San Lucas 21 - El Nuevo Testamento

On siuakaualtsintli yejuan mayanki okitlalij iuentomin

¹ Ijtik on ueyitiopan Jesús okintak on ricos kitlaliayaj tomin ijtik on caja kampa nosentlalia on uentomin.

² No ijki okitak sen mayanki siuakaualtsintli* yejuan okontlalij san ome cobre tomin ijtik on caja.

³ Niman yejua okijtoj: —Ika tlen melauak nemechijlia ika in mayanki siuakaualtsintli más ueyi okitlalij iuentomin xken nochimej.

⁴ Nochimej on oksekimej okitlalijkej inuentomin yejuan yokinsobraroj, pero in siuatl, maski mayanki, okitemakak nochi tlen kipiyaya para ika nemis.

Jesús okinmijlij on inomachtijkauan* ika on ueyitiopan xoxotonis

⁵ Ijkuak sekimej inomachtijkauan* tlajtlajtojtikatkaj de on ueyitiopan niman ken tlachijchijtli katka ikan on kualtetsitsimej temej niman ika on kualtsitsimej itlajmachyouan* yejuan ompa onotetlayokolijka ken ofrendas, Jesús okijtoj:

⁶ —Yejkos on tonajli ijkuak nochi on tlen amantsin nenkitstokej xoxotonis, niman nion sen tetl xnokauas ipan okse tetl.

Jesús okinmijlij inomachtijkauan* tlinon nochiuas ijkuak ye nisiu tlatlalpoliuis

⁷ Kemaj okitlajtoltijkej: —Temachtijketl, ¿kamanon nochiuas? ¿Tlen tlamauisojli nesis ijkuak in tlajtlamach* ye peuas nochiuas?

⁸ Jesús okijtoj: —Xmotakan sano nemejuamej, niman maka nenkimokauiliskej mechkajkayauaskej, pampa uajlaskej miyekej yejuan ikan noTokatsin kualijtojtiaskej: “Nejua niCristo”, niman “Aman yoyejkok on tonajli.” Pero nemejuamej maka xuiyan inuan.

⁹ Niman ijkuak nenkakiskej ika onkaj nouijsokilistin niman revoluciones, maka nemomojtiskej. Tej, nochi on ika onkaj achtopa nochiuas. Pero ijkuak ijkon nochiuas, xnimantsin poliuis in tlaltikpaktli.

¹⁰ Jesús oksejpa más okijtoj: —On reyes nouijsokiskej iuan oksekimej reyes, niman on países nomijmiktiskej iuan oksekimej países.

¹¹ Temojtij tlalolinis miyekan, niman onyas apistli niman miyek kualolistli miyekan. Niman ne ipan cielo* miyek tlajtlamach* temojtij nesis, niman uejueyi tlamauisoltin.

¹² ’Pero chika ajsi para nochiuas nochi in, mechtlaueltotokatinemiskej, niman mechtlauelitaskej niman tlajtlamach* ika mechtlajyouiltiskej niman mechtlajtlakolmakaskej impan on sinagogas*. No ijki mechtsajtsakuaskej, niman imixpan on reyes niman gobernadores mechuikaskej. Nochi in nochiuas san nopampa.

¹³ Ijkuak ijkon nemopan nochiuas, uelis noka nentenojnotsaskej.

¹⁴ Tej, xmoyolchikauakan para maka sa nenkomatstiaskej tlen tlajtojli nenkijtoskej para nemomanauiskej.

¹⁵ Ijkon xmoyolchikauakan, pampa on tlen tlajtojli niman tlamatkilistli* mechpolos, nejua nemechmakas yejuan nion se nemotlauelikniu xuelis kixikos nion xuelis kixnamikis.

¹⁶ Nemejuamej hasta nemotajuan, nemokniuan, on yejuan ken nenkinta niman nemotlajsojkaikniuan* sano yejuamej mechtemakaskej. Niman sekimej nemejuamej mechmiktiskej.

¹⁷ Niman san pampa nennechneltokaj, nochi tlakatl mechtlauelitas.

¹⁸ Pero nion se nemotson xpoliuis.

¹⁹ Niman tla nochipa nemelajkanemij ikan nemotlaneltok, nenkiseliskej on nemilistli yejuan para nochipa.

²⁰ ’Ijkuak nenkitaskej ika miyekej soldados yokiyejyeualojkej Jerusalén, ijkuakon xmatikan ika saniman kixoxotoniskej.

²¹ Ijkuakon, yejuan nemiskej Judea ma ontlatlaksakan neka ipan tepemej. Niman yejuan nemiskej Jerusalén ma kisakan ompa, niman on yejuan nemiskej ipan campo maka ma kalakikan oksejpa ne Jerusalén.

²² Ijkon xchiuakan, pampa ipan on tonajli onyas castigo. Ijkuakon, nocumpliros nochi tlen tlajkuilolnestikaj ipan on Yektlajkuilojli.

²³ Lástima para on siuamej koneuajkej ipan on tonajli, niman on siuamej yejuan tlachichitiaj, pampa ipan on tonajli miyek tlajyouilistli onyas ipan in país niman sen temojtij castigo kipiyaskej on hebreos*.

²⁴ Sekimej mikiskej ipan nouijsokilistli, niman oksekimej kinuikaskej ken eslavos ipan miyek países. Niman on yejuan xhebreos* kichojcholoskej on ueyikalpan Jerusalén hasta kaman tlamis nocumpliros on tonaltin kech okintlalilijkej.

Jesús okinmijlij on inomachtijkauan* kenijki uajlas oksejpa

²⁵ ’Kemaj onyas tlamauisojli temojti ipan tonaltsintli, ipan metstli, niman impan on sitlalimej. Niman nikan ipan in tlaltikpaktli on chanejkej ipan on países xkimatiskej tlinon kichiuaskej niman sanoyej* nomojtiskej, pampa sanoyej temojtij kakistis on mar niman ken noketsteuas.

²⁶ Chika nochi tlakatl kitaskej on tlen nochiuas ipan in tlaltikpaktli, yolpopoliuiskej ikan innemojtil, pampa hasta nochi on kech ika kojtitikaj on cielo* nolinis.

²⁷ Kemaj nechitaskej, nejua yejuan oninochiu Tlakatl, niuajlas ipan sen moxtli ikan noueyi poder niman ikan noueyilis.

²⁸ Ijkuak peuas nochiuas in tlajtlamach*, xmoyoleuakan niman sa xonajkotlachixtiakan, pampa saniman mechmakixtiskej.

²⁹ Kemaj Jesús okintlalilij in ejemplo: —Xkitakan on kojtlakijlotl itoka higuera* niman on oksekimej kojtlakijlomej.

³⁰ Ijkuak nenkitaj selia on kojtli*, sano nemejuamej nenkimatij ika ye nisiu xompantlaj yes.

³¹ Sano ijki, tej, ijkuak nenkitaskej ye nochijtikaj on tlamauisoltin temojtli yejuan yonemechijlij, xmatikan ika ye nisiu para Dios tlamandaros.

³² ’Ika tlen melauak nemechijlia ika nochi in tlamauisoltin nochiuas ijkuak xe mikij in tlakamej yejuan nemij ipan in tonaltin.

³³ On cielo niman in tlaltikpaktli popoliuis, pero notlajtol xkaman popoliuis.

³⁴ ’Xmotakan sano nemejuamej. Maka xmoyoltechikauakan ika on tlen xkuajli, nion maka xtlauantinemikan, nion itlaj xkomatstiakan on tlen ika nemotekipanoskej para maka uajlas on tonajli ijkuak xnenkimatstokej.

³⁵ Ijkon ken sen tlatlalilistli* kajsi sen yolki ijkuak on yolki kinemilia ika kuajli nemi, no ijki yejkos on temojtij tonajli ipan nochi kech tlakatl yejuan chanti ipan in tlaltikpaktli.

³⁶ Nemejuamej tej, xnemikan listos. Niman nochipa xchijtiakan oración para ijki uelis nemomanauiskej ipan nochi on tlajyouilistli yejuan nochiuas, niman para nenmotlaliskej nixpan ijkuak nemechyolkuitis nejua yejuan oninochiu Tlakatl.

³⁷ Mojmostla Jesús temachtiaya ipan on ueyitiopan, niman ipan tlayoua yaya ipan on tepetl itoka Olivos.

³⁸ Niman mojmostla saniman kualkan nochi tlakatl yaya ne ueyitiopan para konkakiya Jesús.