San Marcos 7 - El Nuevo Testamento

Jesús okijtoj on tlen kijtlakoua sen tlakatl

¹ Se tonajli sekimej fariseos* niman sekimej temachtijkej ikan itlanauatil Dios oualejkej Jerusalén, niman onosentlalijkej itech Jesús.

² Ijkuak nemiyaj iuan Jesús, yejuamej okitakej ika sekimej inomachtijkauan* Jesús tlakuayaj, maski xnomajtekiyayaj ken on inuejkatajuan tlanauatiayaj.

³ (On fariseos* niman nochimej on hebreos* xtlakuaj, tla xachtoj nomajtekiyaj ken on inuejkatauan tlanauatiayaj.

⁴ In sen ejemplo. Ijkuak uajnokuepaj ne tiankisko*, achtoj nomajtekiyaj ken inuejkatauan tlanauatiayaj para kichiuaskej, niman kemaj tlakuayaj. Niman kipiyayaj okseki miyek tlanauatijli no ijki kitlakamatiyaj, ijkon kenon kimpajpakayaj on kontsitsintin, on tazas niman on teposkontin.)

⁵ Kemaj on fariseos* niman on temachtijkej ikan itlanauatil Dios okitlajtoltijkej Jesús: —¿Tline* monomachtijkauan xnomajtekiyaj ijkon ken tlanauatiaj on touejkatajuan?

⁶ Jesús okinnankilij: —Kuajli okijtoj nemotechkopa on tiotlajtojketl Isaías nemejuamej omexayakyejkej, ijkuak okijkuiloj ken Dios okijtoj: In tlakamej nechtlakaitaj san ika inkamak, pero xnechtlakaitaj ikan inyojlo.

⁷ Sanenkaj nechmauistiliaj, pampa yejuamej kitemachtiaj on tlanauatiltin yejuan on tlakamej okitlalijkej ken itlanauatiluan yeskia Dios.

⁸ Kemaj Jesús okinmijlij: —Xnenkitlakamatij on tlinon Dios omechnauatij, pero nenkitlakamatij on tlinon touejkatajuan otemachtijkaj. Niman no ijki nenkichiuaj okseki miyek tlajtlamach*.

⁹ Niman no okinmijlij: —Nemokajkayauaj niman nentekajkayauaj, ika nenkipatlaj itlanauatil Dios para nentemachtiaj ken nemejuamej nemouikaj.

¹⁰ Por ejemplo, Moisés otlanauatij: “Xtlakaita motataj niman monanaj.” Niman no okijtoj: “Yejuan itlaj xkuajli kiteneuilis itataj noso inanaj, ma kimiktikan.”

¹¹ Pero nemejuamej nenkijtouaj ika sen tlakatl uelis kijlis itataj noso inanaj: “Xuelis nimitspaleuis ika on tlen mitspoloua pampa in Corbán.” (Corbán kijtosneki on tlinon nikpiya yonikmaktilij Dios.)

¹² Ijkon xnenkauiliaj ma kipaleui itataj noso inanaj.

¹³ Ijkon tej, nemejuamej nenkichiuaj ken xitlaj* kijtosneki itlanauatil Dios, pampa nemouikaj ipan on costumbres yejuan on nemouejkatajuan tlanauatiyayaj. Niman nenkichiuaj sano ijki miyek tlajtlamach*.

¹⁴ Kemaj Jesús okinnots nochimej on ompa nemiyaj, niman okinmijlij: —Xkakikan nemochimej* niman xkajsikamatikan.

¹⁵ On tlen kalaki ikamak sen tlakatl xejua kijtlakoua, pero on yejuan kisa ipan iyojlo, on kemaj yejua kijtlakoua.

¹⁶ Tla nemejuamej nenkipiyaj nemotlamachilis, xkajsikamatikan on tlen onikijtoj.

¹⁷ Kemaj ijkuak Jesús okinkajteu on tlakamej niman okalakito ipan techan, inomachtijkauan* okitlajtoltijkej para ma kimijli tlinon kijtosneki on ejemplo.

¹⁸ Jesús okinnankilij: —¿Nemejuamej no xnenkajsikamatij on tlinon onikijtoj? ¿Xnenkajsikamatij ika nochi tlen kalaki ipan ikamak sen tlakatl xejua kijtlakoua?

¹⁹ Xejua kijtlakoua pampa on tlinon kikua xkalaki ipan iyojlo, yej kalaki ijtik ikuitlaxkol, niman kemaj kisa ipan itlalnakayo. Ijkon okijtoj pampa nochi kech tlakuajli onkaj chipauak niman kuajli para nokuas.

²⁰ Niman no okijtoj: —On yejuan kisa ipan iyojlo sen tlakatl, on kemaj kijtlakoua,

²¹ pampa ipan inyojlo on tlakamej kisa on xkuajkualtin tlamachilistin, siuapapatlalistli, tlakapapatlalistli, on auilnemilistli, temiktilistli,

²² tlachtekilistli, on tlen xkuajli eleuilistli*, tlakajkayaualistli, xtetlakamatilistli, nexikolistli, tetlajtolketsteualistli, noueyimatilistli, tojtonyotl niman nochi tlamach tlen xkuajli nochiua.

²³ Nochi in tlen xkuajli, kisa ipan iyojlo sen tlakatl, niman yejua ika nijtlakoua.

Sen siuatl yejuan ualeua Sirofenicia okineltokak Jesús

²⁴ Kemaj okis ompa, niman oyaj ipan on ome uejueyikalpanmej Tiro niman Sidón. Kemaj okalak ipan sen kajli, niman xkinekiya para ma kimatikan on tlakamej tla ompa nemi, pero yejuamej okimatkej.

²⁵ Sen siuatl yejuan ichpoch kipiyaya sen xkuajli espíritu, ijkuak okimat ika Jesús ompa nemiya, nimantsin oyaj itech niman ixpan onotlakuantelkets.

²⁶ On siuatl griega katka yejuan otlakat Sirofenicia. Okiajmankatlajtlanilij Jesús para ma kixtili ichpoch on xkuajli espíritu.

²⁷ Pero Jesús okijlij: —Achtoj ma nikimpaleui nokniuan hebreos* pampa tejua xtihebrea. Tla nimitspaleuis, sano ijki ken nikmakaskia sen chichi* intlakual on ikoneuan Dios.

²⁸ Pero on siuatl okijlij: —On melauak, noTEKO, pero on chichimej yejuan nemij itsintlan on mesa, kikuaj on tlaxkalteinki yejuan uajxini de on mesa.

²⁹ Jesús okijlij: —Ijki ma nochiua. Xuiya moyolika. On xkuajli espíritu yokis ne ijtik mochpoch pampa tlinon otinechijlij sanoyej* kuajli.

³⁰ On siuatl oyaj, niman ijkuak oajsik ichan, okinextijtajsik ichpoch nemi ipan itlapech, niman on xkuajli espíritu yokitlalkauij.

Jesús okipajtij sen tlakatl yejuan tsatsa katka niman nenepochtik katka

³¹ Kemaj Jesús okis ipan iueyitlalpan Tiro, niman ouajlaj ipan on ueyikalpan itoka Sidón. Kemaj yejua oyaj imanian on iueyitlalpan yejuan kipiya majtlaktli kalpanmej, niman oajsik itech on mar itoka Galilea.

³² Niman sekimej tlakamej okuajuikakej sen tlakatl yejuan tsatsa katka niman tenenepochtik katka. Niman okitlajtlanilijkej para ma kitlali ima ipan on tlakatl.

³³ Jesús okuikak neka kampa xakaj nemi, niman okinkalaktij imajpiluan ijtik inakasuan. Niman kemaj okipatsoj imajpil ikan ikualak, niman okiktsilij inenepil on tlakatl.

³⁴ Kemaj onajkotlachix ne iluikak, niman kemaj onejeltij, niman okijtoj: —¡Efatá! —yejuan kijtosneki: ¡Xtlapouikan!

³⁵ Kemaj nimantsin on tlakatl otlakak. No ijki ouajnomajmakau isasaliyan inenepil, niman ouel otlajtoj kuajli.

³⁶ Kemaj Jesús okinnauatij on tlakamej: —Maka yakaj nenkijliskej on tlinon onikchiu. Pero maski kinnauatiaya para maka yakaj kijliskej, más kiteijliayaj.

³⁷ Nochimej sanoyej tlapakaitayaj, niman kijtouayaj: —¡Nochi ueli kichiua sanoyej kuajli hasta on tsatsamej ueli kintlakakitia, niman on nenepochmej kinchiuilia para kuajli ma tlajtokan!