San Mateo 25 - El Nuevo Testamento

Jesús okixtij sen ejemplo intechkopa on majtlaktlimej ichpokamej

¹ ’Ipan on tonajli ijkuak niuajlas, ne kampa Dios tlamandaroua no ijki yes ken on majtlaktli ichpokamej. Cada se okitkik itlauil ikan aceite niman oyajkej ne kampa konamikiskej on novio, yejuan uajlaya para nonamiktis.

² Makuijli de yejuamej xtlamatkej* katkaj, niman on okse makuijli uej kemaj tlamatkej* katkaj.

³ On yejuan xtlamatkej* katkaj ijkuak okitkikej intlauil, xokitkikej aceite para kitekiliskej on intlauil.

⁴ Pero on yejuan tlamatkej* katkaj okitkikej aceite ikan imbotella.

⁵ Niman ika on novio poliuiya para yejkos, nochimej opeu kochisnekij, niman ijki okochkej.

⁶ ’Kemaj ijkuak kanaj tlajkoiuan, okakistik sen tlajtojli: “¡Ye uajlau on novio! ¡Xnamikitij!”

⁷ Nochimej on ichpokamej otlachixkej, niman opeu kuektlaliaj intlauil.

⁸ Kemaj on makuiltimej ichpokamej xtlamatkej* okinmijlijkej on yejuan tlamatkej*: “Xtechmakakan achijtsin nemoaceite, pampa totlauiluan ye sejtokej.”

⁹ Pero on yejuan tlamatkej* ichpokamej okinnankilijkej: “Ka, pampa tla ijkon xtechaxilis para tejuamej niman para nemejuamej. Más kuajli, xuiyan kampa kinamakaj, niman xkouakan yejuan para nemejuamej.”

¹⁰ Pero chika on makuijli ichpokamej xtlamatkej* okouatoj on aceite, oyejkok on novio. Kemaj on ichpokamej yejuan kimachayaj oyajkej iuan on novio ipan on iluitl kampa nonamiktiuaj. Ijkuak yejuamej okalakkej ipan on iluitl, on tsakuijlotl* okitsakukej.

¹¹ ’Kemaj oajsikej on oksekimej ichpokamej, niman okijtojkej: “¡Señor, Señor, xtechtlatlapouili!”

¹² Pero yejua okinnankilij: “Ika tlen melauak nemechijlia nejua xnemechixmati.”

¹³ Kemaj Jesús okinmijlij: —Nemejuamej xnemikan ikan tlamachalistli*, pampa xnenkimatij on tonajli nion yejua on hora ijkuak nejua yejuan oninochiu Tlakatl niuajlas.

Jesús okixtij sen ejemplo intechkopa on yeyimej tekitkej

¹⁴ ’Nemechijlia okse ejemplo itechkopa on tonajli ijkuak niuajlas. Ijkuak niuajlas, nikchiuas ken okichiu on tlakatl yejuan, ijkuak ye yas ipan okse país, okinnots on itekitkauan niman okinmaktilij itomin para ma tekitikan ijkuak xak yes.

¹⁵ Se okimakak kanaj 50 mil pesos, okse okimakak kanaj 20 mil pesos, niman okse kanaj 10 mil pesos. Okinmakak san kech se ueli kitekitiltis. Kemaj yejua oyaj ipan okse país.

¹⁶ ’On tekitketl, yejuan okiselij 50 mil pesos, okitekitiltij on tomin, niman ijki okitlan okse 50 mil pesos.

¹⁷ Niman on yejuan okiselij 20 mil pesos sano ijki okichiu, niman no okitlan okse 20 mil pesos.

¹⁸ Pero on yejuan okiselij 10 mil pesos oyaj niman okiyanato itomin iteko ijtik tlajli.

¹⁹ ’Miyek tonaltin más sakin*, ouajlaj inteko on tekitkej, niman opeu inuan kichiua cuenta.

²⁰ Achtopa ouajlaj on yejuan okiselij 50 mil pesos, niman okititij iteko on okse 50 mil pesos yejuan okitlan. Okijlij: “Señor, otinechmakak 50 mil pesos, niman nikan tikpiya in okse 50 mil yejuan oniktlan.”

²¹ Iteko okijlij: “¡Sanoyej kuajli! Tejua tikuajli tekitketl, niman otikchiu ken oniknek. Aman ika kuajli otiktekitiltij on achijtsin, más miyek nimitstlanetis. Nouan xpiya pakilistli.”

²² Kemaj itech ouajlaj on yejuan okiselij 20 mil pesos, niman okijlij: “Señor, otinechmakak 20 mil pesos, niman nikan tikpiya in okse 20 mil pesos yejuan oniktlan.”

²³ On iteko okijlij: “¡Sanoyej kuajli! Tejua tikuajli tekitketl, niman otikchiu ken oniknek. Aman ika kuajli otiktekitiltij on achijtsin, más miyek nimitstlanetis. Nouan xpiya pakilistli.”

²⁴ Pero ijkuak oyejkok on tekitketl yejuan okiselij 10 mil pesos, okijlij on iteko: “Señor, nejua nikmatstikatka ika tejua xtiteiknelia*, niman tikmoyaxkatia* itlanka on tlen sen kitekiti.

²⁵ Yejua ika nejua oninomojtij, niman oniaj onikiyanato motomin ijtik tlajli. Pero nikan nimitsmaka on tlen otinechmakak.”

²⁶ Kemaj iteko okijlij: “Xkuajli tekitketl niman tlatsijki. Tikmatstikatka ika niknoyaxkatia itlanka on tlen sen kitekiti.

²⁷ Yejua ika, nonekiya tikalaktiskia notomin ipan banco para ijkuak nejua niuajlaskia nikseliskia on tlen noyaxka* niman on itlanka.”

²⁸ Kemaj on inminteko okinnauatij on yejuan ompa nemiyaj: “Xkuilikan on 10 mil pesos, niman xmakakan on yejuan aman kipiya cien mil pesos,

²⁹ pampa on yejuan kuajli kitekitiltia on tlen kipiya, más kimakaskej, niman on yejuan xkuajli kitekitiltia on tlen kipiya, kikuiliskej on tlen achijtsin kipiya.

³⁰ Aman in tekitketl, yejuan xitlaj* ika serviroua, xkontlajkalikan kampa tlayouatok kampa chokas niman notlantijsis.”

Jesús kinyolkuitis on tlaltikpaktlakamej

³¹ ’Ijkuak nejua yejuan oninochiu Tlakatl niuajlas ikan noueyilis inuan nochimej noángeles, ninotlalis ken rey ipan noueyixtikaj trono* para nitetlajtlakolmakas niman niteyekteneuas.

³² On tlakamej de nochiuiyan países nixpan nosentlaliskej. Kemaj on yejuan yolchipajkej nikinxelos intech on yejuan xyolchipajkej, ijkon ken on tlajpixki kinxeloua on iborreguitos itech on ichivos.

³³ On yejuan borreguitos nikintlalis ipan noyekma, niman on yejuan chivos nikintlalis ipan noopochma.

³⁴ ’Kemaj nejua nikimijlis on yejuan nikintlalis ipan noyekma: “Nemejuamej yejuan noTajtsin omechtiochiu, xuajlakan niman xkalakikan kampa nitlamandaroua ken Rey. Ompa Dios otlayektlalij para nemejuamej, desde ijkuak okichijchiu in tlaltikpaktli.

³⁵ Nemejuamej mechtocaroua nenkalakiskej, pampa nejua onapismik, niman onennechtlakualtijkej. Nejua onamik, niman onennechatlitijkej. Onikistinen ken uejka chanej, niman onennechseuijkej nemochan.

³⁶ Ijkuak xnikpiyaya notlaken, onennechmakakej. Ijkuak onikualok, onennechpaleuijkej. Niman ijkuak nitsakutikatka, onennechitatoj.”

³⁷ ’Ijkuakon on yejuan yolchipajkej nechtlajtoltiskej: “ToTEKO, ¿kamanon otimitsitakej ikan apistli niman otimitstlakualtijkej? ¿Noso kamanon otimitsitakej ikan amiktli, niman otimitsatlitijkej?

³⁸ ¿Noso kamanon otimitsitakej ken tiuejkachanej, niman otimitsseuijkej tochan, noso xtikpiyaya motlaken, niman otimitsmakakej?

³⁹ ¿Noso kamanon otimitsitakej tikualo, noso titsakutikaj niman otimitsitatoj?”

⁴⁰ Niman nejua yejuan niRey nikimijlis: “Ika tlen melauak nemechijlia ika ijkon ken onenkimpaleuijkej in nokniuan yejuan xuejueyixtokej niman mayankej, sano nejua onennechpaleuijkej.”

⁴¹ ’Kemaj nikimijlis on yejuan nemij ipan noopochma: “Xmejkuanikan notech nemejuamej yejuan Dios yomechtlajtlakolmakak. Xuiyan ne ipan on tlitl yejuan nochipa tlikuitias. On tlitl Dios okitlalij para on diablo* niman on iángeles.

⁴² Ompa tej, xuiyan pampa onapismik, niman xonennechtlakualtijkej. Onamik, niman xonennechatlitijkej.

⁴³ Onikistinen ken uejka chanej, niman xonennechseuijkej nemochan. Nejua xonikpix notlaken, niman xonennechmakakej. Nejua onikualok niman no nitsakutikatka, pero xonennechnotsatoj.”

⁴⁴ ’Ijkuakon yejuamej nechijliskej: “Señor, ¿kamanon otimitsitakej ikan apistli, noso ikan amiktli, noso ken tiuejkachanej, noso xtikpiyaya motlaken, noso tikualouaya, noso titsakutikatka niman xotimitspaleuijkej?”

⁴⁵ Niman nikimijlis: “Ika tlen melauak nemechijlia, ika ijkon ken xonenkimpaleuijkej yejuamej in nokniuan yejuan xuejueyixtokej niman mayankej, sano nejua xonennechpaleuijkej.”

⁴⁶ Ijkon tej, yejuamej in yejuan xyolchipajkej yaskej ne kampa nochipa nemiskej ipan tlajyouilistli, pero on yejuan yolchipajkej yaskej ne kampa nochipa kipiyaskej on nemilistli.