San Marcos 16 - El Nuevo Testamento

Jesús oyoliu niman onoketsteu ipan itlalkon

¹ Ijkuak yopanok on sábado, María yejuan ualeua Magdala, María inanaj Santiago, niman Salomé okojkej ajuiyalistli para konajuiyaliskiaj itlalnakayo Jesús.

² Uelipan kualkan, ipan on tonajli domingo, oyajkej ne itech on tlalkontli kampa José okitôkato imikatlalnakayo Jesús. Ye uajkistiaya tonaltsintli.

³ Niman ijkuak xe ajsiyaj, yejuamej kinojliayaj: —¿Akinon techejkuanilis on tetl ne itenko on tlalkontli?

⁴ Pero ijkuak oajsikej, okitakej ika on tetl yejuan sanoyej ueyi yej yokejkuanijkaj.

⁵ Kemaj ijkuak okalakitoj ijtik on tlalkontli yejuan okichijchijkej ipan teostotl, okitakej iyekmakopa on tlalkontli sen telpochtli. Ompa yeuatikatka niman tejkuixtika ikan sen ueyak tlakentli* istak. Niman yejuamej sanoyej onomojtijkej.

⁶ Pero yejua okinmijlij: —Maka xmomojtikan. Nemejuamej nenkitejtemouaj Jesús on yejuan ualeua Nazaret niman okajkopilojkej ipan kojnepanojli*. Pero aman yoyoliu* niman yonokuiteu. Yejua xnikan nemi. Xkitakan nikan kampa okitlalijkaj itlalnakayo.

⁷ Aman xuiyan, niman xkinmjlikan inomachtijkauan* niman Pedro ika yejua achtoj yas yakatstias para Gallilea, niman ompa nemejuamej nenkitaskej ijkon ken omechijlij.

⁸ Kemaj nimantsin on siuamej okitlalkauijkej on tlalkontli niman sa mojkakuekuetlakatiayaj. Xakaj okijlijkej kenijki okitakej, pampa sanoyej nomojtiayaj.

Jesús okinotitij María Magdalena

⁹ On tonajli domingo ijkuak Jesús oyoliu* niman onoketsteu ipan itlalkon, Jesús okinotitij achtoj María on yejuan ualeua Magdala, on yejuan okixtilijka chikome xkuajkualtin espíritus.

¹⁰ Niman yejua oyaj, okinmachistito inomachtijkauan* Jesús, yejuan sanoyej* najmanayaj, niman chokayaj.

¹¹ Pero ijkuak okakkej ika Jesús yoyoliu* niman yonoketsteu ipan itlalkon, niman ika María okitak, yejuamej xokineltokakej.

Jesús okinnotitij omemej inomachtijkauan*

¹² Más sakin*, oksekneka okinnotitij omemej nomachtijkej* chika yejuamej yayaj ipan ojtli.

¹³ Yejuamej onokuepkej kampa nemiyaj on oksekimej, niman okinmijlijkej ika okitakej Jesús, pero no xokinneltokakej.

Jesús okinnotitij on majtlaktli uan se inomachtijkauan*

¹⁴ Más sakin* Jesús okinnotitij on majtlaktli uan se inomachtijkauan* chika tlakuajtikatkaj. Kemaj okimajuak pampa xtlaneltokayaj niman ipampa inyoltechikaualis ika yejuamej xokinneltokakej on yejuan okitakej achtoj ika oyoliu* niman onoketsteu ipan itlalkon.

¹⁵ Kemaj okinmijlij: —Xuiyan nochiuiyan imanian in tlaltikpaktli, niman xkijlikan nochi tlakatl on kuajli tlajtojli yejuan kiteijlia ken Dios temakixtia.

¹⁶ On yejuan tlaneltokas niman nokuatekis, makisas. Pero on yejuan xtlaneltokas kitlajtlakolmakaskej.

¹⁷ Niman in tlamauisoltin kichiuaskej on akin tlaneltokaskej. Kinkixtiskej on xkuajkualtin espíritus ika notoka. Tlajtoskej ikan okseki yenkuik tlajtoltin.

¹⁸ Tla kinkitskiskej kouamej, noso tla koniskej itlaj veneno, xitlaj* kinchiuilis. Kintlaliskej iminmauan impan on kokoxkej niman kimpajtiskej.

Jesús otlejkok iluikak

¹⁹ Niman kemaj ijkuak Jesús yokinnojnots, Dios okuikak ne iluikak kampa onotlalij ipan iyekmatsin.

²⁰ On nomachtijkej* opejkej tenojnotsaj niman temachtijtiayaj nochiuiyan. Niman toTEKO kimpaleuiyaya, niman itechkopa on milagros* yejuan kichiuayaj ijkuak temachtijtiayaj, kintitiaya on tlakamej ika intemachtil yejua tlen melauak.