San Marcos 11 - El Nuevo Testamento

Jesús okalak Jerusalén ken sen rey

¹ Ijkuak Jesús ye yaya para Jerusalén, oyejkok ipan on tepetl itoka Olivos kampa onkatkaj on kalpanmej intoka Betfagé niman Betania. Desde ompa okintitlan omemej inomachtijkauan*,

² niman okinmijlij: —Xuiyan ne ipan on pitentsin kalpan yejuan onkaj ne tlayakapan. Niman ijkuak nemonkalaktiaskej, nenkitaskej salijtikaj sen polokotsin* yejuan xe kaman yakaj ipan notlalia. Xtojtomakan niman xnechajuikilikan.

³ Tla yakaj mechijlia: “¿Tline* nenkitojtomaj?”, xkijlikan ika nemoTEKO kineki, pero nimantsin kuajtitlanis.

⁴ On omemej inomachtijkauan* oyajkej, niman okinextijkej on polokotsin* salijtikaj ikiauatenko sen kajli, niman kemaj okitojtonkej.

⁵ Niman on yejuan ompa nemiyaj, okintlajtoltijkej on inomachtijkauan* Jesús: —¿Tline nenkitojtomaj on polokotsin*?

⁶ On inomachtijkauan* okiteijlijkej ijkon ken okinmijlij Jesús. Niman kemaj okinkauilijkej ma kuikakan.

⁷ Niman okuajuikakej on polokotsin* itech Jesús. Kemaj yejuamej okitlalijkej intlaken ipan on polokotsin*, niman Jesús onotlalij ipan.

⁸ Niman miyekej okisojkej intlaken ipan ojtli, niman sekimej okitejtekej tlakomatli yejuan xojyo, niman okitlalijkej ipan ojtli.

⁹ On yejuan yayaj tlayakapan, niman on yejuan yayaj tlakuitlapan opeu tsajtsij: —¡Ma kiyekteneuakan Dios! ¡Ma Dios kitiochiua on yejuan okuajtitlan!

¹⁰ ¡Ma Dios kitiochiua on yejuan uajlau para kuajli techajmandaros ken ye uejkaui otlamandaroj David! ¡Ma Dios kiyekteneuakan ne iluikak!

¹¹ Niman okalak Jesús ipan on ueyikalpan Jerusalén, niman kemaj no okalak ipan on ueyitiopan. Ompa okitak nochi tlen nochiuaya. Niman pampa ye tiotlak katka, oyaj Betania inuan inomachtijkauan*.

Jesús okajuak on kojtli* yejuan xkipiyaya itlakyo

¹² Uajmostla oksejpa okiskej ne Betania, niman ne ipan ojtli Jesús oapismik.

¹³ Jesús okontak uejka sen kojtli*, itoka higuera, yejuan xojyoj katka. Yejua oyaj para okitato tla kipiya itlakijlo. Ijkuak okinisiuij, xitlaj* okinextilij itlakijlo, yej san ixojyo kipiyaya pampa ijkuakon xe tiempo katka para tlakis.

¹⁴ Kemaj okijlij on kojtli: —Maka sa kaman yakaj kikuas motlakijlo. Niman on inomachtijkauan* okakkej.

Jesús okichipau on ueyitiopan

¹⁵ Kemaj oajsikej Jerusalén niman Jesús okalakito ikiauak on ueyitiopan. Yejua opeu kinuajkixtia on yejuan ompa tlanamakayaj niman tlakouayaj. Okinxixinilij inmesas on yejuan kitepatiliayaj tomin, niman insietas on yejuan kinnamakayaj palomas.

¹⁶ Jesús xkitekauiliaya para yakaj ma kikti itlaj yejuan kinamakas ne ipan ikiauak on ueyitiopan.

¹⁷ Kemaj Jesús opeu temachtia: —Ye nenkimatstokej tlinon kijtoua in Yektlajkuilojli: “Nochan itoka yes kajli kampa nochiua oración para nochi tlakatl de nochi países”, pero nemejuamej yonenkuepkej kampa niyanaj on tlachtekkej.

¹⁸ Ijkuak on tlayekankej tiopixkej niman on temachtijkej ikan itlanuatil Dios ijkon okakkej, yejuamej opeu kitejtemouaj kenijki kimiktiskej. Yejuamej nomojtiayaj, pampa kimatiyaj ika nochi tlakatl kipakakakiya on itemachtil Jesús.

¹⁹ Ijkuak otlayouak, Jesús niman inomachtijkauan* okiskej ipan on ueyikalpan.

Jesús otemachtij de on tlaneltokalistli

²⁰ Uajmostla kualkan oyajkej, niman okitakej ika on higuera* youak hasta ipan ineluayo.

²¹ Kemaj Pedro okelnamik ken Jesús okajuak on kojtli*, niman okijlij: —Notemachtijkau, xkita on higuera* yejuan otikajuak para maka sa tlakis. Aman youak.

²² Kemaj Jesús okinmijlij: —Xtlaneltokakan itech Dios.

²³ Ika tlen melauak nemechijlia, tla san akinon kijliskia sen tepetl: “Xmejkuani nikan niman xuetsiti ipan mar”, niman xometlamatis ipan iyojlo, on tlen kijtos nochiuas.

²⁴ Yejua ika nemechijlia ika nochi on tlen nenkitlajtlanij ijkuak nenkichiua oración, xneltokakan ika nenkiseliskej, niman nenkipiyaskej.

²⁵ Niman no ijki tej, ijkuak nenkichiuaskej oración, xtlapojpoluikan on yejuan mechchiuilia tlen xkuajli, para ijkon nemoTajtsin yejuan nemi iluikak no mechtlapojpoluis ika nemotlajtlakol.

²⁶ Tla nemejuamej xnentetlapojpoluiyaj, yejua no xmechtlapojpoluis.

On tlayekankej tiopixkej okitlajtoltijkej Jesús akinon okimakak tekiuajyotl

²⁷ Kemaj oksejpa oajsikej Jerusalén. Niman chika Jesús ompaka kistinemiya ipan on ueyitiopan, okinisiuijkej intlayekankauan on tiopixkej niman on temachtijkej ikan itlanauatil Dios niman on ueuetkej tlayekankej.

²⁸ Niman okitlajtoltijkej: —¿Tlen tekiuajyotl tikpiya para tikchiua on tlajtlamach*? ¿Akinon tej, omitsmakak on tekiuajyotl ika otikinkixtij on tlanamakakej ipan on ueyitiopan?

²⁹ Kemaj Jesús okinmijlij: —Nejua no nikpiya tlen nemechtlajtoltis. Tla nennechijliskej, nejua no nemechijlis ikan tlen tekiuajyotl nikchiua in tlajtlamach*.

³⁰ Xnechijlikan, ¿akinon okuajtitlan Juan para otlakuatekij? ¿Dios okuajtitlan noso on tlakamej okuajtitlankej?

³¹ Kemaj yejuamej opejkej ijkin kinochtakatlajtlajtoltiaj: —¿Kenijki tikijliskej? Tla tikijtoskej ika Dios okuajtitlan, yejua ijkin techijlis: “Tla ijkon, ¿tline xonenkineltokakej on tlen Juan okijtoj notechkopa?”

³² Niman xuelis tikijtoskej ika on tlakamej okuajtitlankej Juan. (Yejuamej nomojtiayaj ijkon kijtoskej, pampa nochi tlakatl kijtouaya ika Juan melauak sen tiotlajtojketl katka.)

³³ Yejua ika okinankilijkej Jesús: —Xtikmatij akinon okuajtitlan. Kemaj okinmijlij: —Tla ijkon, nejua no xnemechijlis akinon onechmakak tekiuajyotl ika nikchiua in tlajtlamach*.