San Juan 7 - El Nuevo Testamento

Ikniuan Jesús no xokineltokakej

¹ Ijkuak ijkin yonochiu, Jesús kistinemiya iueyitlalpan Galilea. Xkinekiya kistinemis ne Judea pampa ompa itlayekankauan on hebreos* kinekiyaj kimiktiskej.

² Iniluiu on hebreos* itoka tabernáculos* ye nisiu katka

³ niman ikniuan okijlijkej: —Maka nikan xmokaua. Xuiya ne Judea para on monomachtijkauan yejuan ompa nemij no ma kitakan on milagros.

⁴ Ijkuak se kineki ma kuajli kixmatikan, xkichtakachiua on tlajtlamach* yejuan kichiua. Niman pampa tikteneua ika tikchiua in ken in tlajtlamach*, xchiua ixpan nochi tlakatl.

⁵ On ikniuan ijkon okijlijkej pampa nion yejuamej xkineltokayaj.

⁶ Kemaj Jesús okinmijlij: —Sanken* xe yejko on tonajli para nias, pero para nemejuamej san katlejua tonajli kuajli para nenyaskej.

⁷ On tlaltikpaktlakamej xuelis itlaj ika mechtlauelitaskej nemejuamej. Pero nejua kemaj, nechtlauelitaj pampa nikinmixkomaka nochi on tlen tlajtlamach* xkuajli kichiuaj.

⁸ Xuiyan nemejuamej ne ipan on iluitl. Nejua xe niau pampa sanken* xe ajsi on tonajli para nias.

⁹ Niman ijkuak ijkon okinmijlij, ompa onokau Galilea.

Jesús oyaj ipan on iluitl itoka tabernáculos*

¹⁰ Sakin ijkuak yoyajkej ikniuan, yejua no oyaj ne ipan on iluitl. Pero xonoteititij, yej san ichtaka*.

¹¹ Itlayekankauan on hebreos* kitejtemouayaj ne kampa iluitl, niman kijtouayaj: —¿Manin kanon nemi on tlakatl?

¹² Niman intsajlan on tlakamej miyekej tlajtlajtouayaj. Sekimej kijtouayaj: “Yejua sen kuajli tlakatl.” Pero oksekimej kijtouayaj: “Ka. Xkuajli tlakatl pampa kinkajkayaua on tlakamej.”

¹³ Pero xakaj teixpan kiteneuaya pampa kinmakajsiyaj intlayekankauan on hebreos*.

¹⁴ On iluitl ye tlajkotipan yaya ijkuak Jesús okalak ipan on ueyitiopan, niman opeu temachtia.

¹⁵ Niman intlayekankauan on hebreos* ijkin kitouayaj ikan tlatlachalistli: —¿Kenijki ueli kimati in tlajtlamach* niman xonomachtij?

¹⁶ Jesús okinmijlij: —Notemachtil xnoyaxka*, yej onikselij itech on yejuan onechajtitlan.

¹⁷ Tla yakaj kipiya iyojlo para kichiuas on tlen Dios kineki, yejua kimatis tla notemachtil ualeua itech Dios, noso tla nitemachtia on tlen san nejua niknejnemilia.

¹⁸ On yejuan tlajtlajtoua san on tlen yejua kinemilia, kichiua san para on tlakamej ma kueyilikan. Pero on yejuan kichiua kanika para yej ma kiueyilikan on yejuan oteuajtitlan, on yejua kijtoua tlen melauak niman xkaman tlakajkayaua.

¹⁹ ’Maski Moisés omechmakak on tlanauatijli, nion semej nemejuamej xnenkitlakamatij on tlanauatijli. Yejua ika, ¿tline* nenkinekij nennechmiktiskej?

²⁰ On tlakamej okinankilijkej: —Mojtik nemi sen xkuajli espíritu. ¿Akinon kineki mitsmiktis?

²¹ Jesús okinmijlij: —San ika on se tekitl onikchiu ipan on tonajli sábado nemochimej* omechtlachachaltij.

²² Moisés omechnauatij xtlalikan on neskayotl itoka circuncisión* ipan nemotlakakoneuan (maski Moisés xejua okipeualtij, yej on iachtojtajuan). Yejua ika, nenkitlaliaj on neskayotl ipan sen tlakakonetl niman nenkichiuaj maski ipan sábado.

²³ Tla nenkitlaliaj on neskayotl ipan sen tlakakonetl ipan sábado para nenkitlakamatij itlanauatil Moisés, tla ijkon, ¿tline nennechtlauelitaj ika onikpajtilij nochi itlalnakayo sen tlakatl ipan on tonajli?

²⁴ Maka xtetlajtlakolmakakan san isijkapan. Yej san xtlajtlakolmakakan yakaj tla melauak nenkimatij ika okichiu tlen xkuajli.

Jesús okijtoj kanon oualeu

²⁵ Sekimej yejuan chantiyaj Jerusalén opeu kinotlajtoltiaj: —¿Tlen xejua in kitejtemojtinemij para kimiktiskej?

²⁶ Aman tej, nikan tlajtlajtojtikaj teixpan, niman xakaj itlaj kijlia. ¿Manin on tekiuajkej melauak kineltokaj ika in tlakatl yejua Cristo yejuan Dios okitlalij para tlamandaros?

²⁷ Pero in xejua Cristo pampa tejuamej tikmatstokej kanon oualeu. Ijkuak uajlas Cristo, xakaj kimatis kanon ualeuas.

²⁸ Ijkuak Jesús ijkon okak, chika temachtijtikatka ipan on ueyitiopan, ikan chikauak tlajtojli okijtoj: —¿Melauak nennechixmatij niman nenkimatstokej kanon niualeua? Nejua xoniuajlaj san pampa nejua oniknek, yej oniuajlaj pampa onechajtitlan on yejuan melauak nochipa kichiua tlen kijtoua. Niman nemejuamej xnenkixmatij.

²⁹ Pero nejua kemaj nikixmati pampa itech niualeua, niman yejua onechajtitlan.

³⁰ Kemaj kinekiyaj kajsiskej, pero xakaj okajsik pampa sanken* xe ajsiya on tonajli para ijkon nochiuas.

³¹ Pero miyekej okineltokakej, niman okijtojkej: —Tikneltokaj ika in tlakatl yejua Cristo pampa xakaj uelis uajlas yejuan kichiuas más milagros* ken yejua in tlakatl.

On fariseos* okintitlankej policías para ma kajsikan Jesús

³² On fariseos* okakkej tlinon kijtouayaj itechkopa Jesús, niman yejua ika yejuamej inuan intlayekankauan on tiopixkej okintitlankej policías yejuan tekitij ipan on ueyitiopan para kajsiskiaj.

³³ Niman Jesús okijtoj: —Sa keski tonajli nemouan ninemis, niman kemaj nias itech on yejuan onechajtitlan.

³⁴ Nemejuamej nennechtejtemoskej pero xnennechnextiskej, pampa xuelis nenyaskej ne kampa nejua ninemis.

³⁵ Kemaj on hebreos* opeu sano yejuamej kinotlajtoltiayaj: —¿Kanon tej, yas kampa xuelis tikonextiskej? ¿Manin yas intech on hebreos* yejuan chajchayajkachantij* intsajlan on griegos* niman kominmachtis on griegos*?

³⁶ ¿Tlinon kijtosneki on ika otechijlij: “Nennechtejtemoskej pero xnennechnextiskej”, niman “Xuelis nenyaskej kampa nejua ninemis”?

Jesús okiteneu on atl yejuan kitemaka nemilisti

³⁷ On sa ika nochi tonajli ipan on iluitl más ueyi kitosneki. Ipan on tonajli Jesús onotelkets niman ikan chikauak tlajtojli okijtoj: —Tla yakaj amiki, ma uajla notech niman ma atli.

³⁸ On Yektlajkuilojli kijtoua ika yejuan nechneltokas, ipan iyojlo ameyas sen atl yejuan kimakas nemilistli para nochipa. Niman on atl miyek yes ken itlaj río.

³⁹ Jesús okijtoj in itechkopa on Espíritu Santo yejuan kiseliskej on yejuan kineltokaskej. Ipan on tonaltin sanken* xe uajlaya on Espíritu Santo, pampa Jesús sanken* xe tlejkouaya ne iluikak para kiselis ueyilistli.

On tlakamej onoxexelojkej

⁴⁰ Sekimej yejuan nemiyaj intsajlan on tlakamej, ijkuak ijkon okakkej, okijtojkej: —Tlakaj melauak, in tlakatl yejua tiotlajtojketl yejuan ika onkatka para uajlas.

⁴¹ Niman sekimej kijtouayaj: —In yejua Cristo yejuan Dios okitlalij para tlamandaros. Pero oksekimej okijtojkej: —In xejua Cristo pampa Cristo xualeuas Galilea.

⁴² On Yektlajkuilojli kijtoua ika Cristo ika onkaj teuejkakoneu yes itech rey David niman ika tlakatis ne Belén sano ipan on kalpan kampa onen David.

⁴³ Yejua ika on tlakamej onoxexelojkej ipampa Jesús.

⁴⁴ Sekimej kinekiyaj kajsiskej, pero xakaj okajsik.

On hebreos* yejuan tekiuajkej xokineltokakej Jesús

⁴⁵ On policías yejuan cuidarouaj on ueyitiopan onokuepkej ne kampa nemiyaj on fariseos* niman intlayekankauan on tiopixkej. Kemaj ijkin okintlajtoltijkej on policías: —¿Tline* xonenkuajuikakej?

⁴⁶ Niman on policías otlanankilijkej: —¡Xkaman yakaj tlajtlajtouaya ken tlajtlajtoua on tlakatl!

⁴⁷ Kemaj on fariseos* okinmijlijkej: —¿No omechkajkayau nemejuamej?

⁴⁸ ¿Nenkitaj yakaj totlayekankau noso sen fariseo* yotlaneltokak?

⁴⁹ Pero on kech tojlamej yejuan xkimatij itlanauatil Moisés kiseliskej itlauelil Dios.

⁵⁰ Nicodemo, yejuan okitatoya Jesús ijkuak tlayoua, niman yejuan inuan nopoua on fariseos*, okinmijlij:

⁵¹ —Ipan totlanauatil kijtoua ika xtiueliskej tiktlajtlakolmakaskej sen tlakatl tla xachtopa tikyolkuitiaj para tikmatiskej on tlen okichiu.

⁵² Kemaj okijlijkej: —¿Tejua no tiualeua ne Galilea? Xmomachti on Yektlajkuilojli, niman tikitas ika Galilea xkaman ualeuaj tiotlajtojkej.

On siuatl yejuan tlakapapatlaketl nemiya ixpan Jesús

⁵³ Kemaj cada se oyaj ichan,