San Lucas 15 - El Nuevo Testamento

Jesús okixtij sen ejemplo de sen borreguito yejuan opolijka

¹ Miyekej on yejuan tlacobrarouayaj ika impuestos niman on tlajtlakolejkej kinisiuiayaj Jesús para kakiyaj.

² Yejua ika on fariseos* niman on temachtijkej ikan itlanauatil Dios tlaueltlajtouayaj niman ijkin kijtouiliayaj Jesús: —Yejua in tlakatl kinselia on tlajtlakolejkej niman inuan tlakua.

³ Yejua ika Jesús okintlalilij in ejemplo:

⁴ —Ma tikonijtokan ika semej nemejuamej kipiya cien borreguitos niman se okipoloj. ¿Xkinkateua on 99 ne kampa tlakualkan niman yau kontejtemoua on se borreguito yejuan okipoloj hasta kaman kinextia?

⁵ Niman ijkuak kinextia, ikan paktli kuajnokechpanoltia.

⁶ Niman ijkuak ajsi ichan, kinsentlalia itlajsojkaikniuan* niman inisiuchanejkauan* niman kinmijlia: “Nouan xpakikan, pampa yoniknextij on borreguito yejuan onikpolojka.”

⁷ Nejua tej, nemechijlia ika ne iluikak no ijki nochiua. Ompa más onkaj paktli ipampa sen tlajtlakolej yejuan noyolpatla xken impampa on 99 kuajkualtin tlakamej yejuan xkipiyaj tline noyolpatlaskej.

Jesús okixtij sen ejemplo de on tomin yejuan opolijka

⁸ ’Noso ma tikonijtokan ika sen siuatl kipiya majtlaktli tomin tlachijchijtli ikan plata niman se okipoloj. ¿Xkitlikuiltia itlauil niman peua tlachpana chika ikan miyek cuidado kitejtemoua on tomin hasta kaman kinextia?

⁹ Niman ijkuak kinextia, kinsentlalia itlajsojkaikniuan* niman inisiuchanejkauan* niman kinmijlia: “Nouan xpakikan pampa yoniknextij on tomin yejuan onikpolojka.”

¹⁰ Nemechijlia ika no ijki onkaj paktli ne intsajlan on iángeles Dios ipampa se tlajtlakolejketl yejuan noyolpatla.

Jesús okixtij sen ejemplo de sen telpochtli yejuan opolijka

¹¹ No ijki okijtoj Jesús: —Sen tlakatl kipiyaya ome ikoneu.

¹² Niman on yejuan más konetl okijlij itataj: “Notataj, xnechxelouili aman on tlen tikpiya yejuan noyaxka* yes.” Niman on tajtli okinxelouilij on tlen kipiyaya.

¹³ Ipan keski tonajli más sakin*, on telpochtli yejuan más konetl okisentlalij nochi tlajtlamach* tlen iyaxka, niman oyaj uejka ipan okse país kampa otlan kinajauiltia itomin ikan sen xkuajli nemilistli.

¹⁴ Pero ijkuak nochi yokitlamij on tomin, sanoyej* opeu tlasojti tlakuajli ne ipan on país, niman opeu ajapismiki.

¹⁵ Kemaj okitejtemoto tekitl itech sen tlakatl yejuan chanej* ipan on país, niman on tlakatl okititlan ipan icampo para kitlajpiyalis ika ipitsouan.

¹⁶ Niman sanoyej kinekiya kikuas on tlakuajli itoka algarrobas yejuan kikuayaj on pitsomej, pero xakaj kimakaya.

¹⁷ Ijkuakon opeu ijkin kinemilia: “Nochimej on tekitkej ichan notataj kipiyaj miyek tlakuajli san kech kinekij kikuaj, niman nejua nikan ye nimiktikaj ikan apistli.

¹⁸ Nikisas, niman nias ne kampa nemi notataj, niman ijkin nikijlis: Ay notaj, yonitlajtlakoj itech Dios niman motech.

¹⁹ Aman xok nechmelaua* tinechitas ken nimokoneu. Aman sa xnechpiya ken se de on motekitkauan.”

²⁰ Ijkon tej, okajsik iojui niman oyaj ne ichan itataj. ’Ijkuak sanken* uejka uajlaya, on itataj okontak niman okiknelij*. Kemaj onotlaloj, okinamikito, okinapaloj niman okitenkuaj*.

²¹ Niman on tekoneu okijlij itataj: “Ay notataj, yonitlajtlakoj itech Dios niman motech. Aman xok nechmelaua* tinechitas ken nimokoneu.”

²² Pero on tajtli okinmijlij itekikauan: ¡Amantsin xkuakikan on más kuajli tlakentli*, niman xtlakentikan! Xtlaliltikan sen anillo ipan imajpil, niman no xkaktikan.

²³ Kemaj xkuajuikakan on uakaxkonetl yejuan más tomauak niman xmiktikan. ¡Aman titlakuaskej ikan miyek paktli! ¡Aman tikchiuaskej sen iluitl!

²⁴ Ijkon tikchiuaskej, pampa in nokoneu ken yomikka, pero aman oksejpa ye kipiya nemilistli. Yejua yopolijka, pero aman yones. Kemaj opejkej kichiuaj on iluitl.

²⁵ ’Ijkuak in nochijtikatka, on tekoneu yejuan yenkuiyotl nemiya neka ipan campo. Niman ijkuak ouajnokuepato niman oajsik nisiu ichan, okonkak on yejuan tlapitsaj ichan niman no okontak nijtotiua.

²⁶ Kemaj okontsajtsilij sen tekitketl niman okitlajtoltij tlinon nochijtikaj.

²⁷ On tekitketl okijlij: “Onkaj iluitl pampa mokniu youajlaj. Niman motataj otlanauatij ma kimiktikan on uakaxkonetl yejuan más tomauak, pampa mokniu oyejkok chikajtikaj niman xkualo.”

²⁸ Pero on yenkuiyotl teikniu okualan hasta xkinekiya onkalakis ichan. Yejua ika, itataj okisako para okitlajtlanilij ma kalakiti.

²⁹ Niman yejua okijlij itataj: “Tejua tikmatstikaj miyek xipan yonimitstekichiuilij, niman nochipa nimitstlakamati, pero xkaman tinechmaka nion sen chivito para nikchiuas sen iluitl inuan notlajsojkaikniuan*.

³⁰ Pero aman oyejkok in mokoneu, yejuan okipojpoloj motomin inuan on siuaauilnenkej, niman para yejua tikmiktia on uakax konetl yejuan más tomauak.”

³¹ Kemaj on tajtli okijlij: “Nokoneu, tejua nochipa nouan tinemi niman nochi tlen nikpiya tejua moyaxka.

³² Pero aman noneki tikchiuaskej iluitl niman tipakiskej, pampa mokniu ken yomikka, pero aman oksejpa kipiya nemilistli. Yejua yopolijka, pero aman yones.”