San Lucas 22 - El Nuevo Testamento

On hebreos* tlayekankej san se ueyi onotlatolmakakej para kimiktiskej Jesús

¹ Ye nisiu katka para nochiuas on iluitl ijkuak kikuaj on pan yejuan xkipiya tlaxokolilistli*. On iluitl itoka Pascua*.

² Niman intlayekankauan on tiopixkej niman on temachtijkej ikan tlanauatijli kitejtemouiliayaj kenijki kimiktiskej Jesús, san ichtaka*, pampa kinmakajsiyaj on tlakamej.

³ Kemaj Satanás ijtik okalak Judas. Judas no itoka Iscariote, niman yejua inuan on majtlaktli uan ome nomachtijkej* tlapouajli katka.

⁴ Yejua oyaj okintato on intlayekankauan on tiopixkej niman on yejuan tlayekankej ipan on ueyitiopan para okintlajtlajtouilito kenijki uelis kinmaktilis Jesús.

⁵ Yejuamej okuelitakej, niman onotlajtolmakakej para Judas kimakaskej tomin.

⁶ Judas teuan onokalaktij, niman opeu kitejtemoua kamanon kuajli para kitemaktilis Jesús ijkuak on tlakamej xnemiskej iuan.

Jesús otlakuaj inuan inomachtijkauan* ipan on iluitl itoka Pascua*

⁷ Oyejkok on tonajli para on iluitl yejuan nochiua ijkuak kikuaj on pan yejuan xkipiya tlaxokolilistli*. Niman ipan on tonajli ika onkaj kiuentlaliaj on borreguito para kikuaj ipan on iluitl Pascua*.

⁸ Niman Jesús okititlan Pedro niman Juan, niman okinnauatij: —Xuiyan, xchijchiuatij on tlakuajli para tikuaskej ipan in iluitl Pascua*.

⁹ Yejuamej okijlijkej: —¿Kanon tikneki ma tikchijchiuatij?

¹⁰ Jesús okinmijlij: —Ijkuak nemejuamej nenkalakiskej ipan on ueyikalpan, nenkinamikiskej sen tlakatl yejuan kikti sen tsotsokojli ikan atl. Xkuitlapanuikan, hasta ne kampa onkalakis,

¹¹ niman iteko on kajli ijkin xkijlikan: “On toTemachtijkau ijkin mitstlajtoltia: ¿Kanon onkaj on kalijtik kampa nikonkuas on tiotlak tlakuajli ipan in iluitl Pascua* inuan on nonomachtijkauan?”

¹² Niman yejua mechititis sen ueyi kalijtik ne tlapani kampa ye kuajli tlaojonkaj. Ompa xchijchiuakan on tlakuajli.

¹³ Yejuamej tej, oyajkej niman ijki okinextijkej ken Jesús okinmijlij. Ompa okichijchijkej on tlakuajli para otlakuajkej ipan on iluitl Pascua*.

¹⁴ Niman ijkuak oajsik on hora para tlakuaskej, Jesús onoseuij itech on mesa inuan inomachtijkauan*.

¹⁵ Kemaj Jesús okinmijlij: —¡Sanoyej niknekiya nemouan nitlakuas ipan in iluitl pascua, chika xe nitlajyouiya!

¹⁶ Pampa aman nemechijlia ika xok oksejpa nemouan nikuas hasta on tonajli ijkuak nocumpliros on tlen in tlakuajli kijtosneki ne kampa Dios tlamandaroua.

¹⁷ Kemaj okontilan sen copa yejuan kipiya vino, niman ijkuak yokimakak tlaxtlauijli Dios, ijkin okijtoj: —Xkonikan in vino niman xmopanoltilijtiakan.

¹⁸ Nejua tej, nemechijlia ika xok nemouan nikonis iyayo in uvas hasta ijkuak Dios peuas tlamandaros.

¹⁹ Kemaj okontilan on pan, niman ijkuak yokimakak tlaxtlauijli Dios, okitlatlapan niman okinmakak. Kemaj ijkin okinmijlij: —Yejua in pan kijtosneki ken yejua notlalnakayo yejuan nouentlalis nemopampa. Xkuakan in para ika xnechelnamikikan.

²⁰ Ijkuak yotlakuajkej, no ijki okinmakak on copa niman okijtoj: —In tlen aman nenkoniskej ika in copa kijtosneki on yenkuik pacto* yejuan peua ikan noyesyo, niman san nemopampa toyauis.

²¹ ’Xkitakan, aman on tlakatl yejuan nechtemaktilis, nouan nemi ipan in mesa.

²² Ijkon tej, nejua yejuan oninochiu Tlakatl nimikis ken Dios otlanauatij, pero ¡lástima para on tlakatl yejuan nechtemaktilis!

²³ Kemaj yejuamej opejkej kinotlajtoltiaj akinon on yejuan kitemaktilis.

Inomachtijkauan Jesús onotenkuikuikej de on akinon más ueyixtias

²⁴ Kemaj yejuamej opeu notenkuikuij de on akinon más ueyixtias.

²⁵ Pero Jesús okinmijlij: —On reyes yejuan xhebreos* nochiuaj ken inteko on países niman chikauak kinmandarouaj on tlakamej. Niman on tlayekankej sano yejuamej noteneuaj ken kuajkualtin tlakamej.

²⁶ Pero nemejuamej xmechtocaroua ijkon nemouikaskej. Yej okseneka xmouikakan. Yejuan nemotsajlan más ueyixtikaj noneki nouikas ken xueyixtikaj, niman yejuan tlamandaroua noneki nouikas ken on yejuan tepaleuijketl.

²⁷ ¿Akinon tej, más ueyixtikaj, on tlayekanketl yejuan tlakua ipan mesa, noso on tetlamakaketl? Nikijtoua ika on tlayekanketl yejuan tlakua. Pero nejua, maski ninemotlayekankau, ninemi nemotsajlan ken se yejuan tetlamaka.

²⁸ ’Nemejuamej nochipa nouan yonentlajyouijtinenkej.

²⁹ Yejua ika tej, nejua nemechmaka sen tekiuajyotl ken noTajtsin onechmakak.

³⁰ Nenmatliskej niman nentlakuaskej ipan nomesa. Niman nemotlaliskej ipan on uejueyixtokej sietas para nenkinyolkuitiskej niman nenkintlajtlakolmakaskej on majtlaktli uan ome tribus* de Israel.

Jesús okijlij Pedro ika kinenekis yexpa

³¹ ToTEKO no okijlij Pedro: —Simón, Simón, xkaki. Satanás nemoka yotlajtlan para mechtsejtselos ken itlaj trigo kitsejtselouaj,

³² pero nejua moka yonitlajtlan itech Dios para maka tikpolos motlaneltok. Niman ijkuak oksejpa yotiuajlaj notech, xkimpaleui mokniuan para ma melajkanemikan.

³³ Simón okijlij: —NoTEKO, nejua ninemi listo para mouan nechtsakuaskej niman hasta para mouan nimikis.

³⁴ Niman Jesús okijlij: —Pedro, nejua nimitsijlia ika sano aman ijkuak xe tsajtsi on kaxtil*, tejua tinechnenekis yexpa ika xtinechixmati.

Ye uajlau on tetlatlatalistli

³⁵ Kemaj Jesús okinmijlij: —Ijkuak onemechtitlan niman onemechijlij maka xkitkikan itlaj bolsa, nion tomin, nion kaktin, ¿itlaj omechpoloj? Yejuamej okijtojkej: —Ka, xitlaj otechpoloj.

³⁶ Kemaj Jesús okinmijlij: —Pero aman tla tikpiya mobolsa niman motomin, xkikti, niman tla xtikpiya moespada xnamaka motlaken para xkoua moespada.

³⁷ Pampa nejua nemechijlia ika on tlen noka tlajkuilolnestikaj ipan on Yektlajkuilojli ika onkaj nochiuas. On Yektlajkuilojli ijkin kijtoua: “Inuan xkuajkualtin tlakamej okipojkej.” Nochi tej, tlen noka tlajkuilolnestikaj nocumpliros.

³⁸ Kemaj, yejuamej okijtojkej: —Xkita toTEKO, nikan onkaj ome espadas. Yejua okinmijlij: —¡Ah, xnenkajsikamatij tlinon nikijtosneki! Maski ma ijki.

Jesús okichiu oración ne Getsemaní

³⁹ Kemaj Jesús okis, niman oyaj ipan on tepetl itoka Olivos inuan on inomachtijkauan* ken miyekpa okichiu.

⁴⁰ Ijkuak oajsik, okinmijlij on inomachtijkauan*: —Xchiuakan oración para maka mechtlajkalis Satanás ipan tlajtlakojli.

⁴¹ Kemaj Jesús okintlalkauij uejka ken se ika mauejka ijkuak tlamotla ikan tetl, niman onotlakuantelkets niman onoueyikatsajtsilij*.

⁴² Niman okijtoj: —NoTajtsin, tla tikneki, xnechmanaui para maka nikijyouis in tlen sanoyej* teajman. Pero maka nochiuas ken nejua nikneki, yej ma nochiua ken tejua tikneki.

⁴³ Kemaj sen ángel yejuan oualeu iluikak, okinotitij niman okimakak yolchikaualistli.

⁴⁴ Niman pampa yejua sanoyej noyolkokojtikatka, más sanoyej chikauak noueyikatsajtsiliaya. Yejua noueyikatsajtsiliaya hasta nitoniaya, niman itonil katka ken yestli yejuan chipiniya ipan tlajli.

⁴⁵ Ijkuak otlan noueyikatsajtsilia, ouajnotelkets, niman oyaj intech inomachtijkauan*. Ijkuak intech oajsik, okintak kochtokej, pampa sanoyej yoajmankasiaukaj.

⁴⁶ Kemaj okimijlij: —¿Tline* nenkochtokej? Xmokuiteuakan, niman xchiuakan oración para xmechtlanis on tetlatlatalistli.

Jesús okajsikej

⁴⁷ Jesús sanken* tlajtojtikatka, ijkuak miyek tlakatl itech oajsik. Niman Judas yejuan inuan on nomachtijkej* tlapouajli katka, uajlaya tlayakapan, niman okinisiuij Jesús para okitenkuaj*.

⁴⁸ Niman Jesús okijlij: —Judas, ¿ijkon tinechtenkua* para tinechtemaktilia nejua yejuan oninochiu Tlakatl?

⁴⁹ Ijkuak inomachtijkauan* Jesús yejuan ompa iuan nemiyaj okitakej tlen ye nochijtikaj, okijlijkej: —ToTEKO, ¿ma titeixnamikikan ikan espada?

⁵⁰ Niman semej yejuamej okinakastsontek sen tlakatl itlakeual on más ueyi intlayekankau on tiopixkej. Okitekilij iyekmanakas.

⁵¹ Pero Jesús okijtoj: —Xmoteltikan. Ma ijki. Kemaj Jesús okimatokilij inakas on tlakeuajli niman okipajtij.

⁵² Kemaj ijkin okinmijlij intlayekankauan on tiopixkej, niman on tlayekankej ipan on ueyitiopan niman on ueuetkej tlayekankej yejuan oualajkej okanakoj: —¿Onennechajsikoj ikan espadas niman kojtin* ken yakaj nitlachteketl yeskia?

⁵³ Mojmostla nemouan ninemiya ne ipan iueyitiopan Dios, niman xonennechajsikej, pero ipan in hora Dios mechkauilia nenkichiuaj on tlen nenkinekij. Aman ipoder Satanás tetlani.

Pedro okinenek* Jesús

⁵⁴ Kemaj okajsikej Jesús, niman okuikakej ichan on más ueyi intlayekankau on tiopixkej. Niman Pedro san uejka kuitlapanuijtiaya.

⁵⁵ Ompa itlajkotian on kiauak otlatlatijkej, niman iyeualkan on tlitl onotlajtlalijkej, niman Pedro no ompa intsajlan onotlalij.

⁵⁶ Kemaj ijkuak sen siuatekichiuilijketl okitak Pedro yeuatikaj itech on tlitl, okixkechij niman okijtoj: —In tlakatl no ompa iuan nemiya.

⁵⁷ Pero Pedro okinenek* niman okijtoj: —Siuatl, nejua xnikixmati.

⁵⁸ Achijtsin más sakin*, kej okse okitak Pedro niman okijlij: —Tejua no inuan tikistinemiya. Pero Pedro okijtoj: —Ka tlakatl, xnejua.

⁵⁹ Kanaj ipan se hora sakin*, kej okse okichikajkaijtoj: —In tlakatl melauak iuan kistinemiya, pampa yejua no ualeua Galilea.

⁶⁰ Kemaj Pedro okijtoj: —Tlakatl, xnikmati tlinonon tikijtojtikaj. Kemaj nimantsin ijkuak Pedro sanken* tlajtojtikatka, otsajtsik on kaxtil*.

⁶¹ Kemaj toTEKO onomalakachoj niman okontak Pedro. Ijkuakon Pedro okelnamik on tlen yejua yokijlijka: “Sano aman ijkuak xe tsajtsi on kaxtil* tejua tikijtos yexpa ika xtinechixmati.”

⁶² Kemaj Pedro okis ompa niman sanoyej oajmankachokak.

On policías ika ouetskakej niman okuijuitekej Jesús

⁶³ On tlakamej yejuan cuidarouayaj Jesús ika ouetskakej niman okuijuitekej.

⁶⁴ Okixtlapachojkej niman okixayakauijuitekej, niman ijkin okijlijkej: —Xtlajto tiotlajtojketl. Xtechijli akinon omitsmailij.

⁶⁵ Niman miyek okseki tlamach kijliayaj para kuijuikaltiayaj.

Jesús okuikakej imixpan on más uejueyi tekiuajkej ipan on Sanedrín*

⁶⁶ Ijkuak ouajtlanes, on ueuetkej tlayekankej hebreos*, niman intlayekankauan on tiopixkej niman on temachtijkej ikan tlanauatijli onosentlalijkej niman okuikakej Jesús imixpan on más uejueyi tekiuajkej ipan on Sanedrín*. Ompa ijkin okitlajtoltijkej Jesús:

⁶⁷ —Xtechijli tla tejua tiCristo. Yejua okinmijlij: —Tla nemechijlis ika nejua niCristo, xnennechneltokaskej.

⁶⁸ Niman tla itlaj nemechtlajtoltis, xnennechnankiliskej nion xnennechmakauaskej.

⁶⁹ Pero desde aman nejua yejuan oninochiu Tlakatl ninotlalis iyekmakopa on Dios yejuan nochi ueli kichiua.

⁷⁰ Kemaj nochimej okijlijkej: —¿Tla ijkon, tejua titeKoneu itech Dios? Jesús okinmijlij: —Kemaj. Ijki ken nemejuamej nenkijtouaj.

⁷¹ Kemaj yejuamej okijtojkej: —Xpoliuij más tlateixpanuijkej. Aman sano tejuamej yotikakej tlen kijtoua.