San Juan 6 - El Nuevo Testamento

Jesús okitlakualtij makuijli mil tlakatl

¹ Sakin ijkuak ijkon yonochiu, Jesús oyaj ipan okse ilado on mar itoka Galilea yejuan no itoka Tiberias.

² Sanoyej miyek tlakatl yaya iuan, pampa yokitakaj on milagros* yejuan okichiu ika okimpajtij on kokoxkej.

³ Kemaj Jesús otlejkok ipan sen tepetl niman ompa onotlalij iuan inomachtijkauan*.

⁴ Ipan on tonaltin ye nisiu katka para on hebreos* kichiuaskej on iluitl itoka Pascua*.

⁵ Niman Jesús okitak iyeualkan ika miyek tlakatl kinisiuiyaya. Yejua ika okijlij Felipe: —¿Kanon tikouaskej tlakuajli para nochimej in tojlamej?

⁶ Jesús kuajli kimatstikatka tlinon kichiuas, pero yejua ijkon okijlij san para kitas tlinon kijtos Felipe.

⁷ Niman Felipe okijlij: —Se tlakatl noneki tekitis kanaj ome ciento tonaltin para uelis kouas pan para nochimej in tojlamej. Maski Ijkon kichiuaskia xkajxilis nion siquiera para cada se kikuas se pitentsin.

⁸ Kemaj Andrés, yejuan semej on inomachtijkauan niman yejuan ikniu Simón Pedro, okijlij:

⁹ —Nikan nemi sen tlakakonetl yejuan kipiya makuijli pan tlachijchitli ikan cebada niman ome michintsitsimej. Pero ¿tlinon kijtojtikaj in achijtsin tlakuajli para in miyek tlakatl?

¹⁰ Kemaj Jesús okijlij: —Xkimijlikan ma noseuikan nochimej. Ne kampa nemiyaj onkatka miyek sakatl niman ompa onotlajtlalijkej. On tolamej katkaj kanaj makuijli mil tlakamej. (On siuamej xteuan okimpojkej.)

¹¹ Kemaj Jesús okontilan on pan niman, ijkuak yokimakak tlaxtlauijli Dios, okinmakak on inomachtijkauan*, niman on nomachtijkej* okinxelouilijkej nochimej on yejuan ompa yejyeuatikatkaj. Sano ijki okichiu ika on michimej niman nochimej yejuamej otlakuajkej san kech kinekiyaj.

¹² Ijkuak yoixuikej, Jesús okinmijlij on inomachtijkauan*: —Xsentlalikan nochi on tlen onokau para maka itlaj ma ixpoliui.

¹³ Ijkon tej, okisentlalijkej on tlatlajkotsitsin yejuan onokau itech on makuijli pan tlachijchijtli ikan cebada niman okitemiltijkej majtlaktli uan ome chikiutin.

¹⁴ Kemaj ijkuak on tlakamej okitakej on milagro yejuan Jesús okichiu, okijtojkej: —Melauak in yejua tiotlajtojketl yejuan ye onkatka para uajlaskia ipan in tlaltikpaktli.

¹⁵ Kemaj Jesús okimat ika kinekiyaj kasiskej para kalaktiskej inrey. Yejua ika, oksejpa onejkuanij niman iselti oyaj ipan on tepetl.

Jesús onejnen ipan mar

¹⁶ Ijkuak otlayouak on inomachtijkauan* Jesús otemotoj itech on mar.

¹⁷ Niman otlejkokej ipan sen barco niman opeu kipanauiyaj on mar para ajsiskej ne Capernaúm. Ye tlayoua katka niman Jesús sanken* xe uajlaya intech.

¹⁸ Niman opeu chikauak ajaka, niman tejmotij koxoniya on mar.

¹⁹ Niman ijkuak yokinejnenkej kanaj makuijli noso chikuasen kilómetros, okitakej Jesús nejnentiu ipan on atl niman ye kinisiuijtiaya on barco. Niman yejuamej onomojtijkej.

²⁰ Pero yejua okinmijlij: —¡Nejua niJesús, maka xmomojtikan!

²¹ Kemaj, yejuamej ikan paktli okiselijkej ipan on barco, niman sa okitakej yoajsikej ne atlatenko kampa yayaj.

On tlakamej okitejtemojkej Jesús

²² Uajmostla, on tlakamej yejuan onokajkaj ipan on okse itenko on mar okimatkej ika on nomachtijkej* oyajkej ipan on san ika nochi barco yejuan ompa nemiya, niman ika Jesús xinuan oyaj.

²³ Pero saniman oyejkokej sekimej barcos yejuan oualejkej ipan on ueyikalpan itoka Tiberias. Yejuamej oyejkokej ne kampa nisiu okuajkej on pan ijkuak toTEKO okimakak tlaxtlauijli Dios.

²⁴ Niman ijkuak on tlakamej okitakej ika xompa nemiya Jesús nion inomachtijkauan*, okalakkej impan on barcos niman oyajkej okitejtemotoj ne Capernaúm.

Jesús sano yejua pan yejuan kitemaka nemilistli para nochipa

²⁵ Ijkuak on tlakamej oajsikej ipan on okse ilado on mar, okinextitoj Jesús, niman okitlajtoltijkej: —Temachtijketl, ¿kamanon otejkok nikan?

²⁶ Pero Jesús okinmijlij: —Ika tlen melauak nemechijlia nemejuamej nennechtejtemouaj xpampa onenkajsikamatkej tlen kijtosneki on milagro yejuan onikchiu yaloua ijkuak onemechtlakualtij, yej san pampa onentlakuajkej hasta kampa onemixuikej.

²⁷ Maka xtekitikan ipampa on tlakuajli yejuan saniman tlami, yej xtekitikan ipampa on tlakuajli yejuan kisa itech Dios yejuan kitemaka nemilistli para nochipa. Nejua yejuan oninochiu Tlakatl nemechmakas in tlakuajli pampa noTajtsin onechmakak tlanauatijli para ijkin nikchiuas.

²⁸ Kemaj okitlajtoltijkej: —¿Tlinon noneki tikchiuaskej para tikchiuaskej on tlajtlamach* yejuan Dios kineki ma tikchiuakan?

²⁹ Niman Jesús okinmijlij: —On tlen Dios kineki xchiuakan sano yejua in: Xnechneltokakan nejua yejuan onechajtitlan.

³⁰ Niman kemaj ijkin okitlajtoltijkej: —¿Tlen tlamauisojli titechititis para ijkuak yotikitakej timitsneltokaskej? ¿Tlinon tej, tikchiuas?

³¹ On Yektlajkuilojli kijtoua ika ne xalpatlajkan on toachtojtajuan okuajkej on maná. Ijkin tej, kijtoua on Yektlajkuilojli: “Dios okintlakualtij ika on pan yejuan ne iluikak ualeua.”

³² Jesús okinmijlij: —Ika tlen melauak nemechijlia: Moisés xejua okitemakak on pan yejuan ualeua iluikak. Yej noTajtsin yejua kitemaka on pan yejuan melauak ualeua iluikak.

³³ On pan yejuan Dios kitemaka sano yejua on pan yejuan ouajtemok de ne iluikak niman kinmaka nemilistli on tlaltikpaktlakamej.

³⁴ Kemaj okijlijkej: —ToTEKO, nochipa xtechmaka on pan.

³⁵ Niman Jesús okinmijlij: —Nejua nipan yejuan kitemaka nemilistli. Yejuan notech uajlau xkaman apismikis, niman yejuan nechneltokas xkaman amikis.

³⁶ Pero ken nejua yonemechijlij, nemejuamej xnennechneltokaj maski yonennechitakej.

³⁷ Nochimej on kech nechinmakas noTajtsin uajlaskej notech, niman on yejuan uajlaskej notech nikinselis.

³⁸ Ijkin nikchiuas pampa nejua oniualeu iluikak xpara nikchiuas tlen nejua nikneki, yej para nikchiuas on tlen kineki on yejuan onechajtitlan.

³⁹ Niman noTajtsin yejuan onechajtitlan xkineki nikpolos nion se on yejuan onechinmakak, yej ipan on sa ika nochi tonajli ma nikinyoliti niman ma nikinketsteua ipan intlalkon.

⁴⁰ Yejua kineki para nochimej on yejuan kimatij akin nejua yejuan niiKoneu Dios niman nechneltokaj, ma kipiyakan nemilistli para nochipa. Niman nejua nikinyolitis niman nikinkuiteuas ipan intlalkon ipan on sa ika nochi tonajli.

⁴¹ On hebreos* opejkej tlamach xkuajli kijtouiliaj Jesús pampa ijkin okijtoj: “Nejua nipan on yejuan ne iluikak oniualeu.”

⁴² Niman okijtojkej: —¿Tlen in xejua Jesús, on ikoneu José? Tejuamej tikixmatij itataj niman inanaj. Yejua ika, ¿man tline aman kijtoua ika ualeua iluikak?

⁴³ Kemaj Jesús okinmijlij: —Maka sa tlamach xkijtojtiakan tlen xkuajli.

⁴⁴ Xakaj ueli notech uajlau tla xkinotsa noTajtsin. Niman nejua nikyolitis niman nikuiteuas ipan itlalkon ipan on sa ika nochi tonajli.

⁴⁵ Ipan intlajkuilolamauan on tiotlajtojkej ijkin kijtoua: “Dios kinmachtis nochimej.” Ijkon tej, nochimej yejuan kitenkakij toTajtsin niman kiseliaj on tlen yejua kinmachtia, notech uajlauij.

⁴⁶ Xakaj okitak on noTajtsin, yej san nejua yejuan itech oniualeu onikitak yejua.

⁴⁷ Ika tlen melauak nemechijlia, ika on yejuan nechneltoka kipiya nemilistli yejuan para nochipa.

⁴⁸ Nejua nipan on yejuan kitemaka nemilistli para nochipa.

⁴⁹ On nemoachtojtajuan okuajkej on maná ne kampa xalpatlajkan. Maski okuajkej, xonenkej para nochipa, yej omikkej.

⁵⁰ Pero on yejuan kikuaskej on pan yejuan ualeua iluikak xmikiskej.

⁵¹ Nejua nipan yejuan kitemaka nemilistli niman yejuan oniualeu iluikak. Yejuan kikuas in pan nemis para nochipa. On pan yejuan nejua nikmakas sano yejua nonakayo yejuan nikuentlalis para on tlaltikpaktlakamej ueliskej nemiskej para nochipa.

⁵² Kemaj on hebreos* opejkej sano yejuamej nokamauisojkij. Kijtouayaj: —¿Kenijki tej, uelis sano inakayo techkualtis?

⁵³ Jesús okinmijlij: —Nejua yejuan onochiu Tlakatl ika tlen melauak nemechijlia, tla nemejuamej xnenkikuaj nonakayo niman xnenkonij noyesyo, xnennemiskej para nochipa.

⁵⁴ Yejuan kikua nonakayo niman koni noyesyo kipiya nemilistli para nochipa, niman nejua nikyolitis niman nikuiteuas ipan itlalkon ipan on sa ika nochi tonajli.

⁵⁵ Ijkon nochiuas pampa nonakayo yejua melauak tlakuajli, niman noyesyo yejua melauak tlaonijli.

⁵⁶ Yejuan kikua nonakayo niman koni noyesyo nemis san sekan nouan, niman nejua no ninemis san sekan iuan.

⁵⁷ NoTajtsin yejuan onechajtitlan kipiya nemilistli, niman nejua itechkopa ninemi. Niman no ijki tej, yejuan kikuas nonakayo, san nopampa nemis para nochipa.

⁵⁸ Nejua nipan yejuan oualeu iluikak. In pan xijki ken yejua on maná yejuan okuajkej nemoachtojtajuan niman omikkej. Yejuan kikuas in pan yejuan nikteneua, nemis para nochipa.

⁵⁹ Jesús okitemachtij in tlajtlamach* ipan on sinagoga* yejuan onkaj ne Capernaúm.

Itlajtol Jesús kitemaka nemilistli yejuan para nochipa

⁶⁰ Ijkuak miyekej inomachtijkauan* ijkon okakkej, okijtojkej: —Yejua in tlen tikijtoua sanoyej* ouijtikaj* para tikseliskej. ¿Akinon uelis kiselis in temachtijli?

⁶¹ Jesús okimat ipan iyojlo ika tlamach xkuajli kijtouayaj, niman ijkin okintlajtoltij: —¿Mechtlauelkuitia on yejuan onikijto?

⁶² ¿Tlinon nenkinemiliskiaj tla nennechitaskiaj nejua yejuan oninochiu Tlakatl nitlejkoua ne kampa achtoj ninemiya?

⁶³ Ialma sen tlakatl yejua kimaka nemilistli itlalnakayo. Itlalnakayo xitlaj* kijtosneki tla kipoloua ialma. On notlajtol yejuan yonemechijlij mechmaka nemilistli para nochipa ijkon ken ialma sen tlakatl kimaka nemilistli itlalnakayo.

⁶⁴ Pero nemotsajlan sanken* nemij sekimej yejuan xe tlaneltokaj. Jesús tej, ye kimatstikatka akinomej on yejuan xtlaneltokayaj, niman akinon on yejuan kitemaktilis.

⁶⁵ Niman okijtoj: —Yejua ika, yejua ika yonemechijlij xakaj uelis notech uajlas, tla noTajtsin xkitlalia ipan iyojlo para ma uajla.

⁶⁶ Desde ijkuakon opeu miyekej on yejuan kuikatinemiyaj onokuepkej, niman xok iuan okistinenkej.

⁶⁷ Yejua ika, Jesús okintlajtoltij on majtlaktli uan ome inomachtijkauan*: —¿Nemejuamej no nenkinekij nennechtlalkauiskej?

⁶⁸ Pero Simón Pedro okijlij: —NoTEKO, ¿akinon uelis tiaskej itech? San motlajtoltsin yejuan tikijtoua yejua kitemaka nemilistli yejuan para nochipa.

⁶⁹ Niman aman tejuamej yotikneltokakej niman ye tikmatstokej ika tejua tiCristo, tiiKoneu Dios yejuan nochipa nemi.

⁷⁰ Jesús okinmijlij: —Maski onemechtlapejpenij nemejuamej majtlaktli uan ome, nemotsajlan nemi se yejuan kitekipanoua on diablo*.

⁷¹ Ijkuak Jesús ijkon okijtoj, kitenejtikatka Judas Iscariote, ikoneu Simón, pampa Judas kitemaktiliskia maski yejua teuan tlapouajli intech on majtlaktli uan ome nomachtijkej*.