San Juan 8 - El Nuevo Testamento

¹ pero Jesús oyaj ne ipan on tepetl itoka Olivos.

² Uajmostla ijkuak ouajtlanes, oksejpa oyaj ne ipan on ueyitiopan. Nochi tlakatl okinisiuij, niman yejua onotlalij niman opeu kinmachtia.

³ Kemaj on temachtijkej ika on tlanauatijli niman on fariseos* okuajuikakej se siuatl yejuan okinextikej ipan tlajtlakojli iuan sen tlakatl yejuan xiueuentsin. Okitlalijkej ne tlajkotian imixpan nochimej.

⁴ Niman ijkin okijlijkej Jesús: —Temachtijketl, in siuatl otiknextijkej iuan se tlakatl ipan tlajtlakojli.

⁵ On itlanauatil Moisés technauatia tiktemojmotlaskej niman tikmiktiskej in ken in siuatl. ¿Tejua ken tikijtoua?

⁶ Yejuamej ijkon okijlijkej san para okitlatlatakej, niman ijki ye ueliskiaj kiteixpanuiskiaj. Pero Jesús ouajnopachoj niman opeu tlatlajkuiloua ipan tlajli ikan imajpil.

⁷ Pero ika más kitlajtoltiayaj, yejua ouajnauatelkets, niman okinmijlij: —San akinon yejuan xkaman tlatlajkoua, yejua achtoj ma kimotla.

⁸ Niman kemaj, oksejpa onopachoj niman oksejpa otlajkuiloj ipan tlajli.

⁹ Pero ijkuak yejuamej ijkon okakkej, okimatkej ika okintlajtlakolmakak intlamachilis, niman cada se de yejuamej oyajyajkej. Achtopa opejkej yauij on yejuan más ueuetkej. Niman ijkuak nochimej yoyajkej, Jesús iselti onokau iuan on siuatl yejuan ompa onokau ne ixpan.

¹⁰ Kemaj Jesús ouajnauatelkets niman ika xok yakaj okitak yej san on siuatl, okijlij: —Siuatl, ¿kanon nemij on yejuan mitsteixpanuiyayaj? ¿Xakaj omitstlajtlakolmakak?

¹¹ Yejua okijlij: —Ka noTEKO, xakaj. Kemaj Jesús okijlij: —Tej, nion nejua xnimitstlajtlakolmaka. Aman xuiya, pero maka oksejpa titlajtlakos.

Jesús yejua sen tlauijli ipan in tlaltikpaktli

¹² Jesús oksejpa okinnots on tlakamej niman okinmijlij: —Nejua nitlauijli ipan in tlaltikpaktli. Yejuan yas nouan, xnejnemis kampa tlayouajtok, yej nejnemis ipan on tlauijli yejuan kimakas yenkuik nemilistli.

¹³ Kemaj on fariseos* okijlijkej: —Tejua sano moka titlajtoua, niman on tlen tikijtoua xmelauak.

¹⁴ Jesús okinmijlij: —Tlen nejua nikijtoua, kemaj melauak maski sano nejua noka nitlajtoua, pampa nikmati kanon niualeua niman kanon niau. Pero nemejuamej xnenkimatij kanon niualeua nion kanon niau.

¹⁵ Nemejuamej nentetlajtlakolmakaj ken on tlaltikpaktlakamej kichiuaj. Pero nejua xakaj niktlajtlakolmaka.

¹⁶ Pero tla nitetlajtlakolmakaskia, notetlajtlakolmakalis nikchiuaskia ken kitocaroua, pampa xnoselti nitetlajtlakolmakaskia. NoTajtsin yejuan onechajtitlan iuan nitetlajtlakolmakaskia.

¹⁷ Ipan nemotlanauatil tlajkuilolnestikaj ijkuak omemej testigos san se tlajtojli kijtouaj, on tlen kijtouaj melauak.

¹⁸ Sano nejua noka ninotestigojtlalia, niman noTajtsin yejuan onechajtitlan, no yejua notestigo.

¹⁹ Kemaj okitlajtoltijkej: —¿Kanon nemi moTajtsin? Jesús okinnankilij: —Nemejuamej xnennechixmatij, nion noTajtsin xnenkixmatij. Tla nennechixmatiskiaj, no nenkixmatiskiaj noTajtsin.

²⁰ Jesús okijtoj in tlajtlamach* chika temachtiaya ne ijtik on ueyitiopan kampa kejeuayaj on uentomin. Pero xakaj okajsik, pampa sanken* xe yejkoya on tonajli para ijkon ipan nochiuas.

Jesús okijtoj ika yas kampa oksekimej xueliskej yaskej

²¹ Jesús oksejpa okinmijlij: —Nejua yenau, niman nemejuamej nennechtejtemoskej. Pero nemejuamej nenmikiskej ipan nemotlajtlakol. Tej, kampa nejua niau, nemejuamej xuelis nenyaskej.

²² Kemaj on hebreos* okijtojkej: —¿Manin yej nomiktis sano yejua? Kas kemaj, niman yejua ika kijtoua xuelis tiaskej kampa yejua yas.

²³ Jesús okinmijlij: —Nemejuamej nenkisaj nikan ipan tlaltikpaktli, pero nejua oniualeu ne iluikak. Nemejuamej nenkisaj ipan in tlaltikpaktli, pero nejua xnikisa ipan in tlaltikpaktli.

²⁴ Onemechijlij ika nenmikiskej ipan nemotlajtlakol. Tla xnennechneltokaj ika nejua niCristo yejuan Dios onechtlalij para nitlamandaros, nenmikiskej ipan nemotlajtlakol.

²⁵ Kemaj okitlajtoltijkej: —¿Tlen akin tejua? Niman Jesús okinmijlij: —Nejua desde ijkuak onipeu nitemachtia yonemechijlijka akin nejua.

²⁶ Nikpiya miyek tlajtlamach* tlen nemoka nikijtos niman tlen nemechtlajtlakoltis. Pero noTajtsin yejuan onechajtitlan yejua kijtoua tlen melauak. Niman tlen nikijtoua ipan in tlaltikpaktli on yejua onikak itech.

²⁷ Pero yejuamej xokajsikamatkej ika kiteneuaya on iTajtsin.

²⁸ Yejua ika okinmijlij: —Ijkuak nemejuamej nennechajkopiloskej ipan sen kojnepanojli*, nejua yejuan oninochiu Tlakatl, ijkuakon nenkimatiskej akin nejua. Niman nenkimatiskej ika xitlaj* nikchiua yejuan san nejua nikneki, yej san nikijtoua on tlen noTajtsin yonechmachtij.

²⁹ On yejuan onechajtitlan nouan nemi. NoTajtsin xnoselti nechkaua, pampa nejua nochipa nikchiua tlen yejua kuelita.

³⁰ Ijkuak Jesús ijkin okijtoj, miyekej okineltokakej.

Yejuan tlajtlakoua nokaua esclavo itech on tlajtlakojli

³¹ Kemaj Jesús okinmijlij on hebreos* yejuan okineltokakej: —Tla nenmelajkanemiskej ipan on tlen nemechijlia, nenmochiuaskej melauak nennomachtijkauan.

³² Nenkixmatiskej tlen melauak, niman on tlen melauak yejua mechmanauis.

³³ Yejuamej okijlijkej: —Tejuamej tiiuejkakoneuan Abraham niman xkaman yakaj otechpix esclavos. ¿Kenijki tej, tikijtoua ika tikpiyaskej temanauilistli?

³⁴ Jesús okinmijlij: —Ika tlen melauak nemechijlia ika nochimej yejuan tlajtlakouaj, yejuamej nokaua esclavos itech on tlajtlakojli.

³⁵ Sen esclavo xkaman teuan tlapouajli ipan se chanyotl*, pero sen tekoneu kemaj nochipa teuan tlapouajli ipan on chanyotl*.

³⁶ Tla nejua yejuan niiKoneu Dios nemechmanauis, nemejuamej melauak nennemiskej tlamakaualtin intech nemotlajtlakoluan.

³⁷ Ye nikmatstikaj ika nemejuamej neniuejkakoneuan Abraham. Pero nenkinekij nennechmiktiskej pampa xnenkiseliaj tlen nemechijlia.

³⁸ Nejua nikijtoua on tlen noTajtsin nechititia, niman nemejuamej nenkichiuaj tlen nemotataj mechijlia.

³⁹ Yejuamej okijlijkej: —Tejuamej totataj Abraham. Pero Jesús okinmijlij: —Tla nemejuamej melauak nentekoneuan yeskiaj itech Abraham, nenkichiuaskiaj on tlajtlamach* yejuan okichiu.

⁴⁰ Pero maski nemechijlia on tlen melauak yejuan Dios yonechijlij, nemejuamej nenkinekij nemechmiktiskej. ¡Abraham xkaman itlaj ijkon okichiu!

⁴¹ Nemejuamej sano yejua nenkichiuaj on tlen kichiua nemotataj. Kemaj yejuamej okijlijkej: —Tejuamej xtiteichtakakoneuan. San se tajtli tikpiyaj niman on yejua Dios.

⁴² Niman Jesús okinmijlij: —Tla melauak Dios nemoTajtsin yeskia, nemejuamej nennechtlajsojtlaskiaj*, pampa nejua niualeua itech Dios niman aman nikan ninemi. Xoniuajlaj san pampa oniknek, yej oniuajlaj pampa Dios onechajtitlan.

⁴³ ¿Tline* xueli nenkajsikamatij on tlen nemechijlia? On pampa xnenkinekij nenkiseliskej notemachtil.

⁴⁴ Nemejuamej nemotataj on diablo*, niman nenkinekij nenkichiuaskej tlinon yejua kineki. On diablo* desde opeu in tlaltikpaktli temiktia. Xkaman kijtoua on tlen melauak, pampa xkipiya ipan iyojlo on tlen melauak. Ijkuak kijtoua on tlen xmelauak, san kijtoua ken nochipa nouika, pampa yejua tlakajkayaua niman yejua imintataj on yejuan tlakajkayauaj.

⁴⁵ Pero nejua pampa nikijtoua tlen melauak, xnennechneltokaj.

⁴⁶ ¿Akinon de nemejuamej uelis nechititis ika nikpiya sen tlajtlakojli? Niman tla nikijtoua tlen melauak, ¿tline xnennechneltokaj?

⁴⁷ On yejuan ikoneuan Dios kakij on itlajtoltsin Dios. Pero nemejuamej xnenikoneuan Dios. Yejua ika xnenkinekij nenkakiskej.

Ijkuak Abraham otlakat, Cristo ye nemiya

⁴⁸ Kemaj on hebreos* okijlijkej: —¿Xtikijtouaj tlen melauak ijkuak tikijtouaj ika tejua tisamaritano niman mojtik nemi on xkuajli espíritu?

⁴⁹ Jesús okinmijlij: —Nejua xnemi notik nion se xkuajli espíritu. Pero nejua niktlakaita noTajtsin, niman nemejuamej xnennechtlakaitaj.

⁵⁰ Nejua xniktejtemoua para on tlakamej ma nechtlakaitakan. Nemi okse yejuan kintejtemoua tlakamej para ma nechtlakaitakan. Yejua teyolkuitia niman tetlajtlakolmaka.

⁵¹ Ika tlen melauak nemechijlia ika yejuan kichiua on tlen nejua nikijtoua, xkaman mikis.

⁵² Ijkuakon on hebreos* okijlijkej: —Aman kuajli tikmatij ika tikpiya sen xkuajli espíritu. Abraham niman nochimej on tiotlajtojkej omikkej, niman tejua tikijtoua: “Yejuan kichiua on tlen nejua nikijtoua, xkaman mikis.”

⁵³ ¿Tla ijkon, tejua más tiueyixtikaj xken totataj Abraham yejuan omik? Niman on tiotlajtojkej no omikkej. ¿Akinon tikuitia tejua in?

⁵⁴ Jesús okinmijlij: —Tla sano nejua ninotlakaita, notlakaitalis xitlaj* kijtosneki. Pero noTajtsin kemaj nechtlakaita, on yejuan nemejuamej nenkijtouaj ika nemoDios.

⁵⁵ Nemejuamej xnenkixmatij, pero nejua, kemaj nikixmati. Tla nikijtoskia xnikixmati, tla ijkon, nitlakajkayajki yeskia no ken nemejuamej. Pero nejua melauak nikixmati niman nikchiua nochi on tlen yejua kijtoua.

⁵⁶ Abraham on nemoachtojtataj opak pampa okimat ika niuajtlakatiskia ipan in tlaltikpaktli. Yejua itechkopa itlaneltok onechitak niman yejua ika opak.

⁵⁷ Kemaj on hebreos* okijlijkej Jesús: —Nion cincuenta xipan xe tikpiya, ¿niman tikijtoua ika otikitak Abraham?

⁵⁸ Jesús okinmijlij: —Ika tlen melauak nemechijlia: ijkuak Abraham xe nemiya, nejua ye ninemiya.

⁵⁹ Kemaj okontilankej temej para kimojmotlaskiaj. Pero Jesús oniyan, niman okisteu ne ipan on ueyitiopan.