San Marcos 8 - El Nuevo Testamento

Jesús okitlakualtij naui mil tlakatl

¹ Okse tonajli oksejpa onosentlalij miyek tlakatl. Yejuamej xkipiyayaj tlen kuaskej niman Jesús okinnots on inomachtijkauan*, niman okinmijlij:

² —Nejua nikinmiknelia* in tlakamej, pampa ye kipiya yeyi tonajli ika nikan nouan nemij niman xkipiyaj tlinon kikuaskej.

³ Tla xnikintlakualtis, yej nikinnauatis ma uiyan, ueliskej sotlauiskej ipan ojtli, niman sekimej uejka inchan.

⁴ On inomachtijkauan* okijlijkej: —Xtiueliskej tiknextiskej tlakuajli para tikintlakualtiskej nochimej in tlakamej nikan xalpatlajkan.

⁵ Yejua okintlajtoltij: —¿Keski pan nenkipiyaj? Yejuamej okijlijkej: —Chikome.

⁶ Kemaj Jesús otlanauatij para on tlakamej ma notlajtlalikan ipan tlajli. Kemaj okontilan on chikome pan, niman okimakak tlaxtlauijli Dios. Kemaj okitlatlapan, niman okinxelouilij on inomachtijkauan* para ma kinxelouilikan on tlakamej. Niman okinxelouilijkej nochi on kech ika tojlan.

⁷ No kimpiyayaj keskimej michintsitsintin. Kemaj okimakak tlaxtlauijli Dios inpampa on michimej, niman kemaj okinmijlij on inomachtijkauan* para ma kitexelouilikan.

^8-9 Kanaj naui mil tlakatl katka, niman nochimej otlakuajkej niman kuajli oixuikej. Niman kemaj on inomachtijkauan* okisentlalijkej chikome chikiutin yejuan onokau. Niman Jesús okinnauatij on tlakamej ma uiyan.

¹⁰ Nimantsin otlejkok ipan barco inuan on inomachtijkauan*, niman oyajkej para Dalmanuta.

On fariseos* kinekiyaj kitaskej itlaj milagro

¹¹ Kemaj oualajkej on fariseos* niman opeu notenkuikuij iuan Jesús. Kitlajtlaniliayaj ma kintiti itlaj milagro yejuan ualeua ipan cielo*. Ijkin okijtojkej para okitlatlatakej.

¹² Jesús onejeltij chikauak, niman okijtoj: —¿Tline in tlakamej kitlajtlanij sen milagro? Melauak tej, nemechijlia ika xitlaj* nemechititis.

¹³ Niman kemaj okinkajteu. Yejua otlejkok ipan sen barco, niman oyaj neka okse ilado on mar.

Jesús okinmijlij inomachtijkauan* maka kichiuaskej tlen kichiuaj on fariseos*

¹⁴ On inomachtijkauan* okelkajkej para kiktiskej pan para tlakuaskej. Yej san sentetl pan okitkijkej ipan on barco.

¹⁵ Kemaj Jesús okintlachikauilij: —Kuajli xkakikan tlen nemechijlis. Xmotakan sano nemejuamej ika intlaxokolilis* on fariseos* niman itlaxokolilis on rey Herodes.

¹⁶ Kemaj on inomachtijkauan* opeu ijkin kinotlajtoltiaj: —Yejua otechijlij in pampa xtikpiyaj pan.

¹⁷ Jesús okimat tlen kijtouayaj, niman okinmijlij: —¿Tline* nenkijtouaj xnenkipiyaj pan? ¿Xnenkajsikamatij? ¿Tlen nemotlamachilis sanoyej chikauak?

¹⁸ ¿Nemejuamej xnentlachaj ikan nemixtololojuan, nion xnentlakakij ikan nemonakasuan? ¿Tlen xnenkelnamikij?

¹⁹ ¿Ijkuak oniktlatlapan on makuijli pan, niman kemaj onikintlakualtij on makuijli mil tlakatl, keski chikiutin de tlatlajkotsitsin onenkisentlalijkej yejuan onokau? Niman yejuamej okijtojkej: —Majtlaktli uan ome.

²⁰ Kemaj Jesús okintlajtoltij inomachtijkauan*: —¿Niman ijkuak oniktlatlapan on chikome pan, niman kemaj onikintlakualtij on naui mil tlakatl, keski chikiutin de tlatlajkotsitsin onenkisentlalijkej yejuan onokau? Niman yejuamej okijtojkej: —Chikome.

²¹ Kemaj okinmijlij: —¿Man hasta aman xnenkajsikamatij?

Jesús okipajtij sen ciego ne Betsaida

²² Kemaj oajsikej Betsaida, niman okuajuikilijkej sen tlakatl yejuan ciego katka. On tlakamej okiknotlajtlanilijkej Jesús para ma kimatoka.

²³ Kemaj Jesús okontilan ipan ima, niman okuikak neka kaltenko. Niman ijkuak okitlalilij ikualak ipan ixtololojuan, okintlalij imauan ipan, niman kemaj okitlajtoltij: —¿Ye tiueli tikita itlaj?

²⁴ On tlakatl okintlapoj ixtolouan, niman okijlij: —Nikinta on tlakamej, pero nesij ken kojtin* yeuan nejnemij.

²⁵ Kemaj oksejpa Jesús okintlalij imauan ipan ixtololojuan on tlakatl. Niman kemaj on tlakatl sa sentlachixtikatka, niman kemaj nochi kuajli okitak.

²⁶ Jesús okititlan ichan niman okijlij: —Maka sa timokuepas ipan on kalpan kampa onimitskixtij, niman maka itlaj xteijli.

Pedro okijtoj ika Jesús yejua melauak Cristo

²⁷ Jesús niman inomachtijkauan* oyajkej ipan on kalpanmej de iregión Cesarea de Filipo. Neka ipan ojtli okintlajtoltij on inomachtijkauan*: —On tlakamej, ¿ken kijtouaj akin nejua?

²⁸ Okijlijkej: —Sekimej kijtouaj ika tejua tiJuan on tlakuatekijketl, oksekimej kijtouaj ika tejua tiElías, niman oksekimej kijtoua ika tejua tiyakaj okse tiotlajtojketl.

²⁹ Kemaj Jesús okintlajtoltij on inomachtijkauan*: —Niman nemejuamej, ¿ken nenkijtouaj akin nejua? Pedro okinankijlij: —Tejua tiCristo, yejuan Dios okitlapejpenij para tlamandaros.

³⁰ Kemaj Jesús okinnauatij para maka yakaj ma kijlijkan ika yejua Cristo.

Jesús kijtoua ika yejua tlajyouis niman mikis

³¹ Kemaj Jesús opeu kinmijlia ika yejua akin onochiu Tlakatl kijyouis miyek tlajtlamach*. On ueuetkej tlayekankej, niman intlayekankauan on tiopixkej niman on temachtijkej ikan itlanauatil Dios, xkiseliskej. No okinmijlij ika noneki kimiktiskej, pero ipan yeyi tonajli yoliuis*, niman nokuiteuas ipan itlalkon.

³² Nochi okinmelajkaijlij ika ijki nochiuas. Kemaj Pedro okuikak Jesús oksekan niman opeu kajua.

³³ Pero Jesús ouajnokuep, niman okomintak on oksekimej inomachtijkauan*, niman ijkin okajuak Pedro: —¡Xmejkuani nikan Satanás! Tejua tinechteltisneki para maka ma nikchiua on tlen Dios kineki. Tejua xtiknemilia ken Dios, yej tiknemilia ken on tlakamej.

³⁴ Kemaj Jesús okominnots on tojlamej niman on inomachtijkauan*, niman okinmijlij: —Tla yakaj kineki nouan yas, ma kelkaua nochi on tlen más kintlasojtla, ma nemi listo para tlajyouis noso mikis nopampa, niman kemaj ma uajla nouan.

³⁵ Yejua in nemechijlia pampa yejuan kinekis kimakixtis inemilis ipan in tlaltikpaktli, kipolos ialma, pero yejuan san nopampa niman ipampa on kuajli tlajtojli yejuan kiteijlia ken Dios temakixtia kipolos inemilis ipan in tlaltikpaktli, yejua kiselis nemilistli para ialma.

³⁶ ¿Tlinon ika kipaleuis sen tlakatl tla yejua kinoyaxkatis* nochi tlen onkaj ipan in tlaltikpaktli niman kipolos ialma?

³⁷ Xitlaj tej ika kipaleuis, pampa xitlaj* onkaj yejuan sen tlakatl uelis ika kitlaxtlauas ialma.

³⁸ Tla yakaj imixpan on tlajtlakolejkej noka pinaua niman ika pinaua on tlen niktemachtia, nejua yejuan oninochiu Tlakatl no ika nipinauas ijkuak niuajlas ikan iueyilis noTatajtsin niman inuan on yolchipajkej ángeles.