San Juan 9 - El Nuevo Testamento

Jesús okipajtij sen tlakatl yejuan otlakat ciego

¹ Ijkuak Jesús panotiaya, okitak sen tlakatl yejuan otlakat ciego.

² Niman on inomachtijkauan* okitlajtoltijkej: —Temachtijketl, ¿tline* otlakat ciego in tlakatl? ¿Tlen manin pampa otlajtlakojkej itajuan, noso sano yejua otlajtlakoj?

³ Jesús okinmijlij: —Otlakat ciego xpampa tla yejua otlajtlakoj, noso itajuan otlajtlakojkej. Yej ijkon otlakat para itech nopantlantis on tlen Dios ueli kichiua.

⁴ Tejuamej ijka onkaj tikchiuaskej itekiu Dios yejuan onechajtitlan ipan in tonaltin pampa yejkoskej on tonaltin ijkuak xakaj uelis tekitis.

⁵ Chika ninemi ipan in tlaltikpaktli, nikintlamachilistia on tlakamej para kajsikamatiskej tlajtlamach* itechkopa Dios.

⁶ Ijkuak ijkon yokijtoj, ochijchak ipan tlajli, okichijchiu achijtsin sokitl ikan ikualak, niman okitlalilij ipan ixtololojuan on ciego.

⁷ Kemaj okijlij: —Xuiya xmixpajpakati ne kampa naltilo itoka Siloé. (Siloé kijtosneki “on yejuan kititlanij.”) Yejua ika on ciego oyaj niman onixpajpak, niman ijkuak ouajnokuepato ye ueliya tlachaya.

⁸ Kemaj inisiuchanejkauan* niman on yejuan kixmatiyaj ika ciego katka okijtojkej: —¿Tlen in tlakatl xejua on yejuan nochipa kitlajtlani limosna?

⁹ Sekimej kijtouayaj: —Kemaj, yejua. Oksekimej kijtouayaj: —Ka, xejua, pero ijki tlajtlachasneki. Pero sano yejua kijtouaya: —Kemaj, melauak nejua.

¹⁰ Kemaj okitlajtoltijkej: —¿Kenijki tej, onochiu ika aman ueli titlacha?

¹¹ Yejua okinmijlij: —On tlakatl yejuan itoka Jesús, okichijchiu sokitl niman onechtlalilij ipan nixtololojuan. Kemaj onechijlij: “Xuiya ne kampa naltilo itoka Siloé niman xmixpajpaka.” Nejua oniaj niman ijkuak oninixpajpak, ouel onitlachix.

¹² Kemaj okitlajtoltijkej: —¿Kanon nemi on tlakatl? Yejua okinmijlij: —Xnikmati.

On fariseos* okiyolkuitijkej on ciego yejuan opajtik

¹³ Kemaj on yejuan ciego katka okuikakej intech on fariseos*.

¹⁴ Ijkuak Jesús okichijchiu on sokitl niman okixtlapoj on ciego, on tonajli sábado katka.

¹⁵ On fariseos* okitlajtoltijkej on tlakatl kenijki aman ueli tlacha. Yejua okinmijlij: —Onechtlalilij sokitl ipan nixtololojuan, niman oninixpajpak, niman aman nitlacha.

¹⁶ Kemaj sekimej fariseos* okijtojkej: —On tlakatl ika ijkon okichiu xualeua itech Dios, pampa xkitlakamati on tlanauatijli yejuan technauatia para maka ma titekitikan ipan on tonajli sábado. Pero oksekimej kijtouayaj: —¿Kenijki ueliskia kinchiuaskia in uejueyi milagros* tla yejua tlajtlakolej yeskia? Niman ijkin onotlajkoxelojkej.

¹⁷ Kemaj oksejpa okitlajtoltijkej on yejuan ciego katka: —Niman tejua, ¿tlinon tikijtoua de on tlakatl yejuan omitsimpajtilij mixtololojuan? Niman yejua okijtoj: —Nejua nikijtoua ika yejua sen tiotlajtojketl.

¹⁸ Pero intlayekankauan on hebreos* xkinekiyaj kineltokaskej ika yejua ciego katka niman ika aman ueliya tlacha, hasta okinnotskej itajuan on yejuan opajtik,

¹⁹ niman okintlajtoltijkej: —¿In yejua nemotelpoch yejuan nenkijtouaj ciego otlakat? ¿Kenijki tej, aman ueli tlacha?

²⁰ On itajuan okijtojkej: —Tikmatij ika in yejua totelpoch niman ika ciego otlakat.

²¹ Pero xtikmatij kenijki aman ueli tlacha, nion xtikmatij akinon okimpajtilij ixtololojuan. Yejua xtlajtoltikan. Yejua xok konetl niman sano yejua uelis mechijlis kenijki opajtik.

²² On intlayekankauan hebreos* yonotlajtolmakakaj para kuajkixtiskej ne sinagoga* san akinon yejuan kijtos ika Jesús yejua Cristo. Yejua ika, ijkon okijtojkej on itajuan pampa kinmakajsiyaj itlayekankauan on hebreos*.

²³ Yejua ika itajuan okijtojkej: “Yejua xtlajtoltikan. Yejua xok konetl.”

²⁴ Kemaj on hebreos* oksejpa okinotskej on tlakatl yejuan ciego katka, niman okijlijkej: —Xtechijli ixpan Dios tlen melauak. Tejuamej tikmatstokej ika on tlakatl tlajtlakolej.

²⁵ Ijkuakon yejua okinmijlij: —Nejua xnikmati tla yejua tlajtlakolej noso ka. Yej tlinon nejua nikmatstikaj, niciego katka niman aman nitlacha.

²⁶ Niman oksejpa okitlajtoltijkej: —¿Tlinon omitschiuilij? ¿Kenijki okichiu para omitsimpajtilij mixtololojuan?

²⁷ Yejua okinmijlij: —Yonemechijlij, niman xnennechneltokaj. ¿Tline* oksejpa nenkinekij ma nemechijli? ¿Tlen no nenkinekij neninomachtijkauan* yeskej?

²⁸ Kemaj tlamach okijlikej tlen xkuajli, niman okijlijkej: —Tejua tiinomachtijkau on tlakatl, pero tejuamej tiinnomachtijkauan Moisés.

²⁹ Tejuamej tikmatstokej ika Dios okinots Moisés, pero on tlakatl, nion achijtsin xtikmatij kanon ualeua.

³⁰ Kemaj on tlakatl okinmijlij: —¡In yejua nechtlatlachaltia ika nemejuamej xnenkimatij kanon ualeua niman nejua onechimpajtilij nixtololojuan!

³¹ Kuajli tikmatstokej ika Dios xkinkaki on tlajtlakolejkej, yej san kinkaki on yejuan kitlakaitaj niman kichiuaj on tlen yejua kineki.

³² Xkaman otikakej tla yakaj kimpajtilia ixtololojuan sen tlakatl yejuan otlakat ciego.

³³ Tla in tlakatl xualeuaskia itech Dios, xueliskia itlaj kichiuaskia.

³⁴ Kemaj okijlijkej: —Tejua yejuan otitlakat tentikaj ikan tlajtlakojli, ¿tiknemilia yej tejua titechmachtis? Niman okuajkixtijkej ipan on sinagoga*.

Jesús otemachtij de on yejuan ciegos impan intlamachilis

³⁵ Jesús okimat ika on yejuan ciego katka okuajkixtijkej ne ipan on sinagoga. Niman ijkuak okinamik, okijlij: —¿Tikneltoka iKonetsin Dios?

³⁶ On tlakatl okijlij: —Señor, xnechijli akinonon para uelis nikneltokas.

³⁷ Jesús okijlij: —Tejua yotikitak, niman sano nejua yejuan mouan nitlajtojtikaj.

³⁸ Kemaj on tlakatl onotlakuantelkets ixpan Jesús, niman okijlij: —NoTEKO, nimitsneltoka.

³⁹ Kemaj Jesús okijlij: —Nejua oniuajlaj ipan in tlaltikpaktli para niteyolkuitis, niman ijkin on yejuan ciegos uelis tlachaskej niman on yejuan tlachaj nochiuaskej ciegos.

⁴⁰ Kemaj sekimej fariseos* yejuan ompa iuan nemiyaj, ijkuak ijkon okakkej, okitlajtoltijkej: —¿Tikijtosneki ika tejuamej ken ticiegos ipan totlamachilis niman yejua ika xtikajsikamatij on tlajtlamach* itechkopa Dios?

⁴¹ Jesús okinmijlij: —Tla xnenkajsikamatiskiaj, xnenkipiyaskiaj tlajtlakojli. Pero pampa nenkijtouaj ika nenkajsikamatij, on tlajtlakojli nemopan onkaj.