San Lucas 14 - El Nuevo Testamento

Ipan sen tonajli sábado Jesús okipajtij sen tlakatl yejuan pojposauiya

¹ Ipan sen tonajli sábado, Jesús oyaj otlakuato ichan sen tlayekanketl fariseo, niman sekimej fariseos* yejuan ompa nejnemiyaj sa kipijpiyayaj.

² No ompa nemiya sen tlakatl yejuan kipiyaya on kokolistli* itoka hidropesía. Yejua ika imauan niman ikxiuan pojposauiyaj.

³ Kemaj Jesús okintlajtoltij on temachtijkej ikan itlanauatil Dios niman on fariseos*: —¿Totlanauatil techkauilia para ipan on tonajli sábado nopajtis se yejuan kualo? ¿Kemaj noso ka?

⁴ Pero yejuamej xonauatkej. Kemaj Jesús okonkiktsij on yejuan kualo, niman okipajtij, niman okijlij ma uiya.

⁵ Niman on fariseos* okinmijlij: —¿Akinon de nemejuamej xnimantsin konkixtia sen ipoloko* noso iuakax tla onuetsi ijtik sen pozo ipan on tonajli sábado?

⁶ Niman xouelkej itlaj ika okinankilijkej.

Jesús otemachtij de on noueyimatilistli

⁷ Ijkuak Jesús okitak ika on tenotsaltin kintlapejpeniayaj on más uejueyixtokej sietas itech on mesa, okixtij in ejemplo:

⁸ —Ijkuak yakaj mitsnotsas para teuan tikpanos sen iluitl kampa nonamiktiua, maka timoseuis on kampa notlaliaj on más uejueyixtokej, pampa uelis yejkos okse yejuan más uejueyixtikaj xken tejua, niman mitsejkuaniskej.

⁹ Tla ijkon tikchiuas, on yejuan omechnots uelis yas motech niman mitsijlis: “On sieta xmaka in yejuan más ueyixtikaj.” Niman ijkuak ijkon tikakis mitsijliaj, ikan mopinauilis tias timotlalis ipan on sieta kampa notlaliaj on yejuan xuejueyixtokej.

¹⁰ Más kuajli tla ijkuak kanaj mitsnotsaskej, xmotlali ipan on sieta yejuan para on yejuan xuejueyixtokej, para ijkuak motech uajlas on yejuan omitsnots, mitsijlis: “Notlajsojkaikniu*, xmotlaliti ne ipan on más ueyixtikaj sieta.” Ijki tikselis tetlakaitalistli imixpan on tlanotsaltin yejuan ompa itech on mesa mouan yejyeuatiaskej.

¹¹ Ijkon xchiua, pampa on yejuan noueyilia, kiknotlaliskej, niman on yejuan noknotlalilia kueyiliskej.

¹² Niman on yejuan okinots Jesús no okijlij: —Ijkuak tiknekis titetlakualtis tlakualispan noso tiotlak, maka xkinnotsa motlajsojkaikniuan*, nion mokniuan, nion yejuan ken tikinta, nion on monisiuchanejkauan yejuan ricos, para maka yejuamej no kamantika mitsnotsaskej niman ijkuakon ken mitskuepiliskej on tlen otikinkualtij.

¹³ Yej oksekneka xchiua. Ijkuak tikpiyas itlaj iluitl, xkinnotsa on yejuan mayankej, on yejuan makokoxkej noso ikxitlajkomej*, on yejuan koxomej niman on yejuan ciegos.

¹⁴ Niman Dios mitstiochiuas pampa maski yejuamej xueliskej mitskuepiliskej on tlakuajli, tejua tikpiyas motlaxtlauil ipan on tonajli ijkuak on yejuan yolchipajkej yoliskej* niman nokuiteuaskej ipan intlalkon.

Jesús okixtij sen ejemplo de on ueyixtikaj tiotlak tlajkuajli

¹⁵ Ijkuak semej on yejuan yejyeuatikatkaj itech on mesa ijkon okak, okijlij Jesús: —Melauak tlatiochijtli yes on yejuan kikuas pan ne iluikak kampa Dios tlamandaroua.

¹⁶ Kemaj Jesús okijlij: —Sen tlakatl okitemakak sen ueyi tiotlak tlajkuajli, niman otlanauatij ma kinnojnotsatij miyekej tlakamej.

¹⁷ Niman ijkuak ye nisiu para tlakuaskej, okintitlan itekitkauan para ma kinmijlitij on tlanotsaltin: “Xuajlakan pampa ye onkaj listo on tlakuajli.”

¹⁸ Pero nochimej opejkej sa tlamach ika notlamiyaj ika xueliskej yaskej ipan on tiotlak tlajkuajli. On achtoj tlakatl okijtoj: “Kinamantsin onikonkou sen tlajli, niman ika onkaj nikontas. Nimitstlajtlanilia xnechtlapojpolui ika xnias ipan on tiotlak tlajkuajli.”

¹⁹ On okse okijtoj: “Nejua onikou makuijli yunta uakax, niman ye niau nikonmintas tla uelij kuajli tekitij. Tla ijkon, xnechtlapojpolui ika xnias ipan on tiotlak tlajkuajli.”

²⁰ Niman okse okijtoj: “Kemach oninonamiktij, niman yejua ika xniuelis nias.”

²¹ Kemaj on tekitki ouajnokuepato niman okitlajtlajtouilij iteko ijkon ken okinankilijkej. Kemaj, iteko okualan niman okijlij on itekitkau: “Amantsin xuiya ipan icalles niman iplazas in ueyikalpan, niman nikan xkinuajuika on mayankej, on makokoxkej, on ikxitlajkotsitsimej*, on ciegos, niman on koxomej.”

²² Más sakin*, on tekichiuilijketl okijlij: “Señor, yonikchiu tlen otinechnauatij niman sanken* onkaj kampa notlaliskej oksekimej más.”

²³ Kemaj on iteko okijlij: “Xuiya ipan on ojtsitsimej niman tekojcorralco, niman xkinchiualti oksekimej ma uajlakan para ma temi nochan.

²⁴ Ijkin xchiua, pampa nemechijlia ika nion akin de on yejuan achtopa onikinnots kikuaskej on tiotlak tlajkuajli yejuan niktemakas.”

Para se kitekipanos JesuCristo tlajyouis

²⁵ Miyek tlakatl kuitlapanuijtiayaj Jesús, niman yejua ouajnokuep, niman okinmijlij:

²⁶ —Tla yakaj uajlau notech, niman yej más kitlajsojtla* itataj, inanaj, isiuau, ikoneuan, ikniuan tlakamej niman siuamej, niman hasta sano yejua más kitlajsojtla* inemilis xken nejua, yejua xuelis nonomachtijkau yes.

²⁷ Niman on yejuan xkinekis kiselis on tlajyouilistli ipan inemilis niman xkinekis nouan yas, xuelis nonomachtijkau yes.

²⁸ Cada se de nemejuamej yejuan kineki kichijchiuas sen torre, achtopa notlalia para kixtlaloua itomin tla kaxilis para tlamis on torre.

²⁹ Tla san peuas kitlalis on cimiento* niman kemaj xok uelis tlamis, tla ijkon, kitaskej oksekimej niman peuas kuejuetskiliskej.

³⁰ Niman kijtoskej: “On tlakatl okipeualtij on itekiu niman xouel otlan.”

³¹ Cada rey yejuan yau para onouisoki iuan okse rey, achtopa kixtlaloua tla uelis kixnamikis ikan majtlaktli mil isoldados on okse rey yejuan uajlau ikan sempoajli mil isoldados.

³² Niman tla kitas ika xuelis kixnamikis, chika on okse rey sanken* uejka nemi, kintitlanilis sekimej tlakamej para kontlajtlaniliskej yolseuilistli.

³³ Ijkon tej, san akinon de nemejuamej tla xnenkauaj nochi tlen más nenkitlajsojtla, xuelis nennomachtijkauan yeskej.

Jesús otemachtij ika ipan in tlaltikpaktli on tlaneltokakej innemilis ken itlaj istatl

³⁴ ’On istatl sanoyej* kuajli, pero tla kipolos ipoyekyo, ¿kenijki tej, uelis oksejpa poyek yes? On melauak xuelis.

³⁵ Xok uelis kitekitiltiskej para on tlajli nion para se olochojli tlalpalanajli, yej san para kixiniskej. Tla nemejuamej nenkipiyaj nemotlamachilis, xkajsikamatikan on tlen nikijtoua.