San Marcos 5 - El Nuevo Testamento

Jesús okixtij on xkuajli espíritu itech sen Gadareno

¹ Oajsikej ne oksekan itenko on mar ipan iueyitlalpan Gadara.

² Niman ijkuak Jesús ouajkis ipan on barco, okinamikiko sen tlakatl yejuan kipiyaya sen xkuajli espíritu. Oualeu neka ijtik ostomej kampa kintôkayaj mikatsitsimej.

³ Yejua ompaka ichan katka. Niman xakaj ueliya kiteltiaya, nion siquiera ikan teposcadenas.

⁴ Miyekpa kisalouayaj ikan teposcadenas niman tepostli yeualtik para kiteltiaya imauan niman ikxiuan. Pero nochipa ijkuak kitlaliliayaj, yejua kitekojkotonaya on teposcadenas, niman kinkuejkuechtiliaya on tepostin yeualtikej. Niman xakaj ueliya kiteltiaya.

⁵ Tlayoua niman tlajokaj tsajtsitinemiya, niman nokojkokouaya ikan temej imanian on ostomej kampa notôkayaj on mikatsitsimej niman ipan tepemej.

⁶ Pero ijkuak okontak Jesús uejkatsin uajlau, onotlaloj, okinamikito, niman ixpan onotlakuantelkets.

⁷ Niman okitsajtsilij chikauak: —¿Tlinon tikneki nouan Jesús, tejua tiiKoneu Dios yejuan más ueyixtikaj? Nimitsajmankatlajtlanilia ixpan Dios, maka xnechtlajyouilti.

⁸ Otsajtsik ijkon pampa Jesús okijlij: —Xkuajli espíritu, xkisa ijtik in tlakatl.

⁹ Jesús okitlajtoltij: —¿Kenijki motoka? Yejua okinankilij: —Nejua notoka Legión pampa sanoyej timiyekej.

¹⁰ Niman yejuamej on xkuajkualtin espíritus sanoyej kitlajtlaniliayaj Jesús para maka ma kinkixti ipan on región.

¹¹ Niman ompa nemiyaj miyekej pitsomej ipan on tepetl kampa tlakuajkuajtinemiyaj.

¹² Niman on xkuajkualtin espíritus sanoyej* kitlajtlaniliayaj Jesús: —Xtechtitlani intech on pitsomej niman ma tikalakikan impan.

¹³ Niman Jesús okinkauilij, niman on xkuajkualtin espíritus okiskej ipan on tlakatl, niman okalakkej impan on pitsomej. On pitsomej kanaj ome mil katka. Yejuamej ontlatlaksakej niman ne ipan sen teostotl kampa uejkatlan oxixinitoj hasta ijtik on mar. Ompa tej, nochimej oamimikkej.

¹⁴ On yejuan tlajpiyayaj ika on pitsomej, ikan inmojkayo ontlatlaksakej. Okitetlajtlajtouilitoj ne ipan on kalpanmej niman nochiuiyan ipan on tlaltin kampa tlatokalo. Niman tojlamej oyajkej para okitatoj on tlen onochiu.

¹⁵ Ijkuak oyejkokej kampa nemiya Jesús, okitakej on tlakatl yejuan ipan okiskej on xkuajkualtin espíritus. Yejua yeuatikatka, niman ye nemiya ikan itlaken, niman ye kipiyaya kuajli itlamachilis. Yejuamej onomojtijkej.

¹⁶ Niman kemaj yejuamej on yejuan okitakej kenijki onochiu, nochi okitetlajtlajtouilijkej ken onochiu itechkopa on tlakatl yejuan kimpiyaya on xkuajkualtin espíritus, niman ken onochiu ikan on pitsomej.

¹⁷ Niman yejuamej sanoyej okitlajtlanilijkej Jesús para ma nejkuani ompa ne.

¹⁸ Ijkuak Jesús oksejpa otlejkok ipan on barco, on tlakatl yejuan kimpiyaya on xkuajkualtin espíritus sanoyej okitlajtlanilij para yas iuan Jesús.

¹⁹ Pero Jesús xokauilij, yej okijlij: —Xuiya mochan, niman xkijli mofamilia nochi on uejueyi tlajtlamach* tlen Dios okichiu mopampa, niman ken omitsiknelij*.

²⁰ On tlakatl oyaj ne ipan on región yejuan kimpiya majtlaktli kalpanmej, niman nochi okitetlajtlajtouilij tlinon Jesús okichiu ipampa, niman nochimej tlamojkaitayaj.

Jesús okipajtilij ichpokatsin Jairo niman no okipajtij on siuatl yejuan yesuetsiya

²¹ Ijkuak Jesús oksejpa opanok ipan okse lado de on mar ipan on barco, onosentlalij miyek tlakatl itech. Niman yejua onokau itenko on mar.

²² Kemaj oyejkok sen tlakatl itoka Jairo. Yejua sen tlayekanketl katka ipan insinagoga* on hebreos*. Ijkuak okitak Jesús, ixpan onotlakuantelkets.

²³ Yejua okiajmankatlajtlanilij niman ijkin okijlij: —Nochpotsin ye miktikaj. Nimitstlajtlanilia sanoyej, xuiya, niman xtlaliti momauan ipan yejua para ma pajti, niman maka mikis.

²⁴ Kemaj Jesús oyaj iuan, niman miyek tlakatl iuan oyajkej. Niman sa kipitsmiktiayaj*.

²⁵ No ompa teuan yaya sen siuatl, yejuan kipiyaya matlaktli uan ome xipan ika yesuetsiya,

²⁶ maski miyekej tepajtijkej yokitominkixtilijkaj. Yejua yokitlajtlamijka nochi on tlinon kipiyaya, pero xueliya pajtiya, yej más tlanauiya.

²⁷ On siuatl okikak ika Jesús ueli tepajtia. Yejua ika yejua ouajlaj inuan on tojlamej. Okinisiuij Jesús san ikuitlapan, niman okajsik itlaken.

²⁸ Ijkon okichiu pampa kinemiliaya: “Maski tla san nikajsis itlaken, nipajtis.”

²⁹ Niman ijkuak okajsik itlaken, nimantsin xok oyesuets. On siuatl nimantsin okimat ipan itlalnakayo ika opajtik.

³⁰ Ijkuakon Jesús okimat ika itech okis poder. Yejua ika, ouajnokuep ne tetsajlan niman okitetlajtoltij: —¿Akinon okajsik notlaken?

³¹ On inomachtijkauan* okijlijkej: —Tikitstikaj ika in tlakamej mitspitsmiktiaj*. Yejua ika, ¿tline* titlajtlani akinon okajsik motlaken?

³² Pero Jesús tlatlachaya iyeualkan para kitas akinon okajsik itlaken.

³³ Kemaj, on siuatl yejuan kimatstikatka tlinon ipan yonochiu, ouajlaj itech Jesús, niman onotlakuantelkets ixpan. Yejua sanoyej nomojtiaya, niman kuekuetlakaya. Yejua okijlij nochi tlen melauak.

³⁴ Kemaj Jesús okijlij: —Nokoneu, otipajtik pampa otitlaneltokak. Xuiya ikan yolseuilistli. On kualolistli xok tikpiya.

³⁵ Jesús sanken* tlajtlajtojtikatka ijkuak oyejkotetskej sekimej tlakamej yejuan oualejkej ichan itlayekankau on sinagoga*. Niman yejuamej okijlijkej: —Mochpokatsin yomik. Maka sa más xpajsolo on temachtijketl.

³⁶ Jesús xokichiuilij cuenta tlinon okijtojkej, niman okijlij on tlayekanketl ipan on sinagoga: —Maka xmomojti, yej san xtlaneltoka melauak.

³⁷ Niman Jesús xokauilij yakaj más iuan okalak, yej san okauilij Pedro niman on omemej iknijtin Santiago niman Juan.

³⁸ Ijkuak oajsikej ne ichan on tlayekanketl ipan on sinagoga, Jesús okitak ika on tlakamej sanoyej yonajkomankej, niman ika chokayaj, niman sa ajmankatsajtsiyaj sanoyej.

³⁹ Jesús okalak, niman okinmijlij: —¿Tline nenmajkomanaj, niman nenchokaj? On siuakonetl xe miki, yej san kochtikaj.

⁴⁰ Pero yejuamej okuetskilijkej. Kemaj Jesús okinkixtij ne kiauak on yejuan ompa nemiyaj, niman okuikak san itataj niman inanaj on siuakonetl, niman yejuamej on yeyimej inomachtijkauan*. Niman okalakkej ne kampa onok on siuakonetl.

⁴¹ Kemaj okonkiktsij ima on siuakonetl, niman okijlij: —Talita, cumi —kijtosneki: Siuakonetl, xmokuiteua.

⁴² Nimantsin on siuakonetl, yejuan kipiyaya majtlaktli uan ome xipan, onokuiteu, niman kemaj opeu nejnemi. Niman on tojlamej sanoyej okintlatlachaltij.

⁴³ Pero Jesús okintlachikauilij para maka yakaj kijliskej on tlinon yejua okichiu. Kemaj Jesús otlanauatij ma kitlakualtikan on siuakonetl.