San Mateo 13 - El Nuevo Testamento

Jesús okixtij sen ejemplo itech sen tlaxinijketl

¹ Sano ipan on tonajli, Jesús okis ne ipan on kajli niman onotlalij ne itenko on mar.

² Ika sanoyej* miyek tlakatl onosentlalij ne kampa yejua nemiya, Jesús otlejkok ipan sen barco niman onotlalij, niman nochi tlakatl onokau itenko on mar.

³ Niman opeu kinmachtia miyek tlajtlamach* ikan ejemplos. Kinmijliaya: —Sen tlaxinijketl oyaj otlaxinito.

⁴ Ijkuak tlaxinijtiaya, seki xinachtli oxinito ipan ojtli, niman on totomej oualajkej niman okuajkej.

⁵ Okseki xinachtli oxinito ipan tepetlayoj kampa xmás onkaj tlajli. On xinachtli nimantsin okis, pampa xmás uejkatlan onkatka on tlajli kampa oxin.

⁶ Pero ijkuak okis on tonaltsintli, okoseu imilyo on trigo. Niman ika xuejkatlan kipiyaya ineluayo, ouak.

⁷ Okseki xinachtli oxinito intsajlan on uitskojtin. On uitskojtin saniman onoskaltijkej niman okixomiktijkej imijlo on trigo.

⁸ Pero okseki xinachtli oxin ipan on kuajli tlajli, niman okipix kuajli itlakyo. Seki xinachtli okitlakitij se ciento iteyo, okseki sesenta, niman okseki treinta.

⁹ Tla nemejuamej nenkipiyaj nemotlamachilis, xkajsikamatikan on ejemplo.

Jesús okinmijlij inomachtijkauan* tline tenojnotsa ikan ejemplos

¹⁰ Kemaj on nomachtijkej* okinisiuijkej Jesús, niman okitlajtoltijkej: —¿Tline* tikinnojnotsa on tlakamej ikan ejemplos?

¹¹ Yejua okinmijlij: —Nemejuamej Dios yomechkauilij para nenkimatiskej on tlinon iyantikatka* kenijki yejua tlamandaroua. Pero yejuamej in tlakamej xkinkauilia ma kimatikan.

¹² San akinon yejuan kajsikamati itemachtil Dios, Dios kipaleuis para más miyek kajsikamatis. Pero on yejuan xkajsikamati itemachtil Dios, kixtiliskej on tlen achijtsin kajsikamati.

¹³ Yejua ika nikinnojnotsa ikan ejemplos, pampa maski kitaj on tlen nikchiua, yejuamej xkinomakaj cuenta, niman maski kakij on tlen nikijtoua, yejuamej xkajsikamatij.

¹⁴ Ijkon tej, kuajli impan nochiua ijkon ken on tiotlajtojketl Isaías okijtoj: Nemejuamej ikan nemonakasuan nenkakiskej, pero xitlaj* nenkajsikamatiskej. Ikan nemixtololojuan nentlachaskej, pero xnenkimatiskej tlinon kijtosneki on tlen nenkitaskej.

¹⁵ Yejua in nochiua, pampa intlamachilis in tlakamej xtekiti. Yejuamej nakastsajtsakutokej niman ixtsajtsakutokej para maka tlachaskej ikan imixtololojuan, nion maka tlakakiskej ikan innakasuan, nion maka itlaj kajsikamatiskej ikan intlamachilis, nion maka nokuepaskej notechika para nejua nikinmakixtis.

¹⁶ ’Pero Dios mechtiochiua nemejuamej, pampa nentlachaj ikan nemixtololojuan, niman nenkimatij tlinon kijtosneki on tlen nenkitaj. Niman no nenkajsikamatij on tlen nenkakij nikijtoua.

¹⁷ Ika tlen melauak nemechijlia ika miyekej tiotlajtojkej niman on yejuan kuajkualtin tlakamej sanoyej okinekkej kitaskej yejua in tlen nemejuamej nenkitaj, pero xokitakej. Niman yejuamej sanoyej okinekkej kakiskej in tlen nemejuamej nenkakij, pero xokakkej.

Jesús okintlajtlajtouilij inomachtijkauan* tlinon kijtosneki iejemplo on tlaxinijketl

¹⁸ ’Xkakikan tej, on tlen kijtosneki iejemplo on tlaxinijketl.

¹⁹ On ojtli yejuan ipan oxinito keski xinachtli kijtosneki inyojlo on tlakamej yejuan kakij itlajtol Dios yejuan kinmijlia ika Dios kineki kinmandaros, niman xkajsikamatij. Yejua ika on Satanás uajlau niman kinkixtilia itlajtol Dios ipan inyojlo.

²⁰ On tlajli yejuan tepetlayoj kijtosneki inyojlo on tlakamej yejuan kuelkakij itlajtol Dios niman ikan paktli kiseliaj.

²¹ Pero in tlakamej xmás kuajli kajsikamatij on tlajtojli. Yejua ika, ijkuak impan uajlau on tlen tepajsoloj niman on tlen tetlajyouiltia ipampa itlajtol Dios, nimantsin kauaj intlaneltok.

²² On tlajli yejuan uitsyoj kijtosneki inyojlo on tlakamej yejuan kuelkakij itlajtol Dios. Pero pampa sa komatstokej kenijki nopanoltiskej niman sanoyej kinekij kipiyaskej tomin, kelkauaj itlajtol Dios. Ijkon tej, itlajtol Dios xueli kimpaleuiya yejuamej.

²³ Pero on kuajli tlajli kijtosneki inyojlo on tlakamej yejuan kuelkakij niman kajsikamatij itlajtol Dios, niman intech kisa sen kuajli tlakijlotl. Yejuamej sano ijki ken on xinachtli yejuan kitlakitiaj se ciento iteyo, niman oksekimej sesenta, niman oksekimej treinta.

Jesús okixtij sen ejemplo de on xkuajli xojtli

²⁴ Jesús no okintlalilij in okse ejemplo: —Niman ipan in tlaltikpaktli kampa Dios tlamandaroua sano ijki ken sen tlajli kampa sen tlakatl tlatôka ikan kuajli xinachtli.

²⁵ Pero ijkuak iteko on tlajli niman itekitkauan kochtikatkaj, okalakito sen itlauelikniu niman okitôkak on xkuajli planta yejuan nesi ken trigo itsajlan on trigo. Niman kemaj onejkuanij.

²⁶ Ijkuak on trigo onoskaltij niman omiyauatlapan, no ompa ones on xkuajli planta yejuan nesi ken trigo.

²⁷ Kemaj on tekitkej oualajkej itech on iteko on tlajli, niman okijlijkej: “Señor, tla yejua on xinachtli yejuan otiktôkak ne ipan on motlal kuajli katka, ¿kanon, tej, oualeu on xkuajli planta?”

²⁸ Niman iteko on tlajli okinmijlij: “Yakaj notlauelikniu okitôkak on xkuajli planta.” Kemaj itekitkauan okitlajtoltijkej: “¿Tikneki para ma tikuiuitlatij on xkuajli planta?”

²⁹ Niman yejua okinmijlij: “Ka, maka pampa ijkuak nenkuiuitlaskej on xkuajli planta, no uelis teuan nenkuiuitlaskej on trigo.

³⁰ Más kuajli xkauilikan ma iuan noskalti hasta ma chikaui on trigo. Niman ijkuak yochikau, nikinnauatis on pixkakej achtopa ma kisentlalikan on xkuajli planta niman ma kisalokan ikan manojos para tlatlas. Niman kemaj nikinnauatis ma kisentlalikan on trigo niman ma kitlalikan ipan nokueskon.”

Jesús okixtij sen ejemplo itech iteyo on mostaza

³¹ Jesús no okintlalilij in okse ejemplo: —On tlakamej yejuan Dios kinmandaroua ipan in tlaltikpaktli miyekixtiuij sano ijki ken iteyo mostaza ijkuak sen tlakatl yokitôkak ipan itlal nomayeualojtiu.

³² On melauak ika yejua más pitentsin xinachtli xken nochimej on xinachtin yejuan onokaj. Pero ijkuak noskaltia, nochiua más ueyi xken on okseki plantas ipan on tlatôkyoj. Yejua ueyiya ken itlaj ueyi kojtli*, niman hasta on totomej uajlauij itech niman notepajsoltiaj ipan imatsitsiuan.

Jesús okixtij sen ejemplo itech on tlaxokolilistli*

³³ No okintlalilij in okse ejemplo: —On tlakamej yejuan Dios kinmandaroua ipan in tlaltikpaktli ijkomej ken on tlaxokolilistli* yejuan sen siuatl kimaneloua ikan yeyi tlatemachitli harina hasta kaman nochi najkokui.

³⁴ Nochi yejua in Jesús okinmijlij on tlakamej ikan ejemplos niman xitlaj* kinmijliaya tla xikan ejemplo.

³⁵ Yejua ijkin okichiu san para onocumpliroj on tlen okijtoj on tiotlajtojketl ijkuak ijkin okijtoj: Nitenojnotsas ikan ejemplos, niman nikijtos on tlajtlamach* yejuan ichtaka* onkatka desde ijkuak Dios okichijchiu in tlaltikpaktli.

Jesús okintlajtlajtouilij inomachtijkauan* tlinon kijtosneki iejemplo on xkuajli planta

³⁶ Kemaj Jesús okintitlan ma uiyan on tolamej niman yejua okalakito ipan on kajli. Kemaj inomachtijkauan* okinisiuijkej, niman okijlijkej: —Kuajli xtechmelajkaijli iejemplo on xkuajli planta yejuan okis itsajlan on trigo.

³⁷ Kemaj, Jesús okinmijlij: —On yejuan kitôka on kuajli xinachtli, sano nejua yejuan oninochiu Tlakatl,

³⁸ niman on tlajli kampa kitôka trigo kijtosneki in tlaltikpaktli. On kuajli xinachtli kijtosneki on tlakamej yejuan tekoneuan itech Dios, niman on xkuajli planta kijtosneki on yejuan tekoneuan itech diablo*.

³⁹ Niman on tetlauelikniu yejuan okitokak on xkuajli planta kijtosneki on diablo*. On tonaltin ijkuak on pixkakej kitekij on trigo kijtosneki on tonaltin ijkuak tlatlalpoliuis, niman on pixkakej yejuan kitekij on trigo kijtosneki on ángeles.

⁴⁰ Ijkon ken on xkuajli planta kisentlaliaj niman konxiniaj ipan tlitl para tlatla, no ijki nochiuas ijkuak tlatlalpoliuis.

⁴¹ Nejua yejuan oninochiu Tlakatl nikinuajtitlanis noángeles para kinuajsentlaliskej niman kinkixtiskej intsajlan on tlakamej yejuan nikinmandaroua, nochimej on yejuan kichiuaj para oksekimej ma tlajtlakokan, niman on yejuan kichiuaj on tlen xkuajli.

⁴² Niman kominxiniskej ne tliko kampa yejuamej sanoyej chokaskej niman notlantijsiskej.

⁴³ Ijkuakon, on tlakamej kuajkualtin petlaniskej ken on tonaltsintli ne kampa inTajtsin tlamandaroua. Tla nemejuamej nenkipiyaj nemotlamachilis, xkajsikamatikan in ejemplo.

Jesús okixtij sen ejemplo itech sen tesoro yejuan iyantikaj

⁴⁴ ’Sen tlakatl yejuan kinokauilia Dios ma kimandaro, nesi ken sen tlakatl yejuan okinextij sen tesoro ipan sen tlajli kampa iyantikatka. Ijkuak okinextij on tesoro, oksejpa ompa okiyan. Niman ikan pakilistli oyaj ichan, niman okinamakato nochi tlen kipiya. Kemaj okou on tlajli kampa okinextij on tesoro.

Jesús okixtij sen ejemplo itech on perla*

⁴⁵ ’Sen tlakatl yejuan kineki kalakis kampa Dios tlamandaroua, no ijki ken sen tlakatl yejuan kitejtemojtinemi on perlas yejuan sanoyej kualtsitsimej.

⁴⁶ Niman ijkuak kinextia se yejuan sanoyej patioj, yau ichan, niman kinamaka nochi tlen kipiya, niman koua on perla.

Jesús okixtij sen ejemplo itech on matlatl

⁴⁷ ’Kampa Dios iluikak chanej* tlamandaroua, no ijki ken sen matlatl yejuan konchapaniaj ipan mar niman kisentlalia miyek sesentlamantikej michimej.

⁴⁸ Ijkuak temi on matlatl, on michajsikej kixtiaj ne itenko on mar, niman ompa notlaliaj para kintlapejpeniaj on michimej. Yejuamej kejeuaj ipan chikiutin on yejuan kuajkualtin, niman kinxiniaj on yejuan xkuajkualtin.

⁴⁹ Ijkon nochiuas ijkuak tlatlalpoliuis. On ángeles kisaskej para kinxeloskej on yejuan xkuajkualtin tlakamej intech on yejuan kuajkualtin tlakamej.

⁵⁰ Niman kominxiniskej yejuan xkuajkualtin tlakamej ne tliko kampa sanoyej chokaskej niman notlantisiskej.

On yenkuik temachtijli niman on yejuan xenkuik temachtijli

⁵¹ Kemaj Jesús okintlajtoltij: —¿Nochi nenkajsikamatij yejua in? Yejuamej okijtojkej: —Kemaj, toTEKO.

⁵² Kemaj okinmijlij: —Ijkuak sen temachtijketl ika on tlanauatijli nomachtia ken Dios tlamandaroua, ueli kitemachtia on yenkuik temachtilistli niman on yejuan xenkuik. Yejua tej, sano ijki ken iteko sen kajli yejuan kimati kenijki kixtia tlajtlamach* yejuan yenkuik niman yejuan xenkuik de on tlen kipiya ipan on bodega.

On chanejkej ne Nazaret xokiselijkej Jesús

⁵³ Ijkuak Jesús otlan kiteijlia in ejemplos, onejkuani ompa.

⁵⁴ Ijkuak oajsik Nazaret kampa ikalpan, opeu temachtia ipan insinagogas* on hebreos*. Yejuamej oometlamatkej* niman okualankatlanemilijkej. Yejua ika kijtouayaj: —¿Kanon ouelito in tlakatl on tlamatkilistli*? ¿Kenijki ueli kichiua in milagros?

⁵⁵ ¿Tline in xejua ikoneu on kojxinki, niman xejua inanaj María? ¿Tlen xejua iminikniu Santiago, José, Simón niman Judas yejuan nikan totsajlan chantij?

⁵⁶ ¿Niman nochimej ikniuan yejuan siuamej xno nikan totsajlan chantij? Yejua ika, ¿kanon ouelito ika kichiua nochi in tlajtlamach*?

⁵⁷ Niman yejuamej okualankej itechkopa Jesús. Pero yejua okinmijlij: —Sen tiotlajtojketl nochiuiyan kitlakaitaj, pero ipan ikalpan niman itsajlan ifamilia xkitlakaitaj.

⁵⁸ Niman ompa xokichiu miyek milagros, pampa yejuamej xkineltokayaj.