San Mateo 18 - El Nuevo Testamento

Jesús okinmijlij inomachtijkauan* akinon más ueyixtikaj kampa tlamandaroua Dios

¹ Ipan on tonaltin on nomachtijkej* okinisiuijkej Jesús niman okitlajtoltijkej: —¿Akinon más ueyixtikaj ne kampa tlamandaroua on iluikak chanej?

² Ijkuakon, Jesús okinots sen konetl, niman okuikak ne intlajkotian.

³ Niman okijtoj: —Ika tlen melauak nemechijlia, ika tla nemotlamachilis xnopatla niman xnokuepa ken intlamachilis on kokonej, xnenkalakiskej ne kampa tlamandaroua on iluikak chanej.

⁴ Ijkon tej, on yejuan más ueyixtikaj kampa tlamandaroua on iluikak chanej, on yejuan xnoueyimati yej nouika ken in konetl.

⁵ San akinon yejuan nopampa kiselis yakaj yejuan yolyemanki* ken in konetl, nejua nechselia.

Jesús okinmijlij inomachtijkauan* para ma kipiyakan nemojtijli kichiuaskej tlajtlakojli

⁶ ’Pero san akinon yejuan kitlajkalis ipan tlajtlakojli semej yejuamej in pipitikej kokonej yejuan nechneltokaj, kiselis ueyi castigo. Más kuajli yeskia ijkuak xe kichiua on tlajtlakojli, ikechtlan kipilouiliskiaj sen tetl ueyi yejuan imetl on molino niman kontlajkaliskiaj ne ipan mar kampa más uejkatlan.

⁷ Lástima para in tlaltikpaktlakamej pampa sanoyej* onkaj tlinon tetlakalij ipan tlajtlakojli. Nochipa ijki yes, pero lastima para on tlakatl yejuan tetlakalis ipan tlajtlakojli.

⁸ ’Yejua ika tej, tla moma noso mokxi mitschiuilia titlajtlakoua, xteki niman uejka xkontlajkali. Ijkon xchiua, pampa más kuajli tinemis timatejtepoltik noso tiikxitejtepoltik, ijkuak tikalakis ne iluikak, xken tla tajsitias niman yej mitsontlajkaliskej ipan on tlitl yejuan para nochipa mitstlatis.

⁹ Niman tla mixtololoj mitschiuilia para titlajtlakoua, xkixti niman uejka xkontlajkali. Ijkon xchiua, pampa más kuajli para tikpiyas san se mixtololoj, ijkuak tikalakis ne iluikak, xken tla tajsitias niman yej mitsontlajkaliskej ipan on tlitl yejuan onkaj miktlan.

Jesús okixtij sen ejemplo itech sen borreguito yejuan opolijka

¹⁰ ’Xkintlajsojtlakan niman xkintlakaitakan in konetsitsimej. Tej, nemechijlia ika ne iluikak on inángeles nochipa nemij ne ixpan on noTajtsin iluikak chanej.

¹¹ Nejua yejuan oninochiu Tlakatl oniuajlaj para onikinmakixtiko on yejuan ixpolijtokej.

¹² ’¿Ken nenkinemiliaj? ¿Tlinon kichiua sen tlakatl yejuan kipiya se ciento iborreguitos ijkuak se kipoloua? Yejua tej, kajteua on noventa y nueve ne ipan tepetl niman yau kontejtemoua on yejuan okipoloj.

¹³ Niman tla yejua kinextia, ika tlen melauak nemechijlia ika yejua más sanoyej paki iuan on sentetl borreguito yejuan okipolojka xken inuan on noventa y nueve yejuan xokimpoloj.

¹⁴ Ijkon tej, nemoTajtsin iluikak chanej* no xkineki para semej yejuamej in konetsitsimej ma poliuikan.

Jesús otemachtij ika sen tlakatl noneki kinotsas ikniu para iuan notlapojpouis

¹⁵ ’Tla mokniu mitschiuilia itlaj tlen xkuajli, xnotsa san iselti niman xkijli on tlinon xkuajli omitschiuilij. Tla kijtos ika melauak okichiu tlen xkuajli niman noyoltlalia, ijkon tiktlanis mokniu niman xtikpolos.

¹⁶ Pero tla yejua xmitstenkaki, tla ijkon, xkuika se noso ome tlakatl para nochi tlen nijtos ma kimati ome noso yeyi testigos.

¹⁷ Tla no xkineki kinkakis, tla ijkon, xkinnotsa on tlaneltokakej ipan itiopan Dios para no ma kitlakanonotsakan. Niman tla yejua xkintenkaki, tla ijkon xpiyakan, ken se yejuan xkineltoka Dios noso ken sen tlaixpachouani tlacobrarojketl ikan on impuestos para Roma.

¹⁸ ’Ika tlen melauak nemechijlia, ika on tlen nemejuamej xnenkitekauiliskej ma nochiua nikan ipan in tlaltikpaktli, Dios ne iluikak no ijki xkitekauilis ma nochiua. Niman no on tlen nemejuamej nenkitekauiliskej ma nochiua nikan ipan in tlaltikpaktli Dios ne iluikak no ijki kitekauilis ma nochiua.

¹⁹ ’No ijki nemechijlia ika tla nenomemej nikan ipan in tlaltikpaktli nemotlajtolmakaskej ikan nochi nemoyojlo para itlaj nenkitlajtlaniskej noTajtsin iluikak chanej, yejua mechmakas.

²⁰ Yejua ijkon kichiuas pampa kampa omemej noso yeyimej nopampa nosentlaliaj, nejua ompa ninemi iminuan.

Jesús okixtij sen ejemplo itech sen tekitketl yejuan xokipiyalij ijyouilistli on itekipanojkaxiu

²¹ Kemaj Pedro okinisiuij Jesús niman okijlij: —NoTEKO, ¿keskipa niktlapojpoluis nokniu yejuan nechchiuilia tlen xkuajli? ¿Hasta chikomepa niktlapojpoluis?

²² Jesús okijlij: —Nejua xnimitsijlia hasta chikomepa tiktlapojpoluis, yej hasta kampa xok uelis tikpouas.

²³ ’Yejua ika sanoyej noneki titetlapojpoluis pampa ne kampa tlamandaroua on iluikak chanej* sano ijki ken sen rey yejuan okinek kimatis on tlen kuikiliaj inuan on itekipanojkauan.

²⁴ Yejua on rey ye pejtikatka kiselia on tlen kuikiliaj ijkuak okuikilijkej sen itekipanojkau yejuan kuikiliaya miyek millones de pesos.

²⁵ Pero on itekipanojkau xkipiyaya tlinon ika kitlaxtlauas on tlen kuikilia. Yejua ika on rey otlanauatij para ma kinamakakan ken esclavo san sekan iuan isiuau, ikoneuan niman no ma kinamakakan nochi tlen kipiya, san para notlaxtlauas on tlen kuikiliaya.

²⁶ Kemaj on itekipanojkau onotlakuantelkets ixpan on iteko niman okiknotlajtlanilij: “Señor, xnechijyouili, niman nochi nimitstlaxtlauilis tlen nimitsuikilia.”

²⁷ Iteko okiknelij*, niman okipopolouilij on tlen kuikiliaya niman okimakau.

²⁸ ’Pero ijkuak on mismo tlakatl ouajkis ompa itech iteko, okinamik sen itekipanojkaxiu yejuan kuikiliaya keski pesos tomin. Yejua nimantsin okajsik ikechtlan, opeu kokojpatska, niman ijkin kijliaya: “¡Xnechtlaxtlauili tlen tinechuikilia!”

²⁹ Kemaj on itekipanojkaxiu ixpan onotlakuantelkets niman ijkin okiknotlajtlanilij: “Xnechijyouili, niman nochi nimitstlaxtlauilis tlen nimitsuikilia.”

³⁰ Pero yejua xokinek, yej okuikak kampa tsakutias hasta kitlaxtlauilis nochi tlen kuikilia.

³¹ Ijkuak on oksekimej tekipanojkej ijkon okitakej, sanoyej onajmankej, niman oyajkej okitlajtlajtouilitoj inteko nochi tlen okitakej onochiu.

³² Kemaj on inteko okitekuitlan on itekipanojkau, niman okijlij: “¡Xkuajli tekipanojketl! Nejua onimitspopolouilij nochi kech tinechuikiliaya, pampa tejua ijki otinechiknotlajtlanilij.

³³ Ijkon ken nejua onimitsiknelij, tejua no ijki nonekiya tikikneliskia on motekipanojkaxiu.”

³⁴ Niman on rey sanoyej okualan. Yejua ika, okinnauatij on cárcejtlajpixkej ma castigarokan hasta kaman kitlaxtlauas nochi tlen kuikilia.

³⁵ Niman otlan tlajtlajtoua Jesús ika in tlajtojli: —No ijki mechchiuilis on noTajtsin iluikak chanej, tla cada se xnenkitlapojpoluiyaj nenmokniu ikan nochi nemoyojlo.