San Marcos 4 - El Nuevo Testamento

Jesús okixtij sen ejemplo de on tokaketl

¹ Oksejpa Jesús otemachtij ne itenko on mar. Pampa sanoyej* miyek tlakatl onosentlalij ompa kampa yejua nemiya, Jesús otlejkok ipan sen barco yejuan onkatka ipan on mar, niman onotlalij. On tlakamej nemiyaj atlatenko.

² Niman yejua kinmachtiaya miyek tlajtlamach* ikan ejemplos, niman ijkin kinmijliaya:

³ —Xkakikan kuajli tlinon nemechijlis. Sen tlakatl oyaj okixinito xinachtli de trigo.

⁴ Niman seki xinachtli oxinito ipan ojtli, niman on totomej ouajlajkej niman okikuajkej.

⁵ Okseki xinachtli oxinito ipan tepetlayoj kampa xmás onkaj tlajli, niman on xinachtli nimantsin oixuak, pampa xmás uejkatlan onkatkaj on tlajli kampa oxin.

⁶ Pero ijkuak okis on tonaltsintli, okoseu imijlo on trigo. Niman ika xuejkatlan kipiyaya ineluayo, ouajuak.

⁷ Niman okseki xinachtli oxinito intsajlan uitskojtin. On uitskojtin saniman onoskaltijkej niman okixomiktijkej imijlo on trigo. Yejua ika xotlak.

⁸ Pero seki xinachtli oxin ipan kuajli tlajli. Onoskaltij, niman sanoyej kuajli otlak. Seki okitlakitij 30 iteyo, niman seki 60 iteyo, niman seki se ciento iteyo.

⁹ No okinmijlij: —Tla nemejuamej nenkipiyaj nemotlamachilis, xkajsikamatikan in ejemplo.

Jesús okijtoj tline temachtia ikan ejemplos

¹⁰ Niman kemaj sakin* ijkuak Jesús sa iselti nemiya inuan on inomachtijkauan* niman sa keski tlakatl, yejuamej okitlajtlanilijkej Jesús para ma kimijli tlinon kijtosneki on ejemplos.

¹¹ Yejua okiminnankijlij: —Nemejuamej Dios yomechkauilij para nenkimatiskej on tlinon iyantikatka* de on kenijki yejua tlamandaroua. Pero on oksekimej nikinmachtia san ikan ejemplos,

¹² para maski kikakiskej on tlinon nikijtoua, niman kitaskej tlinon nikchiua, xkajsikamatiskej, para maka noyolkuepaskej niman kintlapojpoluis Dios on intlajtlakol.

Jesús okimelajkaijtoj on ejemplo de on tokaketl

¹³ Kemaj okinmijlij: —Tla xnenkajsikamatij in ejemplo, ¿kenijki nenkajsikamatiskej okseki ejemplos?

¹⁴ On tlakatl yejuan tlaxinia, on ken on yejuan kiteijlia itlajtoltsin Dios niman on xinachtli ken itlajtol Dios.

¹⁵ On ojtli kampa ouets on xinachtli sano ijki ken inyojlo sekimej tlakamej yejuan kakij itlajtol Dios. Pero nimantsin uajlau on diablo*, niman kitlalkaualtia ika on itlajtol Dios yejuan okitokakej ipan inyojlo.

¹⁶ On tlajli yejuan tepetlayoj kijtosneki inyojlo on tlakamej yejuan kuelkakij itlajtol Dios, niman ikan paktli kiseliaj on tlajtojli.

¹⁷ Pero in tlakamej xmás kuajli kajsikamatij on tlajtojli. Yejua ika ijkuak impan uajlau on tlen tepajsoloj niman kintlauelitaj niman tlajtlamach* ika kintlajyouiltiaj ipampa itlajtol Dios, nimantsin kauaj intlaneltok.

¹⁸ On tlajli yejuan uitsyoj kijtosneki inyojlo on tlakamej yejuan kuelkakij itlajtol Dios.

¹⁹ Pero pampa sa komatstokej kenijki nopanoltiskej, niman sanoyej kinekij notomintiskej, niman okseki tlajtlamach* kinejnemiliaj, kelkauaj on itlajtol Dios. Ijkon itlajtol Dios xueli kimpaleuiya yejuamej.

²⁰ Pero on kuajli tlajli kijtosneki inyojlo on tlakamej yejuan kuelkakij itlajtol Dios, niman kiseliaj, niman intech kisa sen kuajli tlakyotl. Yejuamej ken on xinachtli yejuan okitlakitij 30 iteyo, niman ken on yejuan okitlakitij 60, noso ken on yejuan okitlakitij se ciento.

Jesús okixtij sen ejemplo itech sen lámpara

²¹ No okinmijlij: —Xakaj kuajki sen tlauijli, niman kitlalia itsintlan sen chikiutli noso itsintlan tlapechtli. Yej on tlauijli kitlalia tlakpak para ijkon ma tlauilpanti kuajli.

²² No ijki, on tlen iyantikaj, machiyas ipan okse tonajli. Niman nochi on yejuan aman xakaj kimati, machiyas.

²³ Tla yakaj kipiya itlamachilis, ma kajsikamati kuajli.

²⁴ No okinmijlij: —Xnemilikan kuajli tlinon nenkikakij, pampa ika on tlen tejua tiktekitiltia para tikintlajtlakolmaka oksekimej, Dios no yejua kitekitiltis para mitstlajtlakolmakas. Niman más miyek ika mitstlajtlakolmakas.

²⁵ Tej, yejuan kipiya kajsikamatilistli, Dios kimakas más, niman on yejuan xkipiya kajsikamatilistli, Dios kixtilis hasta nochi kech kipiya.

Jesús okixtij sen ejemplo de on xinachtli ijkuak ixua

²⁶ No okijtoj Jesús: —On yejuan Dios kinmandaroua nochiuaj ken on xinachtli yejuan sen tlakatl kitôka ipan tlajli.

²⁷ Mojmostla on tlakatl kochi tlayoua niman nokuiteua kualkan. Niman on xinachtli ixua, niman kemaj noskaltia, pero yejua xkimati kenijki.

²⁸ On tlajli san iselti kiskaltia. Achtoj kisa on imilouayo, kemaj on imiyauayo, niman kemaj ixiloyo, kemaj iyeloyo, kamauak, niman kemaj sintli.

²⁹ Niman kemaj ijkuak yotlachikau, on tlakatl nimantsin kitsonteki on mijli, pampa yoyejkok on pixkilistli.

Jesús okixtij sen ejemplo de on xinachtli itoka mostaza

³⁰ No okijtoj Jesús: —¿Kenijki tlamandaroua Dios? ¿Noso tlen ejemplo tiktlaliskej de on ken tlamandaroua Dios?

³¹ Sano ijki ken sen tlakatl okitôkak iteyo on mostaza. On mostaza kipiya más pitentsin iteyo xken nochi kech xinachtli onkaj nikan ipan in tlaltikpaktli.

³² Pero ijkuak yokitôkak, noskaltia niman ueyiya más uejkapania xken nochi kech xojtli. Sanoyej nomajmatia hasta on totomej uelij ompa kichijchiuaj intepajsol ne ipan imauan kampa tlaseuayok.

³³ Kinmachtiaya on kuajli tlajtojli ikan miyek ejemplos hasta kampa ueliyaj kajsikamatiyaj.

³⁴ Yejua kinmachtiaya san ikan ejemplos niman xitlaj* kinmijliaya tla xikan ejemplo. Pero ijkuak Jesús sa iselti nemiya inuan inomachtijkauan*, yejua kinmijliaya tlinon kijtosneki on ejemplos.

Jesús okiteltij on ajakatl

³⁵ Ipan on tonajli ijkuak yotlayouak, Jesús okinmijlij on inomachtijkauan*: —Tiauij ne okse ilado in mar.

³⁶ Kemaj, ijkuak yononauatijkej inuan on tlakamej, oyajkej oksekan itenko on mar. Niman on nomachtijkej* okuikakej Jesús sano ipan on barco kampa yejua ye nemiya. Oksekimej barcos oyajkej iuan.

³⁷ Niman kemaj más achi sakin*, ouajlaj sen ajakatl sanoyej chikauak, niman on atl onkoxoniya ne ijtik on barco hasta ye polakisnekiya.

³⁸ Pero Jesús kochtiaya tlakuitlapan ika de on barco ipan sen kuejtomatl. Niman kemaj okitlachaltitoj, niman okijlijkej: —Totemachtijkau, ¿tline* yej tikochtikaj chika tejuamej ye tiamimiktokej? ¡Xtechpaleui!

³⁹ Kemaj Jesús onotelkets, okinauatij on ajakatl, niman okijlij on mar: —Xmotelti ajakatl, niman maka sa itlaj xchiua. Niman kemaj on ajakatl ouajnoteltij. Nimantsin nochi okaktiaj, niman nochi kuajli onokau.

⁴⁰ Niman kemaj okinmijlij on inomachtijkauan*: —¿Tline sanoyej nemomojtiaj? ¿Tlen, xnentlaneltokaj hasta aman?

⁴¹ Yejuamej sanoyej nomojtiayaj, niman kinojliayaj: —¿Manin akin tlakatl in ika on ajakatl niman on mar kitlakamatij?