San Lucas 7 - El Nuevo Testamento

Jesús okipajtij itekitkau sen soldadojtlayekanki romano

¹ Ijkuak Jesús otlan okijtoj nochi in tlajtlamach* imixpan on tlakamej, oyaj Capernaúm.

² Ompa nemiya sen soldadojtlayekanki romano yejuan kipiyaya sen itekitkau niman sanoyej* kitlajsojtlaya*. On itekitau sanoyej kualouaya niman ye miktikatka.

³ Niman ijkuak on soldadojtlayekanki romano okak kiteneuaj Jesús, okinnauatij on tlajtlajmatkej tlayekankej yejuan kisayaj intsajlan on hebreos* para ma kiknotlajtlanilitij Jesús para ma kipajtiti on itekitkau.

⁴ Yejuamej okinisiuijkej Jesús niman ijkin opeu kiknotlajtlaniliaj: —Yejua in soldadojtlayekanki romano kimelaua*, niman kuajli para tikpaleuis,

⁵ pampa yejua kitlajsojtla* topaís niman yejua okichijchiu tosinagoga* ikan itomin.

⁶ Kemaj Jesús inuan oyaj. Pero ijkuak ye nisiu nemiyaj ne ichan on soldadojtlayekanki romano, yejua okinnauatij sekimej itetlajsojkaikniuan* ijkin ma kijlitij Jesús: —NoTEKO, maka xmotemati para tiuajlas pampa nejua xnechtocaroua para tikalakis nochan.

⁷ Yejua ika, nion xoniknek nejua onimitsitsato. San xuajtlanauati niman notekitkau pajtis.

⁸ Ijkon nochiuas pampa nejua no nikmati ken nikintlakamati on yejuan nechmandarouaj ijkuak itlaj nechnauatiaj, niman nejua no nikimpiya nosoldados yejuan nechtlakamatij ijkuak itlaj nikinnauatia. Ijkuak se niknauatia kanaj ma uiya, yau. Ijkuak okse nikijlis ma uajla, uajlau. Niman ijkuak on notekitkau niknauatia itlaj ma kichiua, kichiua.

⁹ Ijkuak Jesús ijkon okak, sanoyej okitlatlachaltij. Kemaj ouajnokuep niman okimixtlaloj on tlakamej yejuan kikuitlapanuijtiayaj niman okijtoj: —Ika tlen melauak nemechijlia ika nion sen hebreo* xkaman nikita sanoyej tlaneltoka ken yejua in tlakatl.

¹⁰ On yejuan okintitlankaj onokuepkej ichan on soldadojtlayekanki romano niman okinextitoj on tekitketl yopajtik.

Jesús okiyoliuitij* ikoneu sen siuakaualtsintli

¹¹ Achijtsin más sakin*, Jesús yaya ipan sen kalpan itoka Naín, niman iuan yayaj on inomachtijkauan* niman miyekej oksekimej tlakamej.

¹² Ijkuak ye kinisiuijtiayaj ikalakiyan on kalpan, okitak ika kuikayaj kontokaskej sen mikatsintli. Yejua san ika nochi katka tekoneu itech sen siuakaualtsintli*. Miyek tlakatl yejuan chanejkej ipan on kalpan uajlayaj iuan.

¹³ Ijkuak toTEKO okitak on siuakaualtsintli, okiknelij*, niman okijlij: —Maka xchoka.

¹⁴ Kemaj Jesús okinnisiuij niman okimatokak on caja, niman on yejuan kechpanojtiayaj onoteltijkej. Niman Jesús okijlij on mikatsintli: —Telpochtli, nejua nimitsijlia: ¡Xmokuiteua!

¹⁵ Kemaj on yejuan yomikka onotlalij niman opeu tlajtlajtoua, niman Jesús okimaktilij inanaj.

¹⁶ Ijkuak nochimej ijkon okitakej, onomojtijkej niman opeu kueyiliaj Dios. Ijkin kijtouayaj: —Sen ueyi tiotlajtojketl ononextij totsajlan. No kijtouayaj: —Dios youajlaj, okimpaleuiko ikoneuan.

¹⁷ Niman ipan nochi Judea niman nochiuiyan ipan on oksekimej países yejuan onokej iyeualkan, omachiyak on tlen Jesús okichiu.

Inomachtijkauan Juan okinotskej Jesús

¹⁸ Niman Juan no okimat nochi on tlen onochiu, pampa inomachtijkauan* okitlajtlajtouilijkej. Kemaj okinnots omemej inomachtijkauan*,

¹⁹ niman okintitlan itech Jesús para okitlajtoltitoj tla yejua melauak Cristo yejuan ye onkatka para uajlas, noso yej kichaskej okse.

²⁰ On yejuan okintitlan Juan, okinisiuijkej Jesús niman okijlijkej: —On tlakuatekijketl Juan, otechajtitlan para timitstlajtoltiskej tla tejua tiCristo yejuan ye onkaj para uajlas noso yej tikchaskej okse.

²¹ Sano ipan on tonaltin chika inomachtijkauan* Juan ompa nemiyaj, Jesús okimpajtij miyekej tlakamej de miyek kualolistin niman okinkixtilij on tlajyouilistin, niman ika on xkuajkualtin espíritus, niman no okinmakak tlachalistli miyekej yejuan ciegos.

²² Kemaj Jesús okinnankilij on inomachtijkauan* Juan: —Xuiyan niman xkijlikan Juan on tlen nemejuamej yonenkitakej niman yonenkakkej. Xtlajtlajtouilikan ika aman tlachaj on yejuan ciegos katkaj, niman on yejuan uilatsitsimej katkaj kistinemij, niman on yejuan palaniya innakayo pajtij, niman on yejuan tsatsamej katkaj tlakakij, niman on mikatsitsimej yoliuij* niman nokuiteuaj ipan intlalkon. Niman no xtlajtlajtouilikan ika on yejuan mayankej kakij on kuajli tlajtojli yejuan kiteijlia ken Dios temakixtia.

²³ Sanoyej tlatiochijtli yes on yejuan xkaman ometlamatis san nopampa.

²⁴ Ijkuak oyajkej on yejuan okintitlanka Juan, Jesús opeu tenojnotsa itechkopa Juan, niman okinmijlij: —¿Akinon onenkitatoj ne xalpatlajkan? ¿Onenkitatoj sen tlakatl yejuan nolinia itlamachilis ken itlaj ouatl nolinijtikaj ika on ajakatl?

²⁵ ¿Akinon tej, onenkitatoj? ¿Onenkitatoj sen tlakatl yejuan tlakempepetlaka? Nemejuamej nenkimatstokej ika on yejuan sanoyej tlakempepetlakaj niman kuelitaj nemiskej kampa pakiloyan, nemij inchan on reyes.

²⁶ Aman tej, ¿akinon onenkitatoj? ¿Onenkitatoj sen tiotlajtojketl? Kemaj, on melauak, niman yejua más ueyixtikaj xken sen tiotlajtojketl.

²⁷ Juan yejua on tenojnotsketl yejuan on Yektlajkuilojli ijkin kijteneua: Nejua niktitlanis sen tenojnotsketl moyakapan para yejua mitsyektlalilis moojui.

²⁸ Nemechijlia ika intsajlan nochimej on tlakamej, xkaman yakaj otlakat yejuan más ueyixtikaj tiotlajtojketl ken Juan on tlakuatekijketl. Pero in no melauak ika on yejuan kinokauilis ma kimandaro Dios más ueyixtias xken Juan.

²⁹ Ijkuak ijkon okakkej itemachtil Jesús itechkopa Juan, nochimej on tlakamej niman hasta on yejuan tlacobrarojkej ika impuestos okitakej ika itlajtol Dios melajki niman onokuatekijkej itech Juan.

³⁰ Pero on fariseos* niman on temachtijkej ikan itlanauatil Dios xokiselijkej itemachtil Dios, yejua ika xonokuatekijkej itech Juan.

³¹ Niman toTEKO okijtoj: —¿Tlinon ika uelis nikimixtlalos on tlakamej yejuan nemij ipan in tonaltin? ¿Ken akinomej nesij?

³² Yejuamej ijkomej ken on kokonej yejuan nauiltiaj ipan plaza niman on imincompañeros kintsajtsiliaj: “Otemechtlapichilijkej ikan akatlapitsaltin ken kintlapichiliaj ipan sen nonamiktilistli, pero nemejuamej xonemijtotijkej. Otemechkuikatlalijkej ikan kuikamej teajman yejuan kinokuikatiaj ijkuak yakaj miki niman xonenchokakkej.”

³³ Ouajlaj Juan on tlakuatekijketl yejuan nosaua niman xkoni vino, niman nemejuamej nenkijtouaj ika kipiya sen xkuajli espíritu.

³⁴ Kemaj oniuajlaj nejua yejuan oninochiu Tlakatl. Ijkuak nejua yejuan nitlakuani niman niatlini oniuajlaj, nemejuamej onenkijtojkej ika melauak nitlakuani niman ika sanoyej niatlini. Niman onenkijtojkej ika niintetlajsojkaikniu* on tlajtlakolejkej niman on yejuan tlacobrarojkej ika impuestos.

³⁵ Pero on yejuan kiselia on kuajli tlajtojli, kitaj ika itlamatkilis* Dios melauak.

Jesús nemiya ichan Simón on fariseo

³⁶ Semej yejuamej on fariseos* okinots Jesús para iuan tlakuas. Niman Jesús oyaj ichan on fariseo* niman onotlalij itech on mesa.

³⁷ Sano ipan on kalpan nemiya sen siuatl yejuan xkuajli nouikaya. Niman ijkuak yejua okimat ika Jesús oyaj otlakuato ichan on fariseo, oyaj okiktik sen botella de tetl yejuan fino. On botella tentiaya ikan aceite ajuiyak.

³⁸ Niman chika chokatikatka, onotlalij ikuitlapan Jesús nisiu ikxitlan, niman opeu kimpajpaka ikxiuan ikan ixayo. Kemaj okinuajuachilij ikan itson. No okintenkuaj* niman kemaj okintekilij on aceite ajuiyak.

³⁹ Ijkuak on fariseo* yejuan okinots Jesús, ijkon okitak, okinemilij: “Tla in tlakatl melauak tiotlajtojketl yeskia, kimatiskia akinon kimatokatikaj niman ika xkuajli nouika, pampa yejua sen tlajtlakolej.”

⁴⁰ Kemaj Jesús okijlij on fariseo: —Simón, nikpiya tlinon nimitsijlis. On fariseo* okijlij: —Temachtijketl, xnechijli.

⁴¹ Jesús okijlij: —Sen tlakatl okintlanejtij tomin omemej tlakamej. Se okitlanejtij 500 denarios*, niman okse 50.

⁴² Niman ika on omemej tlakamej xueliyaj kuepiliayaj on tomin, on yejuan okintlanejtij on tomin okintlapojpoluilij tlen kiteuikiliayaj. Aman xnechijli, ¿katlejua de on omemej más okipiyalij tetlajsojtlalistli*?

⁴³ Simón okinankjlij: —Nejua nikuitia ika on yejuan más ueyi okitlapojpoluilij on tlen kuikiliaya. Jesús okijlij: —Kuajli ken otikijtoj.

⁴⁴ Kemaj Jesús okontak on siuatl, niman okijlij Simón: —Onikalak mochan niman xotinechmakak atl para nokxiuan. Pero, ¿tikita in siuatl? Yejua okinpajpak nokxiuan ikan ixayo, niman okinuajuats ikan itson.

⁴⁵ Nion xotinechtenkuaj* ijkuak otinechtlajpaloj, pero yejua desde ijkuak nikan onikalakiko xkajtikaj ika kintenkua nokxiuan.

⁴⁶ Xotinechtlalilij aceite ipan notsontekon, pero yejua okitoyau aceite ajuiyak ipan nokxiuan.

⁴⁷ Nimitsijlia ika on miyek itlajtlakol aman yotlapojpoluilok ipampa iueyitetlajsojtlalis*. Pero on yejuan achijtsin kitlapojpoluiliaj itlajtlakol san achijtsin kiteititia itetlajsojtlalis*.

⁴⁸ Kemaj Jesús okijlij on siuatl: —Motlajtlakol nochi yotlapojpoluilok.

⁴⁹ Niman on tenotskej yejuan ompa iuan yejyeuatikatkaj opeu sano yejuamej kinojliaj: —¿Akin tlakatl in? ¿Tline* kinemilia ueli kitetlapojpoluilia tetlajtlakol?

⁵⁰ Pero Jesús okijlij on siuatl: —Aman yotimakis pampa otitlaneltokak. Xuiya ikan yolseuilistli.