San Juan 3 - El Nuevo Testamento

Jesús otlajtlajtoj iuan Nicodemo

¹ Nemiya sen fariseo* itoka Nicodemo yejuan tlayekanketl katka intech on hebreos*.

² Nikodemo oyaj okinotsato Jesús ijkuak tlayoua, niman okijlij: —Temachtijketl, tikmatstokej ika Dios omitsajtitlan para otitechmachtiko, pampa xakaj ueli kiteititia ipoder ikan milagros* ken tejua tikchiua tla Dios xkipaleuiya.

³ Kemaj Jesús okijlij: —Ika tlen melauak nimitsijlia, tla yakaj xoksejpa tlakati, xuelis kalakis kampa Dios tlamandaroua.

⁴ Niman Nikodemo okitlajtoltij: —Pero ¿kenijki sen tlakatl yejuan yonoskaltij uelis oksejpa tlakatis? ¿Tla ijkon, uelis kalakis ijtik inanaj para oksejpa tlakatis?

⁵ Niman Jesús okijlij: —Ika tlen melauak nimitsijlia, tla yakaj tlakatl xnokuatekiya ikan atl niman xtlakati itechkopa on Espíritu Santo, xuelis kalakis ne kampa Dios tlamandaroua.

⁶ Ijkuak sen tlakatl tlakati itech inanaj, san kiselia nemilistli itlalnakayo, pero ijkuak tlakati itech on Espíritu Santo, kiselia nemilistli ipan ialma.

⁷ Maka mitstlatlachalti on ika nimitsijlia: “Ika onkaj oksejpa titlakatis.”

⁸ On ajakatl tlalpitsa san kanon kineki. Tikaki on tlen kakistilia, pero xtikmati kanon ualeua niman kanon yau. No ijki tej, on yejuan tlakatij ikan on Espíritu Santo.

⁹ Kemaj Nicodemo okitlajtoltij: —¿Kenijki uelis nochiuas yejua in?

¹⁰ Jesús okinankilij: —¿Tejua tiueyitemachtijketl ipan Israel niman xtikmati in tlajtlamach*?

¹¹ Ika tlen melauak nimitsijlia ika tejuamej titlajtlajtouaj ika on tlen tikmatij, niman ika on tlen yotikitakej tikteixpantiliaj, pero nemejuamej temachtijkej xnenkineltokaj tlen temechijliaj.

¹² Tla xnennechneltokaj ijkuak nemechnojnotsa ika on tlajtlamach* yejuan kisa ipan in tlaltikpaktli, ¿kenijki nennechneltokaskej tla nemechnojnotsas ika on tlajtlamach* yejuan kisa ne iluikak?

¹³ Xe yakaj tlejkoua iluikak, yej nejua yejuan oninochiu Tlakatl oniuajtemok de ne iluikak.

¹⁴ Niman ijkon ken Moisés okipiloj on kouatl ipan kojtli* ne kampa xalpatlajkan, ika onkaj no ijki nechajkopiloskej nejua yejuan oninochiu Tlakatl,

¹⁵ para nochi on yejuan nechneltokas xmikis, yej kipiyas nemilistli para nochipa.

¹⁶ ’Tej, Dios sanoyej* okintlajsojtlak* on tlaltikpaktlakamej, hasta okitemakak isenteKonetsin para nochi on akin kineltokas xpoliuis, yej kipiyas nemilistli para nochipa.

¹⁷ Dios xokuajtitlan iKonetsin intech on tlaltikpaktlakamej para kintlajtlakolmakas, yej para on kimakixtis on tlaltikpaktlakamej.

¹⁸ ’On yejuan kineltoka xkitlajtlakolmakaskej, pero yejuan xkineltoka ye kipiya tlajtlakolmakalistli san pampa xkineltoka isenteKonetsin Dios.

¹⁹ Yejuamej kiseliaj tlajtlakolmakalistli pampa ouajlaj on tlajuijli, yejuan iKonetsin Dios, ipan in tlaltikpaktli niman okintitij on kuajli ojtli para ipan nouikaskej, pero xkinekij nouikaskej ipan on kuajli ojtli, pampa yejuamej kichiuaj on tlen xkuajli.

²⁰ Nochimej yejuan kichiuaj on tlen xkuajli kitlauelitaj on tlauijli niman on kuajli ojtli yejuan okiteititij. Yejuamej xuajlauij itech pampa xkinekij nopantlantis intlajtlakol.

²¹ Pero on yejuan kichiuaj on tlen kuajli uajlauij itech on tlauijli para nopantlantis ika kichiuaj on tlen Dios kinnauatia.

Oksejpa Juan on tlakuatekijketl otlajtoj itechkopa Jesús

²² Ijkuak in yopanok, Jesús oyaj inuan inomachtijkauan* para Judea kampa keski tonajli ompa inuan onokau. Niman Jesús okinnauatij inomachtijkauan* ma tlakuatekikan.

²³ No ijki, Juan tlakuatekiaya ne Enón nisiu Salim pampa ompa onkatka miyek atl. On tlakamej uajlayaj itech niman yejua kinkuatekiaya.

²⁴ (Yejua in onochiu ijkuak Juan xe kajsiyaj.)

²⁵ Kemaj, sekimej inomachtijkauan* Juan opejkej nokamauijsokij inuan sekimej hebreos* de on kenijki sen tlakatl kichipauas itlalnakayo ixpan Dios.

²⁶ Yejua ika oyajkej niman okijlijtoj Juan: —Temachtijketl, on yejuan mouan nemiya ne ika ikisayan tonaltsintli de on río Jordán yejuan tejua itechkopa otitenojnots, aman tlakuatekiya niman nochi tlakatl uajlau itech.

²⁷ Kemaj Juan okinmijlij: —Xakaj uelis kipiyas itlaj tla Dios xkuajtitlanilia de ne iluikak.

²⁸ Nemejuamej kuajli onennechkakej ijkuak onemechijlij ika nejua xniCristo, yej se yejuan Dios okuajtitlan iyakapan.

²⁹ Ne kampa nonamiktilo, on novio yejua kiselia on novia. Niman itlajsojkaikniu* on novio no sanoyej paki ijkuak kaki tlajtlajtoua on novio. Nejua ken niitlajsojkaikniu on novio. Yejua ika tej, sanoyej nipaki ijkuak nikaki ika nochi tlakatl yau itech Jesús.

³⁰ Ijkon tej, ika onkaj yejua más ueyixtias niman nejua yej más nitemotias.

Ikoneu Dios ouajtemok de ne iluikak

³¹ ’On yejuan uajtemoua de ne iluikak más ueyixtikaj xken nochi tlakatl. On yejuan chanej* ipan in tlaltikpaktli san tlaltikpaktlakatl niman tlajtlajtoua ika on tlajtlamach* yejuan kistikaj ipan in tlaltikpaktli. Pero on yejuan ualeua ne iluikak más ueyixtikaj xken nochi tlakatl.

³² Yejua kiteixpantilia de on tlen yokitak niman yokak, pero xakaj kineltoka on tlen yejua kijtoua.

³³ Pero tla yakaj kineltoka on tlen kijtoua on yejuan ouajtemok ne iluikak, kijtosneki ika Dios kijtoua on tlen melauak.

³⁴ On yejuan Dios okuajtitlan kijtoua on itlajtol Dios, pampa Dios okimakak iEspíritu ikan nochi iueyilis.

³⁵ On Tajtli kitlajsojtla* iKonetsin, niman yokimaktilij nochi itekiuajyo ipan nochi tlen onkaj.

³⁶ Yejuan kineltoka iKonetsin Dios kipiya nemilistli para nochipa, pero on yejuan xkitlakamati xkipiyas in nemilistli, yej kiselis on temojtij icastigo Dios.