San Marcos 6 - El Nuevo Testamento

Jesús nemiya Nazaret

¹ Kemaj Jesús okis niman oyaj ipan on kalpan kampa onoskaltij. Niman on inomachtijkauan* oyajkej iuan.

² Ijkuak oajsik on sábado, opeu temachtia ipan insinagoga* on hebreos*. Niman miyek tlakatl okikak, niman okintlatlachaltij. Kemaj okijtojkej: —¿Hasta kanon ouelito nochi in tlen kijtoua?, niman ¿akinon okimakak in tlamatkilistli* niman kenijki kichiua in milagros?

³ ¿Tlen xejua kojxinki yejuan ikoneu María? ¿Xejua ikniu Santiago, niman José, niman Judas niman Simón? ¿Xnikan ipan in kalpan chantij on ikniuan yejuan siuamej? Niman sanoyej okipinauismatkej niman okualankej itechkopa.

⁴ Pero Jesús okinmijlij: —Sen tiotlajtojketl nochiuiyan kitlakaitaj, pero ipan ikalpan niman intech on ken kinta* niman ifamilia xkitlakaitaj.

⁵ Xouel okichiu ompa itlaj milagro. Yej san keskimej kokoxkej impan okintlalij imauan, niman okimpajtij.

⁶ Jesús sanoyej* okitlatlachaltij pampa yejuamej xkineltokayaj. Niman Jesús panotiaya nochiuiyan ipan on kalpanmej, niman temachtijtiaya.

Jesús okintitlan inomachtijkauan* para ma temachtitij

⁷ Niman kemaj okinsentlalij on majtlaktli uan ome inomachtijkauan*, niman opeu kintijtitlani ojomemej. Niman yejua okinmakak poder para ma kintekixtilikan on xkuajkualtin espíritus.

⁸ Niman okinnauatij maka itlaj kitkiskej para ipan ojtli yej san intopil*. Okimijlij para maka kitkiskej imbolsa, nion tlaxkajli, nion tomin,

⁹ yej san ma kiktikan inkak niman intlaken yejuan kitlalijtiaskej.

¹⁰ Kemaj okinmijlij: —Ijkuak nenmajsiskej ipan sen kalpan, xmokauakan ipan sen kajli hasta nenkisaskej ipan on kalpan.

¹¹ Tla nenmajsiskej ipan sen kalpan kampa xmechseliskej, nion mechkakiskej, xtsejtselokan nemokxi on tlalteutli ijkuak nenkisaskej. Melauak tej, nemechijlia ika ijkuak Dios kiyolkuitis niman kitlajtlakolmakas on kalpan, más tlajyouis xken Sodoma niman Gomorra.

¹² Kemaj yejuamej okiskej, niman oyajkej. Kinmachtijtiayaj on tlakamej para ma noyolpatlakan.

¹³ No okinkixtijkej miyekej xkuajkualtin espíritus, niman okintlalilijkej aceite ipan miyekej on kokoxkej, niman okimpatijkej.

Ijkin okimiktijkej Juan on tlakuatekijketl

¹⁴ On rey Herodes okak ika sanoyej kiteneuayaj Jesús pampa itoka nochiuiyan yokixmatkaj. Sekimej kijtouayaj: —Jesús ueli kichiua on milagros* pampa melauak yejua Juan yejuan Dios yokiyolitij* niman yokuiteu intsajlan on mikatsitsimej.

¹⁵ Pero sekimej kijtouayaj: —Yejua on tiotlajtojketl Elías. Niman oksekimej kijtouayaj: —Yejua sen tiotlajtojketl noso yakaj semej on achtoj tiotlajtojkej.

¹⁶ Pero ijkuak Herodes okak, okijtoj: —In yejua Juan on tlakuatekijketl yejuan onitlanauatij para okechtsontekkej. Aman yonoyolitij* niman yonokuiteu intsajlan on mikatsitsimej.

¹⁷ Ijkon okijtoj Herodes pampa yejua otlanauatijka para ma kajsikan Juan, niman okisalojkej ikan teposcadena ne kampa tsakutikatka. Ijkon okichiu para okipaktij Herodías. In Herodías, isiuau katka Felipe on ikniu Herodes, pero Herodes okikuilij para okinosiuatij.

¹⁸ Herodes okitsaku Juan pampa yejua kijliaya Herodes: —Itlanauatil Dios xmitskauilia tikpiyas isiuau mokniu ken mosiuau.

¹⁹ Herodías sanoyej kitlauelitaya Juan, niman kinekiya kimiktis, pero yejua xueliya

²⁰ pampa Herodes kitlakaitaya Juan, niman kimatstikatka ika yejua kuajli tlakatl yejuan yolchipauak. Yejua ika, Herodes kimanauiyaya. Ijkuak Herodes kontaya, sanoyej kuelkakiya maski xok kimatiya tlen kichiuas.

²¹ Kemaj oyejkok on tonajli yejuan kuajli katka para Herodías. Ijkuak Herodes okichiu iluitl pampa iluiu katka, okinnots on tekiuajkej, niman on soldadojtlayekankej niman on uejueyixtokej ne Galilea.

²² Niman ichpoch Herodías okalak kampa tlakualo, niman onijtotij. On rey Herodes niman itenotskauan sanoyej okuelitakej. Yejua ika Herodes okijlij on ichpochtli: —Xnechtlajtlanili nochi san tlinon tiknekis, niman nimitsmakas.

²³ Niman no okijlij: —Ikan notlajtol nimitsijlia: “Nochi tlinon tinechtlajtlanis nimitsmakas, maski hasta tlajkotipan in kampa nejua nitlamandaroua.”

²⁴ On ichpochtli okis niman okitlajtoltito inanaj. —¿Tlinon niktlajtlanilis? Niman yejua okinankijlij: —Xtlajtlanili itsontekon Juan on tlakuatekijketl.

²⁵ Niman kemaj nimantsin on ichpochtli oksejpa okalakito. Okitlajtlanito on rey niman ijkin okijlij: —Nikneki xnechmaka amantsin ipan sen plato itsontekon Juan on tlakuatekijketl.

²⁶ Niman kemaj on rey Herodes sanoyej onajman. Pero pampa yejua yonotlajtolmakaka, niman impampa itenotskauan yejuan inuan tlakua, on rey okichiu ken yokijtojka.

²⁷ Nimantsin on rey okititlan sen isoldado, niman okinauatij para ma kuajki itsontekon Juan ipan sen plato. On soldado oyaj, niman okechtsontekito Juan ne kampa tsakutikatka,

²⁸ niman okuajkik itsontekon ipan sen plato. Yejua okimakak on ichpochtli, niman on ichpochtli okimakak inanaj.

²⁹ Ijkuak on inomachtijkauan* Juan okimatkej ika yomik Juan, oualajkej niman okiktikej imikatlalnakayo. Kemaj okitokatoj ipan sen tlalkontli.

Jesús okitlakualtij makuijli mil tlakatl

³⁰ Kemaj on apóstoles onosentlalijkej iuan Jesús, niman okitlajtlajtouilijkej nochi tlinon okichijkej, niman tlinon otemachtijkej.

³¹ Yayaj niman uajlayaj tojlamej, niman Jesús iuan iapóstoles nion xkipiyayaj tiempo para tlakuaskej. Yejua ika, Jesús okinmijlij on apóstoles: —Xuajuiyan, tiauij neka kampaka xakaj nemi, niman ompa tiueliskej titoseuiskej achijtsin.

³² Kemaj oyajkej ipan sen barco kampa xakaj nemi.

³³ Pero ijkuak oyajkej, miyekej okintakej, niman okinmixmatkej. Kemaj on tlakamej ipan nochiuiyan kalpanmej kampaka san nisiu onotlajtlalojkej*, niman oajsikej más achtoj, niman on barco oajsik más sakin*.

³⁴ Ijkuak Jesús ouajkis ipan on barco, okitak sanoyej yotojlantik. Yejua sanoyej okinmiknelij, pampa nemiyaj ken itlaj borregos yejuan xkipiyaj intlajpixkau. Kemaj Jesús opeu kinmachtia miyek tlajtlamach*.

³⁵ Ijkuak más ye tiotlak, on inomachtijkauan* okijlijkej: —Nanika xakaj chanti, niman ye tiotlaktitikaj.

³⁶ Xkintitlani para ma uiyan neka ipan on kalpantsitsimej niman tlatlaluis kampaka chajchantiua para ma kouakan itlaj para kikuaskej.

³⁷ Pero yejua okinmijlij: —Nemejuamej xkintlakualtikan. Niman okijlijkej: —¿Tikneki ma tiuiyan, niman ma tikouatij pan? Sen tlakatl noneki tekitis kanaj chikueyi metstli para uelis kouas on pan para nochimej in tojlamej.

³⁸ Jesús okintlajtoltij: —¿Keski pan nenkipiyaj? Xuiyan, niman xkitakan keski nenkipiyaj. Niman kemaj ijkuak okimatkej, okijlijkej: —Tikpiyaj makuijli pan niman ome michimej.

³⁹ Kemaj Jesús okinnauatij ma notlajtlalikan ojonkua* ipan on sakatl.

⁴⁰ Niman kemaj onotlajtlalijkej ojonkuaj sejse ciento niman tlatlajko ciento.

⁴¹ Kemaj ijkuak Jesús okontilan on makuijli pan niman on ome michin, oajkotlachix ne iluikak niman okimakak tlaxtlauijli Dios para on tlakuajli. Niman kemaj okitlatlapan on pan, niman okinmakak inomachtijkauan* para ma kinxelouilikan on tlakamej. No okitexelouilijkej on ome michin.

⁴² Nochimej otlakuajkej, niman kuajli oixuikej.

⁴³ Niman kemaj ika on tlatlajkotsitsin tlen onokau, okitemiltijkej majtlaktli uan ome chikiutin.

⁴⁴ Niman on yejuan otlakuajkej makuijli mil tlakamej katkaj.

Jesús onejnen ixko on mar

⁴⁵ Kemaj Jesús nimantsin okinnauatij on inomachtijkauan* para ma kalakikan ipan on barco, niman ma yakatstiakan ne okse ilado on mar ipan on kalpan itoka Betsaida, chika yejua kinnauatiaya on tlakamej para ma uiyan.

⁴⁶ Más sakin*, ijkuak yokintitlan on tlakamej, yejua otlejkok ipan sen tepetl, niman ompa okichiu oración.

⁴⁷ Ijkuak otlayouak, on barco yaya itlajkotian on mar, niman Jesús nemiya iselti ne ipan on tlajli.

⁴⁸ Jesús okitak ika on inomachtijkauan* yosiaukej ika kinejnemitiayaj on barco pampa on ajakatl kimixnamikiya. Niman kanaj ipan yeyi hora ika kualkan, yejua nejnentiaya ne ixko on mar hasta ijki oajsik ne kampa nemiyaj on inomachtijkauan*. Yejua ye kimpanauijtiaya.

⁴⁹ Pero ijkuak on nomachtijkej* okitakej nejnentiu ne ixko on mar, yejuamej kuitiayaj se xkuajli tlamojtiloni. Yejuamej chikauak otsajtsikej,

⁵⁰ pampa nochimej okitakej, niman sanoyej onomojtijkej. Kemaj nimantsin Jesús okinmijlij: —¡Xmoyolchikauakan niman maka xmomojtikan! Nejua niJesús.

⁵¹ Kemaj otlejkok ipan on barco, niman kemaj onoteltij on ika chikauak ajakaya. On inomachtijkauan* sanoyej otlamojkaitakej.

⁵² Yejuamej, maski yokitakaj tlinon yokichijka ikan on pan niman on michinmej, hasta aman xkajsikamatiyaj on milagro yejuan Jesús okichiu pampa sanoyej yoltechikajkej katkaj.

Jesús otepajtij ipan iueyitlalpan Genesaret

⁵³ Niman ijkuak okipanauijkej on mar, oajsikej ipan on tlajli itoka Genesaret kampa okisalotoj imbarco.

⁵⁴ Ijkuak yejuamej okiskej ipan on barco, on tojlamej nimantsin okixmatkej Jesús.

⁵⁵ Kemaj nimantsin oyajkej nochiuiyan ompaka nijnisiu, niman okinuajuikakej on inkokoxkauan ipan kojtlapechtin hasta kampa nemiya Jesús.

⁵⁶ Nochiuiyan kampa kalakiya ipan kalpanmej, noso kalpantsitsimej, noso tlajtlaluis kampa chajchantiua, yejuamej okinkajkej inkokoxkauan ipan calles, niman kitlajtlaniliayaj Jesús para ma kinokauili ma kajxilikan on itlaken, maski san itenkotsin. Niman nochimej on yejuan okajxilijkej itlaken okimpajtij.