Romanos 3 - El Nuevo Testamento

¹ Tla ijkon, ¿tlinon ika kipaleuiya tla se hebreo, noso tla se kipiya on circuncisión*? ¿On yejua kimpaleuis?

² Kemaj, sanoyej* miyek kipiya tlinon ika kimpaleuiya. On achtoj ika Dios okinmakak para kejeuaskej iYektlajkuilol.

³ Pero ¿tlinon nochiuas tla sekimej hebreos* xkineltokaskej on tlen Dios okijtoj ipan ipromesa? ¿Yejua in kijtosneki ika Dios xok kichiuas on tlen okiprometeroj?

⁴ ¡Melauak tej ika ka! Yej Dios kichiuas on tlen okiprometeroj. Maski nochi tlakatl xkichiua tlen kijtoua, Dios nochipa kichiua tlen kijtoua. Ijkin kijtoua on Yektlajkuilojli: Ika motlajtol, timopanextis ika tikijtoua tlen melaua. Niman xuelis mitstlajtlakolmakaskej ijkuak mitsyolkuitiskej.

⁵ Pero tla nochi tlajtlakojli yejuan tikchiuaj kiteititia ika Dios yolmelajki, ¿uelis tikijtoskej ika Dios xkuajli kichiua pampa techcastigaroua? (Ijkin kijtouaj on tlaltikpaktlakamej itechkopa Dios.)

⁶ ¡Melauak tej ika ka! Tla Dios xkuajli kichiuaskia ijkuak techcastigaroua, ¿kenijki tej, ueliskia kintlajtlakolmakaskia on tlaltikpaktlakamej?

⁷ Pero tla xnikchiua on tlen nikijtoua, niman ijkon oksekimej ueli kajsikamatij ika Dios nochipa kichiua tlen kijtoua niman ijkon kiselia más ueyilislti, ¿tline* nechtlajtlakolmaka ken sen tlajtlakolej?

⁸ Tla para ijkon, ¿tline tej, xnikchiua on tlen xkuajli para Dios más ma kiseli on ueyilistli? Sekimej xikan kuajli inyojlo nechteneuiliaj kitl ijkon nitemachtia. Dios ma kintlajtlakolmaka ken kitocaroua.

Nochimej tikpiyaj tlajtlakojli

⁹ ¿Man aman tlinon? ¿Tejuamej hebreos* más tiuejueyixtokej ixpan Dios xken on yejuan xhebreos*? ¡Melauak tej, ika ka! Nejua yonikteititij ika nochi tlakatl tlajtlakouaj, on hebreos* niman on yejuan xhebreos*.

¹⁰ Ipan on Yektlajkuilojli ijkin tlajkuilolnestikaj: Nion siquiera se tlakatl xnemi yejuan yolmelajki ixpan Dios.

¹¹ Xnemi yejuan kajsikamati iojui Dios; xnemi yejuan kineki kitejtemos Dios.

¹² Nochimej on tlakamej okitlalkauijkej Dios; nochimej sanenkaj nemij. Nion se xkichiua on tlen kuajli.

¹³ Inkamak molonki ken on tlalkontli yejuan kitentlapouaj. Ikan intlajtol* kijtouaj on tlen ika tlakajkayauaj. Niman intlajtol* kipiya ken itlaj iaskayo* yejuan ika teijtlakouaj ken on kouatl kichiua ijkuak tekua.

¹⁴ Nochi on tlauijuikaltilistli niman tlauejli hasta inkamak yonomat.

¹⁵ Yejuamej sa kimachixtokej akinon uelis kimiktiskej.

¹⁶ Yejuamej nochi kixoxotoniaj, niman tetlajyouiltiaj nochiuiyan kampa yauij.

¹⁷ Xnouikaj inuan oksekimej ikan yolseuilistli.

¹⁸ Yejuamej xkaman kimakasij Dios.

¹⁹ Tikmatstokej ika nochi tlen kijtoua on amamoxtli* de itlanauatiluan Moisés, kinmijlia on yejuan ipan nouikaj on tlanauatiltin. Ijkon kinmijlia para nochi tlakatl maka sa kipiyas tlinon ika notlamis para nopaleuis ixpan Dios, yej ika onkaj Dios kinyolkuitis niman kintlajtlakolmakas.

²⁰ Yejua ika tej, Dios xakaj kiselis ken yolchipauak pampa kichiua on tlen tlanauatia on tlanauatijli. Yej, xmatikan ika on tlanauatijli techpaleuiya san para techmachistia ika titlajtlakolejkej.

Tikseliaj on yolchipaualistli itechkopa totlaneltok

²¹ Aman, Dios yotechpanextilij kenijki ueli techselia ken tiyolchipajkej, pero xpampa tla tiktlakamatij on tlanauatijli. Ijkon kimelajkaijtoua itlanauatiluan Moisés niman intlajkuilolamauan on tiotlajtojkej.

²² Dios kinselia on tlakamej ken yolchipajkej ipampa intlaneltok yejuan kipiyaj itech JesuCristo. Ijkon Dios kichiua para nochimej yejuan kineltokaj Cristo, pampa yejua xkinchikoita on hebreos* inuan on yejuan xhebreos*.

²³ Nochi tlakatl ouets ipan tlajtlakojli, yejua ika okipolojkej on yolchipaualistli niman ueyilistli yejuan Dios kinekiya ma kipiyakan.

²⁴ Pero itechkopa iueyitetlajsojtlalis* yejuan xkintocarouaya kiseliskej yejuan okintlayokolij, Dios kijtoua ika nochi totlajtlakoluan yokimpopoloj itechkopa JesuCristo.

²⁵ Dios okitlalij Cristo ken se uentli. Yejua okitoyau iyesyo para kimpopolouilia intlajtlakol on tlakamej ijkuak kineltokaj. Ijkin tej, kiteititia ika yejua yolmelajki pampa xokichiuilij cuenta on tlajtlakojli yejuan okichijkej ijkuak xe mikiya Cristo.

²⁶ Aman ipan in tonaltin kiteititia ika yejua yolmelajki niman kinmijlia yejuan kineltokaj Cristo ika nochi intlajtlakoluan yokimpopoloj.

²⁷ ¿Kanon tej, onkaj on toueyimatilis ika titoteneuaj tikuajkualtin? Toueyimatilis opopoliu. ¿Tline opopoliu? Opopoliu pampa xotiuelkej otikchijkej on tlen tlanauatia on tlanauatijli niman ika otikneltokakej JesuCristo.

²⁸ Ijkon tej, tikitaj ika Dios kiselia sen tlakatl pampa kijtoua ika nochi itlajtlakoluan okimpopoloj ijkuak okineltokak Cristo, niman xpampa tla kichiua tlen tlanauatia on tlanauatijli.

²⁹ ¿Tlen Dios san iminDios on hebreos*? ¿Tlen xno iminDios on yejuan xhebreos*? Melauak tej, ika on yejuan xhebreos* no yejua iminDios

³⁰ pampa xnemi más de sen Dios. Dios kijtoua ika nochi intlajtlakoluan on hebreos* yokimpopoloj ipampa intlaneltok niman on xhebreos* no ijki yokimpopoloj intlajtlalokan ipampa intlaneltok.

³¹ ¿In kijtosneki ika tikauaj ken xitlaj* kijtosneki on tlanauatijli? ¡Melauak tej ika ka! Yej tikpantlantiaj ika on tlanauatijli ueyi kijtosneki.