San Lucas 18 - El Nuevo Testamento

Jesús okixtij sen ejemplo de on juez teyolkuitijketl niman on siuakauajli*

¹ Jesús okintlalilij sen ejemplo para kintitis ika noneki nochipa kichiuaskej oración, niman xkaman kajkauaskej.

² Ijkin okinmijlij: —Ipan sen kalpan nemiya sen juez teyolkuitijketl. Yejua xkitlakaitaya Dios, nion okipix teiknelilistli* para on tlakamej.

³ Sano ipan on kalpan no nemiya sen siuakauajli* yejuan nochipa kontaya on juez para kitlajtlaniliaya ma kipaleui para uelis kitlanis on yejuan iuan kipiyaya tlauejli.

⁴ Miyekpa on juez xokinek okipaleuij on siuakauajli*, pero más sakin* ononemilij: “Maski xniktlakaita Dios nion nikpiya teiknelilistli* para tlakamej,

⁵ nikpaleuis in siuatl san pampa nochipa uajlajtika niman nechpajsoloua niman maka yej nechyolajxitis.”

⁶ Niman toTEKO okijtoj: —Xkakikan on tlen okijtoj on xkuajli juez teyolkuitijketl.

⁷ Aman tej, ¿Dios xno kimpaleuis on yejuan okintlapejpenij tla ikan tonajli niman yeuajli itech noueyikatsajtsilijtokej*? ¿Nouejkauas ika kimpaleuis?

⁸ Nemechijlia ika xnouejkauas ika kimpaleuis. Pero ijkuak nejua yejuan oninochiu Tlakatl niuajlas, ¿Nikinuajnextis ipan in tlaltikpaktli sanken tlaneltokaj on tlakamej?

Jesús okixtij sen ejemplo de sen fariseo* niman sen tlacobrarojketl

⁹ Jesús okinmijlij sen ejemplo de on yejuan kinemiliaj ika yejuamej más kuajkualtin niman kinchikoitaj on oksekimej. Ijkin okijtoj:

¹⁰ —Omemej tlakamej okichiuatoj oración ipan on ueyitiopan. Se de yejuamej fariseo* katka, niman okse yejuan tekitiya ken tlacobrarojketl ikan impuestos.

¹¹ On fariseo* ijkatikatka niman ijkin kichiuaya ioración: “Ay Dios noTajtsin, nimitsmaka tlaxtlauijli pampa nejua xnikchiua ken on oksekimej yejuan kiteixpachouiliaj itlaj, niman xyolmelajkej, niman siuapapatlaj. No ijki nimitsmaka tlaxtlauijli pampa xnikchiua ken in tlacobrarojketl ikan impuestos.

¹² Nejua okpa ninosaua ipan se semana, niman de nochi on tlen niktlani ompa nikixtia on diezmo* niman nimitsmaka.”

¹³ Pero on tlacobrarojketl san uejka onokau niman xkinekiya nion achijtsin para ajkotlachas ne iluikak, yej san noyelpanuitekiya ikan ajmantli niman kijtouaya: “¡Ay Dios, noTajtsin, xnechikneli*! Nejua sanoyej nitlajtlakolej.”

¹⁴ Nemechijlia ika ijkuak on tlacobrarojketl oyaj ichan, xok kipiyaya tlajtlakojli. Pero on fariseo* xokitlapojpoluijkej, pampa on yejuan noueyilia, maski xkinekis noknelis, niman on yejuan noknelia, kiueyiteneuaskej.

Jesús okintiochiu on kokonej

¹⁵ On tajtatin kinuajuikayaj inkonetsitsiuan itech Jesús para ma kinkuamatoka. Pero ijkuak on nomachtijkej* ijkon okitakej, opejkej kimajuaj on yejuan kinuajuikayaj inkokoneuan.

¹⁶ Pero Jesús okinnots on kokonej ma uajlakan itech, niman okinmijlij inomachtijkauan*: —Xkinkauakan on kokonej ma uajlakan notech, niman maka xkinteltikan, pampa on yejuan yolyemankej* ken in kokonej kalakiskej ne kampa Dios tlamandaroua.

¹⁷ Ika tlen melauak nemechijlia ika on yejuan xkiselis itekiuajyo Dios ken sen konetl, xuelis kalakis kampa Dios tlamandaroua.

Sen telpochtli rico otlajtoj iuan Jesús

¹⁸ Se de on tlayekankej okitlajtoltij Jesús: —Kuajli temachtijketl, ¿tlinon noneki nikchiuas para nikselis on nemilistli yejuan para nochipa?

¹⁹ Jesús okijlij: —¿Tline* tikijtoua ika nikuajli? Dios san yejua iselti kuajli, niman tejua tiknemilia ika nejua xniDios.

²⁰ Tejua tikmatstikaj itlanauatiluan: “Maka iuan xmoteka yejuan xmosiuau, maka xtemikti, maka xtlachteki, maka yakaj xtlajtolketsteuili, xtlakaita motataj niman monanaj.”

²¹ On tlakatl okijlij: —Nochi in desde nikonetl nikuajtlakamatstiu.

²² Ijkuak Jesús ijkon okak, okijlij: —Sa se mitspoloua tikchiuas. Xuiya mochan niman xnamaka nochi tlen tikpiya niman on tomin xkinmaka on mayankej. Tla ijkon tikchiuas, tikpiyas riquezas ne iluikak. Niman kemaj xuajla niman nouan xuiya.

²³ Pero ijkuak on tlakatl ijkon okak, sanoyej onajman pampa yejua sanoyej rico katka.

²⁴ Ijkuak Jesús okitak ika on tlakatl onajman, okijtoj: —¡Sanoyej ouijtikaj para on yejuan ricos kalakiskej kampa Dios tlamandaroua!

²⁵ Más sanoyej ouijtikaj* para sen rico kalakis ne kampa Dios tlamandaroua xken para sen camello panos ipan on kampa tlakoyoniaj ikan aguja.

²⁶ On yejuan ijkon okakkej okijtojkej: —Tla ijkon, ¿akinon uelis makisas?

²⁷ Jesús okinmijlij: —On tlen on tlakamej xuelij kichiuaj, Dios kemaj ueli kichiua.

²⁸ Pedro okijlij: —Tejuamej yotikajkej nochi tlen tikpiyayaj, niman tikistinemij mouan.

²⁹ Kemaj yejua okinmijlij: —Ika tlen melauak nemechijlia ika san akinon yejuan kikauas ichan, noso itajuan, noso ikniuan, noso isiuau, noso ikoneuan san ipampa itekiu Dios,

³⁰ kiselis miyek más ipan in tonaltin, niman ipan on tonaltin yejuan uajlau kiselis nemilistli yejuan para nochipa.

Jesús ika yexpa okinmijlij on inomachtijkauan* ika kimiktiskej

³¹ Jesús okinuikak on majtlaktli uan ome nomachtijkej* oksekan, niman okinmijlij: —Aman tiauij ne Jerusalén kampa nocumpliros nochi tlen on tiotlajtojkej okijkuilojkej noka nejua yejuan oninochiu Tlakatl.

³² Nechtemakaskej intech on yejuan xhebreos*. Yejuamej nechuetskaskej, nechuijuikaltiskej niman nechchijchaskej.

³³ Nechuijuitekiskej niman kemaj nechmiktiskej, pero ipan yeyi tonajli nejua niyoliuis* niman ninokuiteuas ipan notlalkon.

³⁴ Nochi on tlen okinmijlij xokajsikamatkej, pampa nochi on tlajtlamach* tlen okinmijlij, Dios xokinkauilij ma kajsikamatikan. Yejuamej tej, nion achijtsin xkimatiyaj tlinon ika tlajtlajtojtikatka.

Jesús okipajtij sen ciego yejuan chanej* Jericó

³⁵ Ijkuak Jesús okinisiuij on ueyikalpan itoka Jericó, sen ciego yeuatikatka ipan ojtli kitlajtlantikatka limosna.

³⁶ Ijkuak on ciego okak miyek tlakatl panotikaj ne kampa yejua nemiya, okitetlajtoltij tlinon nochijtikaj.

³⁷ Niman okijlijkej ika Jesús yejuan ualeua Nazaret ompaka panotikaj.

³⁸ Kemaj on ciego otsajtsik: —¡Jesús, teuejkakoneu itech David, xnechikneli* niman xnechpaleui!

³⁹ On yejuan tlayakapan yayaj okajuakej niman okijlijkej para maka sa ma nauati, pero yejua sanken* más tsajtsiya: —¡Teuejkakoneu itech David, xnechikneli* niman xnechpaleui!

⁴⁰ Kemaj Jesús onoteltij niman otlanauatij ma kanilitij. Ijkuak ixpan yokuajuikilijkej, Jesús ijkin okijlij:

⁴¹ —¿Tlinon tikneki ma nikchiua mopampa? Niman on ciego okijlij: —NoTEKO, xchiua para ma nitlacha.

⁴² Jesús okijlij: —¡Xseli motlachalis! Aman otikselij motlachalis pampa otikneltokak ika nimitspajtis.

⁴³ Nimantsin on ciego ouel otlachix. Kemaj yejua oyaj iuan Jesús, niman kueyiliaya Dios. Niman nochimej on tlakamej yejuan okitakej on tlen onochiu no okiyektenejkej Dios.