouikakan kuajli, sa xkomatstiakan ika mechyolkuitiskej niman mechtlaxtlauiliskej ika on tlanauatijli yejuan temanauiya.

¹³ Ijkon xchiuakan pampa on yejuan xteiknelia, Dios no xkiknelis. Pero on yejuan teiknelis nomanauis ijkuak Dios teyolkuitis.

Sen tlaneltoktli miktikaj tla xkipanextia kuajli tekitl

¹⁴ Nokniuan, ¿tlinon ika kipaleuis sen tlakatl tla noteneua kineltoka Cristo, pero xkichiua on tlen kuajli? ¿Uelis kimakixtis itlaneltok in tlakatl tla ijkin tlaneltoka? ¡Melauak ika ka!

¹⁵ Ma tikonijtokan ika sen tokniu tlakatl noso tokniu yejuan siuatl kipoloua itlaken noso on tlen kikuas.

¹⁶ Niman no ma tikonijtokan ika se de on yejuan noteneua tlaneltoka kijlis: “Kuajli xnemi. Xmotlakenti para maka tisekuis, niman xtlakua”, pero xkimaka on tlen kipolojtikaj para itlalnakayo. ¿Tlinon ika kipaleuis on tlinon kijlia?

¹⁷ Yejua ika, tla sen tlakatl noteneua kipiya tlaneltoktli niman xkichiua on tlen kuajli, tla ijkon, itlaneltok miktikaj niman xitlaj* kijtosneki.

¹⁸ Pero kas yakaj nechijlis: “Sekimej kipiyaj tlaneltoktli niman oksekimej kichiuaj tlajtlamach* yejuan kuajli.” Tla yakaj ijkin nechijlis, nejua nikijlis: “Xnechititi san motlaneltok maka iuan on tlen kuajli tikchiua, niman nejua nimitsititis notlaneltok iuan on tlen kuajli yejuan nikchiua.

¹⁹ Tejua tikneltoka ika nemi san se Dios. On tlen tikneltoka kuajli, pero xmatstia ika on xkuajkualtin espíritus no ijkon kineltokaj, niman hasta kuekuetlakaj ikan nemojtijli.”

²⁰ ¿Hasta kanon tajsi ika xueli titlanemilia? ¿Tikneki tikmatis ika on tlaneltoktli yejuan xnopanextia ika on tlen kuajli se kichiua, yejua sen tlaneltoktli yejuan sanenkaj?

²¹ Tla ijkon, xkelnamiki toachtojtataj Abraham. Dios okijtoj ika yejua yolmelajkatlakatl ipampa on tlen okichiu ijkuak okuentlalij ipan on tlaixpan* Isaac on ikoneu.

²² Aman tej, tikmati ika itlaneltok Abraham, niman on tlen okichiu tekitiyaj san sekan. Niman no tikmati ika itlaneltok onaxitij ika on tlen okichiu.

²³ Ijkon kuajli onochiu on tlen kijtoua on Yektlajkuilojli yejuan kijtoua: “Abraham okineltokak Dios, niman ipampa itlaneltok Dios okiselij ken sen yolmelajkatlakatl.” Niman Abraham okitokayotijkej itlajsojkaikniu* Dios.

²⁴ Nemejuamej nenkimatij ika Dios kijtoua ika nochi totlajtlakoluan yokintlapojpoluij ipampa on tlen kuajli tikchiuaj, niman xsan ika on totlaneltok.

²⁵ No ijki onochiu itech on siuatl itoka Rahab, on yejuan tlakapapatlaketl. Yejua kuajli okinselij on yejuan Josué okintitlan para kitaskej kenijki tlaojonkaj ne ueyikalpan Jericó, niman no yejua okimpaleuij para ocholojkej ijkuak ye ualajtikatkaj intlauelikniuan. Yejua ika, Dios kijtoua ika nochi itlajtlakoluan yokintlapojpoluij.

²⁶ Ijkon ken sen tlalnakayotl ijkuak xkipiya ialma miki, no ijki miktikaj itlaneltok sen tlakatl tla xkichiua tlajtlamach* tlen kuajli.