San Mateo 27 - El Nuevo Testamento

Jesús okuikakej ixpan Pilato

¹ Ijkuak yotlanes, nochimej intlayekankauan on tiopixkej niman on ueuetkej tlayekankej intech hebreos* okinojlijkej kenijki kimiktiskej Jesús.

² Kemaj ijkuak yokisalojkej Jesús, okuikakej niman okitemaktilitoj itech on gobernador Poncio Pilato.

Judas onomiktij

³ Ijkuak Judas, on yejuan okitemaktilij Jesús, okitak ika Jesús yokitlajtlakoltijkej para mikis, onoyolpatlak niman on 30 tomin de plata okinkuepilij intlayekankauan on tiopixkej niman on ueuetkej tlayekankej.

⁴ Okinmijlij: —Nejua yonitlajtlakoj pampa yoniktemaktilij sen tlakatl yolchipauak para ma kimiktikan. Pero yejuamej okijlijkej: —Niman aman, ¿tlinon totekiu* tejuamej? ¡On, tejua ompa xkontili ken tikchiuas!

⁵ Ijkuakon Judas okonxinij on tomin ne ijtik on ueyitiopan, niman kemaj oyaj onokechmiktito.

⁶ Intlayekankauan on tiopixkej okajkokukej on tomin, niman okijtojkej: —On tlanauatijli xtechkauilia tiktlaliskej in tomin ne ipan on caja kampa nejeua on uentomin, pampa in yejua ika okitlaxtlajkej imikilis sen tlakatl.

⁷ Kemaj san sekan onotlajtolmakakej para ika on tomin kouaskej sen tlajli, yejuan itoka Alfarero, kampa kintokaskej on yejuan xchanejkej.

⁸ Yejua ika, hasta aman ipan in tonaltin, on tlajli itoka Yestlajli.

⁹ Niman ijki onocumpliroj on tlen okijtojka on tiotlajtojketl Jeremías: “Okitilankej 30 tomin de plata ijkon ken sekimej hebreos* okijtojkej kitlaxtlauaskej inemilis Jesús.

¹⁰ Niman ika on tomin okojkej on tlajli yejuan okitokayotijkej Alfarero niman ijkon nochi onocumpliroj ken toTEKO onechnauatij.”

Pilato tlamach okitlajtoltij Jesús

¹¹ Jesús ijkatikatka ixpan on gobernador. Niman on gobernador okitlajtoltij: —¿Tejua tiinRey on hebreos*? Jesús okinankilij: —Kemaj. Ijki ken tejua tikijtoua.

¹² Pero ijkuak intlayekankauan on tiopixkej niman on ueuetkej tlayekankej kiteixpanuiyayaj, Jesús xitlaj* ika otenankilij.

¹³ Niman on Pilato okijlij: —¿Xtikaki nochi on tlen ika mitsteixpanuiyaj?

¹⁴ Pero Jesús xitlaj* ika okinankilij nion se tlajtojli. Yejua ika on gobernador otlamojkaitak, niman xkimatiya tlinon kinemilis.

Pilato okitekauilij ma kimiktikan Jesús

¹⁵ Cada xipan ipan on iluitl itoka Pascua*, on gobernador kinmakauiliani on tlakamej sen tlakatl yejuan tsakutikaj yejuan yejuamej kitlajtlanij.

¹⁶ Niman ipan on tonaltin nemiya sen tlakatl tsakutikatka itoka Barrabás yejuan nochi tlakatl kixmatiya ika xkuajli tlakatl.

¹⁷ Chika on tlakamej onosentlalijkej, Pilato okintlajtoltij: —¿Akinon nenkinekij ma nemechmakauili: Barrabás, noso Jesús, on yejuan no itoka Cristo?

¹⁸ Yejua ijkon okintlajtoltij pampa okimat ika intlayekankauan on tiopixkej san ikan innexikol okimaktilijkej Jesús.

¹⁹ No ijki, ijkuak Pilato yeuatikatka ne ipan on silla kampa kintlajtlakolmaka on yejuan xkuajkualtin tlakamej, isiuau otlanauatij ijkin ma kijlitij: “Maka itlaj ika timokalaktis tikchiuilis on yolchipauak tlakatl, pampa in tlayoua sanoyej* temojtij oniktemik san ipampa.”

²⁰ Pero intlayekankauan on tiopixkej niman on tlajtlajmatkej okinyolchikajkej on tlakamej para ma tlajtlanikan ma kimakauakan Barrabás, niman Jesús ma kimiktikan.

²¹ On gobernador oksejpa okinnots, niman okintlajtoltij: —¿Katlejua de in omemej nenkinekij ma nikmakaua? Niman yejuamej okijtojkej: —¡Xmakaua Barrabás!

²² Pilato okintlajtoltij: —¿Niman tlinon nikchiuas iuan Jesús, yejuan no itoka Cristo? Nochimej okijtojkej: —¡Xkajkopilo ipan kojnepanojli* para ma miki!

²³ Kemaj Pilato okinmijlij: —¿Tlinon tej, xkuajli okichiu? Pero yejuamej más chikauak oksejpa otsajtsikej: —¡Xajkopilo para ma miki!

²⁴ Ijkuak Pilato okitak ika xuelis kimanauis Jesús, yej más najkomanayaj on tlakamej, otlanauatij ma kuilitij atl. Niman kemaj onomajtekij imixpan nochimej on tlakamej, niman okinmijlij: —Nejua xnikpiyas tlajtlakojli tla mikis in yolchipauak tlakatl. Ompa xkitilikan.

²⁵ Niman nochimej on tlakamej okijtojkej: —¡Tejuamej niman tokoneuan topan ma uetsi on tlajtlakojli ipampa on imikilis!

²⁶ Kemaj Pilato okimakau Barrabás, niman otlanauatij ma kitlatsuitekikan Jesús, niman okitemakak para ma kajkopilokan.

²⁷ Kemaj isoldados on gobernador okuikakej Jesús ne ipan palacio, niman nochi on kech soldado ompa nemiya okiyejyeualojkej.

²⁸ Kemaj Jesús okixtilijkej itlaken, niman okitlaliltijkej se tlakentli* morado.

²⁹ Niman no okimaniltijkej sen uitscorona, niman okimakuitijkej sen akatl ipan iyekma. Kemaj ixpan notlakuantelketsayaj niman ika uetskayaj. Kijliayaj: —¡Kuajli xnemi tejua iminRey on hebreos*!

³⁰ No ijki kichijchayaj, niman kuiliayaj on kojtli* yejuan okimakuitijkaj, niman ika kimailiayaj ipan itsontekon.

³¹ Ijkuak ika yonauiltijkej, okixtilijkej on tlakentli* morado, niman okitlaliltijkej itlaken. Niman kemaj okuikakej para okajkopilotoj ipan on kojnepanojli.

Jesús okajkopilojkej ipan kojnepanojli

³² Ijkuak kistiayaj ipan on ueyikalpan, okinamikkej sen tlakatl itoka Simón yejuan chanej katka Cirene. Niman on soldados okichiualtijkej para ma kiktili on kojnepanojli.

³³ Niman ijkuak oajsikej ne kampa itoka Gólgota, yejuan kijtosneki “Mikatsontekomatlan”,

³⁴ Jesús okimakakej sen tlanelojli de vino iuan on chichik itoka hiel. Pero ijkuak yejua okimat, xokinek okonik.

³⁵ Ijkuak yokajkopilojkej, on soldados onotlatlankej para kitaskej cada se tlinon kiktis de on itlaken Jesús. Ijki onochiu ken okijtoka on tiotlajtojketl: “Onotlatlankej ikan suertes para okimatkej akinon itech nokauas notlaken.”

³⁶ Kemaj onotlajtlalijkej itech Jesús para ocuidarojkej.

³⁷ Niman ne ipan on kojnepanojli* kampa ikuapan ika Jesús, okijkuilojkej ipan sen placa tline* okimiktijkej. Niman on tlajkuilojli kijtouaya: “In yejua Jesús, iminRey on hebreos*.”

³⁸ No ijki, iuan Jesús okinmajkopilojkej impan kojnepanoltin omemej tlachtekej. Se okajkopilojkej iyekmakopa niman okse iopochmakopa.

³⁹ Niman on yejuan ompa kipanauiyayaj kuijuikaltiayaj, niman nokuauiuixouayaj, pampa sa ika nauiltiayaj.

⁴⁰ Niman kijliayaj: —Tejua yejuan tikxoxotonis iueyitiopan Dios niman ipan yeyi tonajli oksejpa tlamis tikchijchiuas, xmomakixti sano tejua. Tla melauak tiiKoneu Dios, xuajtemo ipan on kojnepanojli.

⁴¹ Niman intlayekankauan on tiopixkej niman on temachtijkej ikan tlanauatijli, inuan on fariseos* niman on ueuetkej tlayekankej no ijki ika uetskayaj, niman yejuamej kinojliayaj:

⁴² —Oksekimej okinmakixtij, pero sano yejua xueli nomakixtia. Tla melauak yejua inRey on hebreos*, ma uajtemo ne ipan on kojnepanojli* niman tikneltokaskej.

⁴³ Yejua yokitlalij iyojlo itech Dios. Aman tej, ma Dios kimakixti tla melauak kitlajsojtla*, pampa yejua okijtoj: “Nejua niiKoneu Dios.”

⁴⁴ Niman hasta on tlachtekkej yejuan no okinmajkopilokej impan kojnepanoltin kuijuikaltiayaj Jesús.

Jesús omik

⁴⁵ Kemaj ijkuak oajsik tlakualispan, otlayouatiak nochiuiyan, niman tlayouatok katka hasta ijki oajsik ipan yeyi hora ika tiotlak.

⁴⁶ Niman sano ipan on hora, Jesús chikauak otsajtsik: —Elí, Elí, ¿lama sabactani? —yejuan kijtosneki: noDios, noDios, ¿tline tinechtlalkauiya?

⁴⁷ Sekimej yejuan ompa nemiyaj okakkej, niman ijkin okijtojkej: —Yejua in tlakatl kinotsa on tiotlajtojketl Elías.

⁴⁸ Kemaj nimantsin semej yejuamej onotlalojtikis, okuito on ken itlaj tlakentli* momoxtik itoka esponja, niman okipolaktij ipan vinagre. Kemaj okitlalij ikuapan sen akatl niman okontlalij itech iten Jesús para ma kipachichina.

⁴⁹ Pero on oksekimej okijlijkej: —Ma tikonchakan. Tikitaskej tla uajlas Elías niman kimakixtis.

⁵⁰ Kemaj Jesús oksejpa otsajtsik chikauak, niman kemaj omik.

⁵¹ Kemaj nimantsin on yekcortina yejuan pilkaya ijtik on ueyitiopan ouajtlajkotsayan* de tlakpak hasta tlatsintlan. No otlalolin niman on temej otlajtlapankej.

⁵² On tlalkontin otlapojkej, niman miyekej on mikatsitsimej yejuan yolchipajkej katkaj itech Dios oyolijkej*.

⁵³ Niman ijkuak Jesús oyoliu niman onoketsteu, on yolchipajkej itech Dios okiskej ijtik intlalkon, niman oyajkej ne ipan on yektitikaj ueyikalpan itoka Jerusalén kampa miyek tlakatl okintak.

⁵⁴ Ijkuak on soldadojtlayekanki inuan isoldados yejuan ompa cuidarouayaj Jesús, okimatkej tlalolintikaj niman okitakej okseki tlajtlamach* nochijtikaj, sanoyej onomojtijkej, niman okijtojkej: —In tlakatl melauak iKoneu katka Dios.

⁵⁵ San uejkatsin nemiyaj miyekej siuamej yejuan konitstikatkaj. Yejuamej iuan ouajlakej Jesús desde Galilea hasta Jerusalén para kipaleuiyayaj.

⁵⁶ María yejuan ualeua ne ipan on ueyikalpan itoka Magdala, María on yejuan iminnanaj Santiago niman José, niman iminnanaj on ikoneuan Zebedeo ompa nemiyaj inuan oksekimej.

Okitôkakej Jesús

⁵⁷ Ijkuak ye nisiu para tlayouas, ouajlaj sen tlakatl rico itoka José. Yejuan ualeuaya ipan on kalpan itoka Arimatea. Yejua no inomachtijkau katka Jesús.

⁵⁸ Oyaj itech Pilato, niman okitlajtlanilij itlalnakayo Jesús. Niman Pilato otlanauatij ma kimakakan.

⁵⁹ José okitemoltij itlalnakayo Jesús, niman okitejkuix ikan sen tlakentli* istak niman chipauak yejuan patioj.

⁶⁰ Kemaj okauato ipan on tlalkontli yenkuik yejuan iyaxka. On tlalkontli okichijchijka ipan sen techinantli. Niman kemaj okimimilojtiaj sen tetl sanoyej ueyi para okitentsaku. Niman ijkuak yokitentsaku on tlalkontli, oyaj.

⁶¹ Niman María yejuan ualeua Magdala iuan on okse María, onokajkej niman onotlajtlalijkej ixpan on tlalkontli.

Pilato okinnauatij on soldados ma cuidarokan on itlalkon Jesús

⁶² Uajmostla, ipan on tonajli sábado, intlayekankauan on tiopixkej niman on fariseos* oyajkej, okitatoj Pilato,

⁶³ niman okijlijkej: —Señor, tejuamej otikelnamikej ika ijkuak on tlakajkayajketl sanken* nemiya, okijtoj ika ipan yeyi tonajli youliuis* niman noketsteuas ipan itlalkon.

⁶⁴ Yejua ika, tejuamej tiknekij xtlanauati kuajli ma cuidarokan on tlalkontli hasta ma ajsi on yeyi tonajli. Tlamo inomachtijkauan* kualichtekiskej itlalnakayo ijkuak tlayoua, niman kemaj kimijliskej on tlakamej: “Aman yoyoliu* niman yonokuiteu ipan itlalkon.” Tla ijkon más temojtij yes on tlakajkayaualistli xken ijkuak okijtoj ika oksejpa yoliuis.

⁶⁵ Pilato okinmijlij: —Ompa on nenkimpiyaj keskimej soldados. Xuiyan, niman hasta kampa nenueliskej kuajli xcuidarokan on tlalkontli.

⁶⁶ Kemaj oyajkej niman okitlalilijkej sen sello ipan on tetl yejuan ika tentsakutikatka, niman kemaj ompa okinkajkej on soldados para ma cuidarokan.