San Lucas 4 - El Nuevo Testamento

On diablo* okitlatlatak Jesús

¹ Jesús okis itech on río Jordán. Niman on Espíritu Santo okiyolten Jesús niman okuikak ne kampa xalpatlajkan.

² Ne kampa xalpatlajkan onen 40 tonaltin niman on diablo* ompa okitlatlatak Jesús. Ipan on 40 tonaltin, Jesús xotlakuaj. Yejua ika sanoyej* apismikiya.

³ Niman on diablo* okijlij: —Tla melauak tiiKoneu Dios, xnauati in tetl ma nochiua tlaxkajli.

⁴ Niman Jesús okijlij: —On Yektlajkuilojli kijtoua: “Xsan ikan tlaxkajli uelis nemis sen tlakatl, yej no ikan nochi tlajtojli yejuan Dios kijtoua.”

⁵ Kemaj on diablo* okuikak ikuapan sen ueyi tepetl, niman san amanamantsin okititij nochi on países yejuan onokej ipan in tlaltikpaktli.

⁶ Niman on diablo* okijlij: —Nejua nimitsmakas nochi tekiuajyotl niman ueyilistli yejuan onkaj ipan in países. Nochi in onechmakakej, yejua ika niuelis nikmakas san akin niknekis nikmakas.

⁷ Tla nixpan timotlakuantelketsas niman tinechmauistilis, nochi in moyaxka* yes.

⁸ Pero Jesús okijlij: —Xnechtlalkaui, Satanás, pampa on Yektlajkuilojli kijtoua: “Xtlakaita moTEKO Dios, niman san yejua xtekipano.”

⁹ Kemaj on diablo* okuikak Jesús ipan on ueyikalpan Jerusalén niman okitlejkoltij ne kampa más tlakpak ipan on ueyitiopan, niman okijlij: —Tla melauak tejua tiiKoneu Dios, xonmotlajkali ne tlatsintlan,

¹⁰ pampa ipan on Yektlajkuilojli kijtoua: Dios kinnauatis iángeles ma mitspaleuikan.

¹¹ No kijtoua: Mitsajkokuiskej ikan inmauan para maka timokxikokos ikan tetl.

¹² Niman kemaj Jesús okijlij: —No kijtoua on Yektlajkuilojli: “Maka xtlatlata moTEKO Dios.”

¹³ Ijkuak on diablo* yotlan kitlatlata Jesús, okitlalkauij keski tonajli.

Jesús opeu tenojnotsa ika on kuajli tlajtojli ne Galilea

¹⁴ Kemaj Jesús onokuep para Galilea niman okipix ipoder on Espíritu Santo. Niman nochiuiyan on tlakamej okimatkej tlinon kichiuaya Jesús.

¹⁵ Yejua temachtiaya ipan on sinagogas* niman nochi tlakatl kiueyiliaya.

On chanejkej Nazaret xokiselijkej Jesús

¹⁶ Kemaj Jesús oyaj ipan on kalpan Nazaret kampa onoskaltij. Niman ipan on tonajli sábado, okalak ipan on sinagoga ijkon ken yejua nochipa kichiuaya. Ne ipan on tiopan onotelkets para okinomachtij on Yektlajkuilojli.

¹⁷ Okimakakej on amamoxtli* yejuan on tiotlajtojketl Isaías okijkuilojka. Niman ijkuak okitlapoj, okinextij on kampa tlajkuilolnestikaj:

¹⁸ On iEspíritu toTEKO nopan nemi, pampa onechkalaktij ipan notekiu para nikinmachistis on mayankej tlakamej on kuajli tlajtojli yejuan kiteijlia ken Dios temakixtia. Onechajtitlan nikimpaktis on yejuan noyolajmanaj, para nikintitis ika Dios uelis kinmanauis on yejuan Satanás yokinnoyaxkatijka, para nikiminmakas intlachalis on ciegos, niman para nikiminmanauis on yejuan tlajyouiyaj.

¹⁹ Onechajtitlan para niktemachistis ika yoyejkok on tonaltin ijkuak Dios ikan iteiknelilis* kintiochiuas on yejuan ualaskej itech.

²⁰ Ijkuak Jesús otlan nomachtia, okitsaku on amamoxtli*, okimakak on tlapaleuijketl ipan on sinagoga niman kemaj onotlalij. Niman nochimej on yejuan nemiyaj ipan on tiopan sa konitstikatkaj.

²¹ Kemaj yejua opeu ijkin kijtoua: —Amantsin nikan nemixpan onocumpliroj on tlen kijtoua in Yektlajkuilojli.

²² Niman nochimej kuajli kiteneuayaj Jesús niman pakatlachayaj ika on kualtsin tlajtojli yejuan kinmijliayaj. Pero ijkin kinotlajtoltiayaj: —¿Tlen xejua in ikoneu José?

²³ Jesús okinmijlij: —Niman nikmati ika nennechijlisnekij in tlajtojli: “Tepajtijketl, sano tejua xmopajti.” Niman no nennechijlisnekij: “On tlen otechmachistijkej ika otikchiu ne Capernaúm, no ijki xchiua nikan ipan in kalpan kampa otimoskaltij.”

²⁴ Kemaj oksejki más okijtoj: —Ika tlen melauak nemechijlia ika xakaj tiotlajtojketl kitlakaitaj niman kiseliaj kuajli ipan on kalpan kampa noskaltia.

²⁵ Nemechmelajkaijlia ika nemiyaj miyekej siuakaualtsitsimej* ipan on país Israel ijkuak Elías on tiotlajtojketl nemiya, ijkuak yeyi xipan uan tlajko xokiau niman sanoyej* onkatka apistli ipan nochi on país de Israel.

²⁶ Pero Dios xokuajtitlan Elías intech on siuakaualtsitsimej yejuan nemiyaj ne Israel, yej okuajtitlan itech sen siuakauajli* yejuan nemiya ipan on kalpan Sarepta yejuan onkaj ipan on iueyitlalpan Sidón.

²⁷ No ijki ipan on tonaltin ijkuak nemiya on tiotlajtojketl Eliseo, ne Israel nemiyaj miyekej tlakamej yejuan kipiyayaj on temojtij kualolistli itoka lepra. Pero Eliseo xokimpajtij nion se de yejuamej, yej okipajtij Naamán, yejuan chantiya Siria.

²⁸ On yejuan nemiyaj ipan on sinagoga, ijkuak ijkon okakkej ken okijtoj Jesús, sanoyej okualankej.

²⁹ Yejuamej ouajnotelketskej niman okixtijkej Jesús ipan on kalpan de Nazaret yejuan onkaj ipan sen tepetl. Kemaj okuikakej más tlakpak para kuajtlajkaliskiaj de ikuapan on teostotl.

³⁰ Pero ijkuak ompa ye kuajtlajkaliskiaj, Jesús intlajkotian ouajpanok niman oyaj.

Jesús okipajtij sen tlakatl yejuan kipiyaya sen xkuajli espíritu

³¹ Kemaj Jesús otemok ipan on kalpan itoka Capernaúm, yejuan onkaj ipan on iueyitlalpan Galilea. Niman ipan on tonajli sábado, ompa opeu kinmachtia on tlakamej.

³² Niman on tlakamej sanoyej kintlatlachaltiaya ken temachtiaya pampa yejua temachtiaya ikan itekiuajyo Dios.

³³ Ne ipan on sinagoga nemiya sen tlakatl yejuan kipiyaya sen xkuajli espíritu. Niman yejua chikauak otsajtsik:

³⁴ —¡Xtechkaua! ¿Tlinon tikchiuas touan tejuamej, Jesús nazareno? ¿Otiuajlaj para titechxoxotonis? Nejua nimitsixmati, niman nikmatstikaj ika tejua tiichipajkaKonetsin Dios.

³⁵ Jesús okajuak on xkuajli espíritu, niman okijlij: —¡Maka xnauati! ¡Xkisa ijtik on tlakatl! Kemaj on xkuajli espíritu imixpan okitlajkaltiaj on tlakatl, niman kemaj okis, pero xok itlaj okichiuilij.

³⁶ Ijkuak on tlakamej ijkon okitakej, nochimej omojmojkatlachixkej niman ijkin kinojliayaj: —¿Tlinon kipiya itlajtol on tlakatl? ¡Ikan itlajtol de tlanauatijli niman poder kinmajua on xkuajkualtin espíritus, niman yejuamej kitlakamatij!

³⁷ Niman nochiuiyan noteijliaya on tlen Jesús okichiu.

Jesús okipajtij imonan Simón Pedro niman miyekej oksekimej

³⁸ Kemaj Jesús okis ipan on sinagoga* niman okalak ichan Simón. Imonan Simón sanoyej kualouaya ikan totonalistli*, niman okitlajtlanilijkej Jesús para ma kipajti.

³⁹ Jesús onopachoj itech on siuatl niman kemaj okajuak on totonalistli* para ma kaua, niman on totonalistli* okau on siuatl. Yejua nimantsin onokuiteu niman opeu kintlakualtia.

⁴⁰ Ijkuak ye kalaktikatka tonaltsintli, nochimej on tlakamej yejuan kipiyayaj inkokoxkauan okinuajuikakej itech Jesús. On kokoxkej kipiyayaj sesekneka kualolistin, pero ipan cada se de yejuamej Jesús okitlalij imauan niman ijki okimpajtij.

⁴¹ Intech on miyekej kokoxkej no okiskej on xkuajkualtin espíritus yejuan tsajtsiyaj niman kijtouayaj: —¡Tejua tiiKoneu Dios! Pero Jesús kimajuatiaya niman xkinkauiliaya ma tlajtokan, pampa yejuamej kimatstikatkaj ika yejua Cristo.

Jesús otemachtij Galilea

⁴² Uajmostla ijkuak otlanes, Jesús okis ipan on ueyikalpan niman oyaj kampaka xakaj nemi. Niman on tlakamej kitejtemouayaj. Niman ijkuak okinextijkej, kinekiyaj kiteltiskej para maka ma nejkuani intech.

⁴³ Pero Jesús okinmijlij: —Nejua no ika onkaj nitemachtis on kuajli tlajtojli yejuan kiteijlia ken Dios temakixtia ipan on oksekimej kalpanmej, pampa yejua ika Dios onechajtitlan.

⁴⁴ Ijkon tej, temachtijtiaya Jesús ipan on sinagogas* yejuan onkatkaj ipan on iueyitlalpan Galilea.