San Lucas 1 - El Nuevo Testamento

San Lucas okitlajkuiluij Teófilo para kimachistis on tlen melauak itechkopa on kuajli tlajtojli

¹ Notlajsojka Teófilo, miyekej tlakamej okijkuilojkej kenijki onochiu on tlajtlamach* yejuan onochiu totsajlan.

² Nochi okijkuilojkej ijki ken otechmachistijkej on yejuan okitakej nochi on tlajtlamach* tlen onochiu desde ipeuyan, niman yejuamej okiteijlijkej itlajtol Dios.

³ Nejua no kuajli onitetlajtlajtoltij nochi on tlajtlamach* yejuan onochiu desde ipeuyan. Yejua ika, tejua ueyixtikaj Teófilo, nikuitia kuajli para nimitstlajkuiluis niman nimitstekpanilis nochi ken onochiu on tlajtlamach*.

⁴ Ijkon tej, kuajli tikmatis nochi on tlen melauak itechika on tlajtlamach* yejuan omitsmachtijkej.

Sen ángel okijlij Zacarías ika isiuau kitlakatilis ikoneu

⁵ Nochi on tlajtlamach* opeu ijkuak on rey Herodes tlamandarouaya ipan iueyitlalpan Judea. Ipan on tonaltin nemiya sen tiopixki itoka katka Zacarías, yejuan teuan nopouaya intech on tiopixkej yejuan igrupo Abías. Isiuau Zacarías itoka katka Elisabet. Yejua teuejkakoneu katka itech on tiopixki Aarón.

⁶ On omemej yolchipajkej katkaj ixpan Dios niman kitlakamatiyaj nochi on itlanauatiluan toTEKO, niman ijkon tej, xakaj ueliya itlaj ika kintlajtlakolmakaya.

⁷ Pero xkipiyayaj inkoneuan, pampa Elisabet tetsakatl* katka, niman sanoyej* ye ueuentsitsinmej katkaj.

⁸ Ijkuak oyejkok on tonaltin para tekitis on grupo kampa Zacarías nopouaya, yejua otekit ixpan Dios.

⁹ On tiopixkej kipiyayaj costumbre para kitlapejpeniayaj ikan suerte sen tiopixki, para kitlatiaya on xochikopajli ipan iueyitiopan toTEKO, niman Zacarías yejua okitocaroj kitlatis.

¹⁰ Chika kitlatiaya on xochikopajli, nochi tlakatl kichijtikatkaj oración ne ikiauak on ueyitiopan.

¹¹ Kemaj sen ángel yejuan toTEKO okuajtitlan, ouajnonextij nisiu itech Zacarías. On ángel ijkatikatka iyekmakopa on tlaixpan* kampa notlatia on xochikopajli.

¹² Ijkuak Zacarías okitak on ángel, xok kimatiya tlen kichiuas niman sanoyej onomojtij.

¹³ Pero on ángel okijlij: —Maka xmomojti, Zacarías. Dios yokak mooración, niman mosiuau Elisabet kitlakatilis itlakakoneu. Niman Tiktokayotis Juan.

¹⁴ Sanoyej tipakis niman no miyekej pakiskej ipampa itlakatilis mokoneu.

¹⁵ Ijkin nochiuas, pampa yejua ueyixtias ixpan Dios. Yejua xkonis vino nion itlaj okse yejuan tetlauantij, niman on Espíritu Santo nochipa kiyoltemitis desde ijkuak tlakatis.

¹⁶ Yejua kichiuas para miyekej tlakamej yejuan tekoneuan itech Israel ma nokuepakan niman ma kitlakamatikan toTEKO yejuan iminDios.

¹⁷ Juan yas iyakapan toTEKO ikan iyolchikaualis niman poder ken on yejuan okipix on tiotlajtojketl Elías. Yas iyakapan toTEKO, niman kichiuas para on tatajtin ma kintlajsojtlakan inkoneuan, niman no kichiuas para on yejuan xkitlakamatij Dios ma kitlakamatikan, ijkon ken on yejuan kuajkualtin tlakamej. Ijkon kinmelajkatlalis on tlakamej para ueliskej kiseliskej toTEKO.

¹⁸ Pero Zacarías okitlajtoltij on ángel: —¿Kenijki nikmatis ika on tlen otikijtoj melauak?, pampa nejua sanoyej ye niueuentsin niman nosiuau no ye lamajtsin.

¹⁹ Niman on ángel okinankilij: —Nejua niGabriel, niman niitekitkau Dios. Dios tej, onechajtitlan ma nimitsnotsaki para nimitsijlis in kuajli tlajtojli.

²⁰ Pero xotikneltokak tlinon onimitsijlij. Yejua ika tinontias. Xuelis titlajtos hasta ijkuak tlakatis mokoneu.

²¹ On tlakamej yejuan kichixtikatkaj Zacarías ne kiauak, xkimatiyaj tlinon kinemiliskej, pampa yejua youejkajka ika xuajkisaya de ijtik on ueyitiopan.

²² Niman ijkuak Zacarías ouajkis, xueliya kinnojnotsaya. Yejua ika, on tlakamej okajsikamatkej ika yejua okitak itlaj tetlatlachalistli yejuan ken itemikpan ijtik on ueyitiopan. Niman yejua sa kinmanotsaya, pampa xok ueliya tlajtouaya.

²³ Ijkuak otlan on tonaltin ika Zacarías tekiti ne ipan on ueyitiopan, okis niman oyaj ichan.

²⁴ Más sakin*, Elisabet on isiuau, ones ika ye kipiya ikoneu, niman makuijli metstli oniyan ne ichan. Ijkin kinemiliaya:

²⁵ “Aman toTEKO ijkin onechchiuilij ikan iteiknelilis* para xok nipinauas imixpan oksekimej.”

Sen ángel okijlij María ika kitlakatilis sen konetsintli

²⁶ Ijkuak Elisabet ye kipiyaya ikoneu chikuasen metstli, Dios okuajtitlan on ángel Gabriel ipan sen kalpan de Galilea itoka Nazaret.

²⁷ Dios okititlan para kinotsas sen ichpochtli, yejuan xe yakaj tlakatl iuan notekaya, itoka María. María yokitlalijka compromiso para nonamiktis iuan sen tlakatl itoka José yejuan sa teuejkajkoneu katka itech David.

²⁸ On ángel okinisiuij María niman okijlij: —Nimitstlajpaloua tlatiochijkasiuatl itechDios. ToTEKO mouan nemi. Dios más omitstiochiu de nochimej on siuamej.

²⁹ Pero ijkuak María okak on ángel, okimojkakak itlajtol, niman sano yejua kinotlajtoltiaya tline* ijkin okitlajpaloj.

³⁰ Pero on ángel okijlij: —Maka xmomojti María, pampa Dios sanoyej yomitstiochiu.

³¹ Aman tikanas mokonetsin niman tiktlakatilis sen tlakakonetl. Niman tiktokayotis Jesús.

³² Yejua ueyixtias niman itoka yes teKoneu itech on más ueyixtikaj Dios. Niman Dios toTEKO kitlalis para Rey yes, niman kipiyas on tekiuajyotl yejuan iuejkatataj David okipix.

³³ Yejua tlamandaros para nochipa ipan on país de Israel, niman itekiuajyo xkaman tlamis.

³⁴ Kemaj María okitlajtoltij on ángel: —Nejua xe yakaj tlakatl iuan ninemi. Yejua ika tej, ¿kenijki uelis nochiuas in?

³⁵ Niman on ángel okinankijlij: —On Espíritu Santo mopan uajlas, niman ipoder on yejuan más ueyixtikaj Dios kichiuas sen milagro tejua mopan. Yejua ika, on konetsintli yejuan tlakatis yolchipauak yes niman itoka yes iKonetsin Dios.

³⁶ Xkelnamiki moprima Elisabet yejuan kimatij ika xueli nokoneana. Aman ye kipiya chikuasen metstli ika koneuaj maski yejua lamajtsin.

³⁷ Ijkon nochiuas pampa xitlaj* onkaj yejuan Dios xueli kichiua.

³⁸ Niman kemaj María okijtoj: —Nejua niitekipanojkau noTEKO. Ma ijki nochiua ken yotinechijlij. Kemaj on ángel oyaj.

María okinotsato Elisabet

³⁹ Ipan on tonaltin María okajsik iojui. Niman amanaman oyaj ipan on tepemej hasta oajsik ipan sen kalpan ne Judea.

⁴⁰ Ijkuak oajsik ipan on kalpan, okalak ichan Zacarías niman okitlajpaloj Elisabet.

⁴¹ Niman ijkuak Elisabet okak itetlajpalol María, on ikonetsin onolinij ijtik, niman on Espíritu Santo okiyolten Elisabet.

⁴² Kemaj Elisabet okijtoj chikauak: —Dios más omitstiochiu xken nochimej on siuamej, niman no yokitiochiu on konetsintli yejuan tiktlakatilis.

⁴³ ¿Akin nejua tej, ika tejua yejuan inanaj noTEKO otiuajlaj para otinechnotsako?

⁴⁴ Nimantsin ijkuak otinechtlajpaloj, nokonetsin onolinij ikan paktli nikan nojtik.

⁴⁵ Dios mitstiochiua tejua yejuan otikneltokak ika nochiuas on tlen okijtoj.

⁴⁶ Kemaj María okijtoj: Noalma kiueyilia noTEKO,

⁴⁷ niman noyojlo nopaktia itech Dios yejuan noTemakixtijkau,

⁴⁸ pampa yejua onechelnamik nejua maski xniiueyitekipanojkau. Niman desde aman nochimej nechtokayotiskej nitlatiochijkasiuatl.

⁴⁹ Ijkon nochiuas pampa Dios yejuan nochi ueli kichiua, okichiu uejueyi tlajtlamach* para nejua. Yejua yektitikaj.

⁵⁰ Nochipa kimpiyalis teiknelilistli* nochimej yejuan kitlakaitaj.

⁵¹ Yejua okiteititij ipoder ikan on tlen okichiu. On yejuan noueyimatij niman san tlamach xkuajli kinejnemiliaj, Dios xkinkauilia ma kichiuakan tlen kinekij.

⁵² On uejueyitlayekankej reyes okinkixtij kampa tlamandarouayaj, niman yej okinmakak ueyilistli on yejuan yolyemankej.

⁵³ Yejuan apismikiyaj, okinmakak nochi tlen kuajli, niman xitlaj* okinmakak on yejuan ricos.

⁵⁴ Okipaleuij on país de Israel yejuan itekipanojkau. Niman yejua xokelkau kiknelis Israel,

⁵⁵ ijkon ken okimakak ipromesa on touejkatataj Abraham, niman nochi kech tekoneuan para nochipa.

⁵⁶ María onokau iuan Elisabet kanaj yeyi metstli, niman kemaj onokuep para ichan.

Otlakat Juan on tlakuatekijketl

⁵⁷ Oajsik on tonajli para Elisabet kitlakatilis ikonetsin, niman okitlakatilij sen tlakakonetl.

⁵⁸ Kemaj inisiuchanejkauan* niman on yejuan ken kintaj, ijkuak okakkej ken toTEKO sanoyej kuajli okitiochiu, pakiyaj iuan.

⁵⁹ Kemaj ipan chikueyi tonajli oyajkej para okitlalilitoj on neskayotl itoka circuncisión* ipan inakayo. Niman kinekiyaj kitokayotiskej Zacarías ken itataj,

⁶⁰ pero inanaj okijtoj: —Ka. Itoka yes Juan.

⁶¹ Niman okijlijkej: —¿Tline ijkon itoka yes? Ipan mofamilia xakaj nemi yejuan ijkon itoka.

⁶² Kemaj okimanotskej itataj on konetsintli para kimatiskej kenijki yejua kineki kitokayotis.

⁶³ Niman itataj okitlajtlan se amatl para ompa okijkuiloj ken itoka yes on ikoneu. Niman ijkin okijkuiloj: “Itoka Juan.” Niman nochimej okintlatlachaltij ika ijkon okitokayotij.

⁶⁴ Kemaj nimantsin Zacarías ouel otlajtoj oksejpa, niman opeu kiyekteneua Dios.

⁶⁵ Yejua ika, nochimej on ichanekauan otlapakaitakej. Niman nochiuiyan ipan on tepemej yejuan onkaj ipan on iueyitlalpan Judea kiteijliayaj on tlen onochiu.

⁶⁶ Nochimej on yejuan kakiyaj on tlen onochiu ijkin tlanemiliayaj niman kinotlajtoltiayaj: “¿Manin, tlinon itekiu yes in tlakakonetl?” Melauak ipoder toTEKO ipan onkaj.

Zacarías okiteijlij on tlen Dios okijlij

⁶⁷ On Espíritu Santo okiyolten Zacarías itataj on tlakakonetl, niman ika on yektlajtojli yejuan Dios okimakak, okijtoj:

⁶⁸ Ma tikueyilikan toTEKO Dios, on iminDios on hebreos*, pampa yotechitako niman yotechmakixtiko.

⁶⁹ Yotechmakak sen ueyi Temakixtijketl yejuan teuejkakoneu itech David on itekipanojkau.

⁷⁰ Ye uejkaui ijkin okijtoj intechkopa on iyektiotlajtojkauan,

⁷¹ ika yejua techmakixtis intech on totlauelikniuan, niman itech impoder nochimej on yejuan techtlauelitaj.

⁷² Ijkon okichiu para techmakas on teiknelilistli* yejuan okimprometerouilij touejkatajuan, niman xkelkaua on ichipajkapacto*.

⁷³ In yejua on promesa yejuan Dios okiprometerouilij ikan tlajtolmakalistli itech on toachtojtataj Abraham

⁷⁴ ika techmanauis intech on totlauelikniuan, para xikan nemojtijli tiktekipanoskej

⁷⁵ ikan chipajkanemilistli niman ikan melajkanemilistli nochi tonaltin ipan tonemilis.

⁷⁶ Niman tejua, nokonetsin Juan, mitstokayotiskej itiotlajtojkau on más ueyixtikaj Dios, pampa tejua tias iyakapan on toTEKO para tikuektlalijtias iojui.

⁷⁷ Titemachistis ika kiseliskej temakixtilistli ijkuak Dios kintlapojpoluilis intlajtlakoluan.

⁷⁸ ToDios sanoyej teiknelia. Ikan iteiknelilis* kinuajtitlanilis on Temakixtijketl yejuan ualeua iluikak.

⁷⁹ Niman on Temakixtijketl kinmakixtis yejuan tlajtlakouaj niman yejuan nemij ipan mikilistli. Yejuamej no kinmakas yolseuilistli.

⁸⁰ Niman on tlakakonetl noskaltiaya niman chikajtiaya itech Dios. Niman yejua ochantik neka xalpatlajkan hasta ipan on tonajli ijkuak yejua onoteititij intech on tlakamej yejuan chantij ipan on país de Israel.