San Lucas 20 - El Nuevo Testamento

Jesús niman itekiuayo

¹ Sen tonajli ne ipan on ueyitiopan, Jesús kinmachtiaya on tlakamej niman kinmijliaya on kuajli tlajtojli yejuan kiteijlia ken Dios temakixtia. Intlayekankauan on tiopixkej niman on temachtijkej ikan itlanauatil Dios, san sekan iuan on ueuetkej tlayekankej oajsikej itech Jesús,

² niman okijlijkej: —Xtechijli, ¿tlen tekiuajyotl tikpiya para tikchiua in tlajtlamach*? ¿Akinon tej, omitsmakak on tekiuajyotl?

³ Niman Jesús okinmijlij: —Nejua no nikpiya tlen nemechtlajtoltis.

⁴ Xnechijlikan, ¿akinon okuajtitlan Juan para ma tlakuateki? ¿Dios okuajtitlan, noso on tlakamej okuajtitlankej?

⁵ Kemaj yejuamej opejkej ijkin kinochtakatlajtlajtoltiaj: —¿Kenijki tikijliskej? Tla tikijtoskej ika Dios okuajtitlan, yejua ijkin techijlis: “Tla ijkon, ¿tline* xonenkineltokakej on tlen Juan okijtoj noka nejua?”

⁶ Niman tla tikijtoskej ika on tlakamej okuajtitlankej, nochimej in tlakamej techtemojmotlaskej, pampa yejuamej xometlamatij ika Juan itiotlajtojkau Dios.

⁷ Yejua ika tej, yejuamej okijlijkej Jesús ika xkimatij akinon okuajtitlan Juan para ma tlakuateki.

⁸ Niman Jesús okinmijlij: —Tla ijkon, nejua no xnemechijlis akinon onechmakak tekiuajyotl para nikchiua in tlajtlamach*.

Jesús okixtij sen ejemplo intechkopa on hebreos* yejuan xokiselijkej Cristo

⁹ Kemaj Jesús opeu kinnojnotsa on tlakamej niman okintlalilij in ejemplo: —Sen tlalejketl okitôkak miyek uvas, niman ijkuak yokitôkak okintlanejtij sekimej medieros para kitlajpiliskej ikan on uvas. Niman on tlalejketl onejkuanij niman oyaj ipan okse país para miyek tonaltin.

¹⁰ Ijkuak oyejkok on tonajli para kitekiskej uvas, on tlalejketl okititlan itekitkau para ma kintlajtlaniliti on medieros on kech yejua kitocaroua kiselis. Pero yejuamej okimajmailijkej on tekitketl niman okontitlankej. Xitlaj okimakakej.

¹¹ Kemaj on tlalejketl okititlan okse itekitkau, pero on tekitketl no okitlauelixnamikej niman okimajmailijkej, niman okititlankej. Xitlaj okimakakej.

¹² Kemaj on tlalejketl okititlan on ika yeyi itekitkau, pero on medieros de on uvasyoj no okojkokojkej niman okuajkixtijkej.

¹³ ’Kemaj iteko on tlatoktli ijkin okinemilij: “¿Kenijki nikchiuas? ¡Ah, aman nikmati! Niktitlanis notlajsojkakoneu. Kas ijkuak kitaskej kitlakaitaskej.”

¹⁴ Pero ijkuak on medieros okitakej on tekoneu, okinojlijkej: “In yejua ikoneu on tlalejketl. Ijkuak mikis itataj, yejua iyaxka* yes nochi in tlajli. Aman tej, ma tikmiktikan ikoneu para toyaxka yes tejuamej.”

¹⁵ Yejuamej okuajkixtijkej on tekoneu ne ipan on uvasyoj, niman okimiktijkej. Kemaj Jesús okintlajtoltij: —Aman tej, iteko on uvasyo, ¿tlinon kinchiuilis on xkuajkualtin medieros?

¹⁶ Yejua yas niman kinmiktis on medieros niman on tlatoktli oksekimej kinmakas para cuidaroskej. Ijkuak on tlakamej ijkon okakkej on ejemplo, okimatkej ika iteko on uvasyo kijtosneki Dios, niman on xkuajkualtin tekitkej kijtosneki sano yejuamej. Yejua ika okijtojkej: —¡Xnejli! Dios xkichiuas.

¹⁷ Pero Jesús okimixtlaloj, niman okinmijlij: —Tla xijki yes, ¿tlinon kijtosneki in Yektlajkuilojli? Ijkin tlajkuilolnestikaj: On tetl yejuan on tepanchijkej xokiselijkej, aman yejua yonochiu ken esquinero.

¹⁸ San akinon uetsis ipan on tetl, tepojpostekis, niman tla on tetl yakaj ipan uetsis, kikuejkuechtilis.

On fariseos* okijtlajtoltijkej Jesús tla kuajli para kitlaxtlauaskej on impuestos para Roma

¹⁹ Nimantsin on intlayekankauan on tiopixkej niman on temachtijkej ikan tlanauatijli kinekiyaj kajsiskej Jesús para kontsakuaskej, pampa kimatstikatkaj ika on ejemplo okinteneuilij yejuamej. Pero xokajsikej, pampa kinmakajsiyaj on tlakamej.

²⁰ Yejuamej tej, okintitlankej on yejuan noteneuaj kuajkualtin tlakamej para okichtakaitatoj Jesús. Yejuamej okichiualtijkej itlaj ma kijto yejuan uelis ika kitemaktiliskej itech on gobernador.

²¹ Yejua ika ijkin okitlajtoltijkej: —Temachtijketl, tikmatstokej ika on tlen tikijtoua niman tiktemachtia yejua tlen melauak. Niman no tikmatstokej ika xkaman titechikoita* intech tlakamej, yej on tlakamej kuajli tikintitia ken Dios kineki para nouikaskej.

²² Aman xtechijli: ¿Itlanauatil Moisés techkauilia titlatlaxtlauaskej ikan impuestos para on ueyi tekiuaj César yejuan itekiuaj on país Roma?

²³ Pero Jesús okimat ika yejuamej ikan xkuajli inyojlo ijkon kitlajtoltiayaj san para kajkayauaskej. Yejua ika, ijkin okinmijlij: —¿Tline nennechnekiliaj para ma nikijto itlaj yejuan ika uelis nennechteixpanuiskej?

²⁴ Se xnechititikan on tomin. ¿Akinon ixayak, niman akinon itoka yejuan nestikaj ipan in tomin? Yejuamej okijlijkej: —On ueyi tekiuaj César de Roma.

²⁵ Kemaj Jesús okinmijlij: —Tla ijkon tej, xmakakan César on tlen iyaxka, niman xmakakan Dios on tlen yejua iyaxka.

²⁶ Yejuamej tej, xouelkej okajkayajkej ika on tlen imixpan on tlakamej kijtouaya. Yej, otlamojkaitakej, pampa Jesús ijkon okiminnankilij niman xok onauatkej.

On saduceos okitlajtoltijkej Jesús tla yolisuikej niman noketsteuaskej on yejuan yomikkej

²⁷ Okitatoj Jesús sekimej saduceos yejuan kijtouaj ika xuelis yoliuiskej* niman nokuiteuaskej on mikatsitsimej. Yejuamej ijkin okijlijkej Jesús:

²⁸ —Temachtijketl, ipan itlanauatil Moisés ijkin okijkuiloj para tejuamej. Tla sen tlakatl miki niman xikan ikoneuan kajteua on siuatl, ikniu on tlakatl ika onkaj nonamiktis iuan on siuakauajli*, niman iuan tlaskaltis para on kokonej nemiskej ken ikoneuan yeskia on ikniu yejuan omik.

²⁹ Aman tej, nemiyaj chikomemej iknijtin yejuan tlakamej. On yejuan yenkuiyotl ononamiktij, niman kemaj omik, pero on siuatl xokipiyalij ikoneu.

³⁰ Kemaj on ika ome teikniu ononamiktij iuan on siuakauajli*, niman no omik in teikniu, niman on siuatl xokipiyalij ikoneu.

³¹ Kemaj kej on ika yeyi teikniu ononamiktij iuan on siuakauajli*, niman hasta ijki okisatoj nochimej on iknijtin. Nochimej omikkej, niman nion se xokipiyalij ikoneu on siuatl.

³² Kemaj on siuatl no omik.

³³ Ijkuak yoliuiskej* on mikatsitsimej, ¿katlejua itech tesiuau yes de on chikomemej iknijtin, pampa nochimej okipixkej ken insiuau?

³⁴ Kemaj Jesús okinmijlij: —Chika nemij ipan in tlaltikpaktli, on tlakamej niman on siuamej nonamiktiaj.

³⁵ Pero ijkuak yoliuiskej* niman nokuiteuaskej intsajlan on mikatsitsimej, on yejuan Dios kinkauilis ajsiskej ne iluikak, xok nonamiktiskej,

³⁶ pampa ompa xok mikiskej. Yejuamej ken ángeles yeskej. Niman yejuamej tekoneuan itech Dios pampa yoliuij niman nokuiteuaj intsajlan on mikatsitsimej.

³⁷ Hasta Moisés otechmachistij ika on mikatsitsimej yoliuij niman nokuiteuaj. Ijkuak on tlakotepajsojli tlikuitikatka, toTEKO Dios ompa okijlij Moisés ika yejua iDios Abraham, Isaac niman Jacob.

³⁸ Tikmatij ika Dios xejua iminDios on mikatsitsimej, yej yejua iminDios on yoltokej, pampa para yejua melauak nochimej kipiyaj nemilistli.

³⁹ Kemaj sekimej temachtijkej ikan on tlanauatijli okijlijkej Jesús: —Temachtijketl, kuajli on tlen otikijtoj.

⁴⁰ Niman on saduceos xok okinemilijkej itlaj más kitlajtoltiskej.

Cristo teuejkakoneu itech David niman no iTEKO

⁴¹ Kemaj Jesús okinmijlij: —¿Tline kijtouaj ika Cristo yejuan Dios okitlapejpenij para temakixtis yejua teuejkakoneu itech David?

⁴² Tej, ipan on Salmos tlajkuilolnestikaj ika sano David ijkin kijtoua: Dios okijlij noTEKO: “Xmotlali nikan ipan noyekma,

⁴³ hasta kaman ma nimitstlali tlayekanketl intech on motlauelikniuan.”

⁴⁴ Tla David ijkon okijtoj ika Cristo yejua iTEKO, tla ijkon tej, ¿kenijki Cristo ueli teuejkakoneu itech David?

Jesús okinmijlij inomachtikauan maka nouikaskej ken omexayakyejkej

⁴⁵ Nochi tlakatl tlakaktikatka ijkuak Jesús ijkin okinmijlij inomachtijkauan*:

⁴⁶ —Xmotakan sano nemejuamej intech on temachtijkej ikan tlanauatijli yejuan kuelitaj tlakenueueyakej kistinemij, niman kinekij ikan miyek tetlakaitalistli ma kintlajpalokan neka ipan plaza. Niman yejuamej kinekij on más kuajli sietas ne ipan on sinagogas*, niman ipan on iluimej kinekij noseuiskej ipan on más uejueyixtokej sietas.

⁴⁷ Yejuamej kinchankuiliaj on siuakaualtsitsimej*, niman sanoyej* ueueyak oraciones kijtouaj imixpan on tlakamej para on tlakamej kuajli ma tlanemilikan intech yejuamej. Yejuamej tej, más ueyi castigo kiseliskej.