San Mateo 22 - El Nuevo Testamento

Jesús okixtij sen ejemplo itech sen iluitl yejuan nochiua ijkuak nonamiktiua

¹ Jesús oksejpa opeu kinnojnotsa ikan ejemplos, niman ijkin okinmijlij:

² —Ne kampa tlamandaroua on iluikak chanej* sano ijki ken on iluitl yejuan okichiu on rey ijkuak ononamiktij itelpoch.

³ Okintitlan on itekitkauan para ma kimanatij on yejuan itenotskauan ipan on iluitl. Pero on yejuan yokinnotskaj, xokinekkej oyajkej ipan on iluitl.

⁴ Kemaj oksejpa okintitlan oksekimej itekitkauan, niman okinmijlij: “Xkimijlikan on yejuan yotikinnotskaj ika ye listo on tlakuajli. Yokinmiktijkej nouakaxuan niman oksekimej yolkej yejuan tojtomajkej, niman nochi on tlakuajli ye onkaj listo. Ma ualajtetsikan ipan in iluitl.”

⁵ Pero on itenotskauan xokinekkej ouajlakkej. Se oyaj okintato itlaluan, niman okse oyaj otlasemanato.

⁶ Niman on oksekimej okimajsikej itekitkauan on rey niman sanoyej* okiminmajmailijkej hasta okiminmiktijkej.

⁷ Kemaj, on rey sanoyej okualan, niman okintitlan isoldados para no ma kiminmiktitij on yejuan otemiktijkej, niman para kitlatiskej on iminueyikalpan.

⁸ Kemaj okinmijlij on itekitkauan: “Nochi ye onkaj listo para on iluitl, pero on yejuan onikiminnots xkinmelaua uajtlakuaskej.

⁹ Yejua ika tej, xuiyan ipan iesquinas on calles, niman nochimej on yejuan nenkinnamikiskej xkinnotsakan ma uajuiyan ipan in iluitl.”

¹⁰ Yejua ika on tekitkej oyajkej ipan on calles, niman okinsentlalijkej nochimej on yejuan okinnextijkej. Okisentlalijkej yejuan xkuajkualtin tlakamej niman yejuan kuajkualtin tlakamej. Niman ijkon on kajli oten ikan tlanotsaltin.

¹¹ ’Kemaj on rey okalak ipan on kajli para kintas itlanotskauan. Ompa okitak sen tlakatl yejuan xonotlakentij ken noneki ijkuak yakaj nonamiktia.

¹² Niman okijlij: “Notlajsojkaikniu*, ¿kenijki ouel otikalak nikan niman xtitlakemej ken noneki notlakentiuas ipan sen iluitl ken in?” Pero yejua xonauat.

¹³ Kemaj on rey ijkin okinnauatij on yejuan tetlamakayaj: “Xmasasalokan niman xkikxisasalokan, niman xkontlajkalikan kampa tlayouatok kampa chokas niman notlantisis.”

¹⁴ Kemaj Jesús okijtoj: —Dios miyekej okinnots, pero xmiyekej on yejuan okintlapejpenij.

On fariseos* okitlajtoltijkej Jesús tla kuajli para kitlaxtlauaskej impuestos para on más ueyi tekiuaj de Roma

¹⁵ Kemaj on fariseos* oyajkej, niman san sekan okinojlijkej tlinon kichiuaskej para Jesús itlaj ma kimijli yejuan ika uelis kiteixpanuiskej.

¹⁶ Kemaj tej, on fariseos* okintitlankej itech Jesús on innomachtijkauan inuan on yejuan okipaleuijkej Herodes para ma kalaki rey. Yejuamej okijlijkej: —Temachtijketl, tikmatstokej ika nochipa tikijtoua on tlen melauak. On tlakamej kuajli tikintitia ken Dios kineki para nouikaskej. Tejua xtikchiuilia cuenta on tlen kijtouaj motechkopa on tlakamej, maski uejueyixtokej noso xuejueyixtokej.

¹⁷ Aman tej, xtechijli tlinon tiknemilia. ¿Itlanauatil Moisés techkauilia titlatlaxtlauaskej ikan impuestos itech César yejuan itekiuaj nochi on país de Roma?

¹⁸ Pero Jesús okimat ika yejuamej ijkon kitlajtoltiayaj san para kajkayauaskej. Yejua ika ijkin okinmijlij: —Omexayakyejkej, ¿tline* nennechchiualtisnekij ma nemechijli itlaj yejuan ika uelis nennechteixpanuiskej?

¹⁹ Xnechititikan on tomin yejuan ika notlaxtlaua on impuestos. Niman yejuamej okititijkej sen tomin.

²⁰ Ijkuak Jesús okitak on tomin, okintlajtoltij: —¿Akinon ixayak, niman akinon itoka in nikan tlajkuilolnestikaj ipan in tomin?

²¹ Yejuamej okijlijkej: —Ixayak on tekiuaj César. Kemaj Jesús okinmijlij: —Tla ijkon xmakakan César on tlen yejua iyaxka, niman xmakakan Dios on tlen yejua iyaxka.

²² Ijkuak yejuamej ijkon okakkej, okintlatlachaltij. Kemaj, okitlalkauijkej niman oyajkej.

On saduceos okitlajtoltijkej Jesús tla yoliskej* niman noketsteuaskej on yejuan yomikkej

²³ Sano ipan on tonajli semej saduceos okitatoj Jesús. Yejuamej temachtiayaj ika xuelis yoliskej* niman nokuiteuaskej on mikatsitsimej. Yejua ika ijkin okijlijkej:

²⁴ —Temachtijketl, Moisés okijtoj ika tla miki sen tlakatl yejuan xokipix ikoneuan, ikniu on tlakatl ika onkaj nonamiktis iuan on siuakauajli*, niman iuan tlaskaltis para on kokonej nemiskej ken ikoneuan yeskia on ikniu yejuan omik.

²⁵ Aman tej, nikan totsajlan nemiyaj chikomemej iknijtin. On achtoj teikniu ononamiktij, niman omik. Niman ika xokipix ikoneuan, on ikniu iuan ononamiktij on siuakauajli*.

²⁶ No ijki okichiu on ika ome teikniu, kemaj on ika yeyi teikniu, niman ijki onochijtiaj hasta otlankej on chikomemej iknijtin.

²⁷ Ijkuak on iknijtin nochimej yomikkej, kej yejua omik on siuatl.

²⁸ Tla ijkon tej, ijkuak yoliskej*, ¿katlejua itech tesiuau yes de on chikomemej iknijtin, pampa nochimej okipixkej ken insiuau?

²⁹ Jesús okinmijlij: —Nemejuamej nemopopolouaj, pampa xnenkimatij tlinon kijtoua on Yektlajkuilojli, nion xnenkimatij ika Dios nochi ueli kichiua.

³⁰ Tej, ijkuak on yomikkej yoliskej*, xnonamiktiskej nion on tatajtin kitemakaskej imichpochuan para ma nonamiktikan. Ijkuakon nemiskej ken iángeles Dios yejuan nemij ne iluikak.

³¹ ’Niman aman on ika yoliskej* niman noketsteuaskej on mikatsitsimej, ¿xaman onenmomachtijkej on tlen Dios okijtoj? Yejua ijkin okijtoj:

³² “Nejua niiDios Abraham, niiDios Isaac niman niiDios Jacob.” Tikmatij ika Dios xejua iminDios on yomikkej, yej yejua iminDios on yoltokej.

³³ Ijkuak on tlakamej ijkon okakkej, nochimej okintlatlachaltij on itemachtil Jesús.

Jesús okijtoj katlejua tlanauatijli más ueyixtikaj

³⁴ Ijkuak on fariseos* okimatkej ika Jesús okinkamatsaku on saduceos, san sekan onosentlalijkej, niman kej yejuamej okinisiuijkej Jesús.

³⁵ Kemaj semej yejuamej on yejuan tepantlajtojkej katkaj ikan itlanauatil Dios okinek kistlakos Jesús, niman ijkin okitlajtoltij:

³⁶ —Temachtijketl, ¿katlejua tlanauatijli más ueyixtikaj ipan on itlanauatil Moisés?

³⁷ Jesús okijlij: —“Xtlajsojtla* moTEKO Dios ikan nochi moyojlo, ikan nochi moalma niman ikan nochi motlamachilis.”

³⁸ Yejua in yejua más ueyixtikaj niman yejua yakatstikaj de nochimej on tlanauatiltin.

³⁹ Niman on ika ome tlanauatijli yejuan no ijki ueyi kijtosneki ken on achtoj tlanauatijli ijkin kijtoua: “Xkintlajsojtla oksekimej no ijki ken tejua timotlajsojtla.”

⁴⁰ Yejua in ome tlanauatijli kiktsijtikaj nochi itlanauatil Moisés niman intemachtiluan on tiotlajtojkej.

Jesús okintlajtoltij on fariseos* akinon itech teKoneu on Cristo

⁴¹ Chika on fariseos* san sekan nemiyaj, Jesús ijkin okintlajtoltij:

⁴² —¿Tlinon nenkinemiliaj nemejuamej itechkopa Cristo on yejuan Dios okitlapejpenij para temakixtis? ¿Akinon itech teuejkakoneu? Yejuamej okijlijkej: —Yejua teuejkakoneu itech David.

⁴³ Ijkuakon, Jesús okinmijlij: —¿Tline tej, on Espíritu Santo okichiualtij David para ma kijto ika Cristo “iTEKO”? David ijkin okijtoj:

⁴⁴ Dios okijlij noTEKO: “Xmotlali nikan ipan noyekma, hasta kaman ma nimitstlali tlayekanketl intech on yejuan motlauelikniuan.”

⁴⁵ Tla David ijkon okijtoj itechkopa Cristo yejua iTEKO, tla ijkon tej, ¿kenijki Cristo ueli teuejkakoneu itech David?

⁴⁶ Niman xakaj ouel okinankilij nion ikan se tlajtojli. Niman desde ipan on tonajli nochimej pinauayaj para itlaj kitlajtoltiskej.