San Mateo 3 - El Nuevo Testamento

Juan on tlakuatekijketl otemachtij ipan xalpatlajkan

¹ Ipan on tonaltin, Juan on yejuan tlakuatekijketl, ouajlaj ipan ixalpatlajkan Judea, niman okinmachtij on tlakamej yejuan itech oualajkej.

² Ijkin kiminmachtiaya: —Xkajkauakan ika nenkichiuaj on tlen xkuajli, pampa ye uajlau on tonaltin ijkuak Dios tlamandaros nikan ken tlamandaroua ne iluikak.

³ On tiotlajtojketl Isaías otlajkuiloj itechkopa Juan ijkuak ijkin okijkuiloj: Yakaj nemi ne kampa xalpatlajkan niman ijkin chikauak kijtoua: “Xyektlalikan nemoyojlo pampa ye uajlau toTEKO. Xmelauakan nemonemilis ijkon ken on tlakamej kuejkueltlaliaj, niman kimejmelauaj se ojtli ijkuak uajlau sen tlakatl yejuan ueyixtikaj.”

⁴ Juan notlakentiaya ikan tlakentli* yejuan tlachijchijtli ikan itsojmiyo camello, niman kitlaliaya ilpikatl tlachijchijtli ikan kuetlaxtli. Yejua kinkuaya on chapolimej, niman no koniya on kojnekutli.

⁵ Uajlayaj kuajkakiyaj miyekej on chanejkej de on ueyikalpan Jerusalén, niman on yejuan chantiyaj nochiuiyan Judea, niman neka nisiu itech on río Jordán.

⁶ Yejuamej noyolkuitiayaj de intlajtlakoluan, niman Juan kinkuatekiaya ipan on río Jordán.

⁷ Pero ijkuak Juan okitak ika miyekej fariseos* niman saduceos uajlayaj para nokuatekiskej, okinmijlij: —¡Tekoneuan intech kouamej*! ¿Akinon omechijlij ika uelis nenmomanauiskej de on castigo yejuan uajlau?

⁸ Kuajli xmouikakan para kuajli nenkiteititiskej ika melauak yonenkajkajkej nenkichiuaj on tlen xkuajli.

⁹ Niman maka xnemilikan tla xitlaj* uelis nochiuas nemotech san pampa nenteuejkakoneuan itech Abraham. Nejua nemechijlia ika hasta in temej Dios uelis kinkuepas teuejkakoneuan itech Abraham.

¹⁰ Nemejuamej nenijkonmej ken on kojtin* yejuan xtlakij. Nochi kojtli* yejuan xtlakis kitsontekiskej niman kitlatiskej. Yejua ika, xmotakan sano nemejuamej, pampa on hacha ye onkaj listo para kintekis hasta ipan inneluayouan on kojtin* yejuan xtlakij.

¹¹ Melauak nejua nemechkuatekiya ikan atl para nenkiteititiaj ika yonenkajkajkej nenkichiuaj on tlen xkuajli, pero on yejuan nechajtoka kipiya más poder xken nejua, niman nejua xnechmelaua* nion achijtsin para nikakkixtis. Yejua tej, mechkuatekis ikan Espíritu Santo niman ikan tlitl.

¹² Yejua ye ipan ima kipiya on itlapipitsal para yejua ika kajkauis on trigo niman kixelos itech on itlajsojlo. Kejeuas on trigo ipan on kueskontli, pero on itlajsojlo kitlatis ipan on tlitl yejuan xkaman seuis.

Juan okikuatekij Jesús

¹³ Ipan on tonaltin Jesús okis ne Galilea niman ouajlaj itech on río Jordán para Juan okuatekij.

¹⁴ Pero Juan xkinekiya kuatekis Jesús, niman okijlij: —Nejua nechtocaroua tinechkuatekis, ¿niman yej tejua otiuajlaj para ma nimitskuateki?

¹⁵ Pero Jesús okijlij: —Xkaua para aman ijki ma nochiua, pampa ijki noneki tikchiuaskej nochi tlen Dios tlanauatia. Kemaj, Juan okikuatekij.

¹⁶ Kemaj ijkuak Jesús yonokuatekij, okis itech on atl. Kemaj on, nimantsin on iluikak otlapou, niman yejua okitak iEspíritu Dios uajtemouaya ken itlaj paloma niman onotlalijtejkok ipan.

¹⁷ Kemaj okakistik sen tlajtojli ne iluikak yejuan okijtoj: —In yejua notlajsojkaKonetsin yejuan ipampa nipaktikaj.