San Juan 21 - El Nuevo Testamento

Jesús okinnotitij chikomemej inomachtijkauan*

¹ Ijkuak ijkon yonochiu, Jesús oksejpa okinnotitij inomachtijkauan* ne itenko on mar itoka Tiberias. Ijkuakon ijkin okinnotitij.

² Simón Pedro, Tomás, on yejuan kuitiayaj kouatsin*, Natanael yejuan chanej Caná de Galilea, Santiago niman Juan, ikoneuan Zebedeo, niman okse omemej inomachtijkauan* Jesús san sekan nemiyaj.

³ Simón Pedro okinmijlij: —Nejua nonmichajsis. Yejuamej on oksekimej okijlijkej: —Tejuamej no mouan tiaskej. Yejua ika oyajkej niman otlejkokej ipan sen barco. Pero ipan nochi on tlayoua xitlaj* michin okajsikej.

⁴ Ijkuak ye uajtlanestiaya, Jesús nemiya itenko on mar, pero on nomachtijkej* xkimatiyaj ika yejua.

⁵ Kemaj okomintsajtsilij niman okintlatoltij: —Nokoneuan, ¿xitlaj* michin nenkajsij? Niman yejuamej okijlijkej: —Ka, xitlaj tikajsij.

⁶ Kemaj Jesús okinmijlij: —Xkonchapanikan nemomatlau iyekmakopa on barco niman nenkimajsiskej michimej. Ijki okichijkej niman kemaj xok ueliyaj kixtiayaj on inmatlau ne ijtik on atl pampa sanoyej* miyek michin ijtik uajlaya.

⁷ Kemaj on nomachtijketl yejuan Jesús sanoyej kitlajsojtlaya*, okijlij Pedro: —¡Tlakaj yejua toTEKO! Niman ijkuak Simón Pedro okak ika yejua inTEKO, nimantsin onotlakentij pampa onotlakenkixtijka. Kemaj, ijkuak yonotlakentij, onatlajkal.

⁸ Niman on nomachtijkej* xuejka nemiyaj itenko on mar, yej san kanaj cien metros. Yejua ika okuajuikakej on barco niman okuajteuilantiajkej on inmatlau yejuan tentiaya ikan michimej, niman oajsikej itenko on atl.

⁹ Ijkuak oajsikej ipan tlajli, okitakej ye onkaj tlixochtli, niman ipan onkatka michin niman pan.

¹⁰ Jesús okinmijlij: —Xkinuajuikakan sekimej on michimej yejuan kemach onenkinmajsikej.

¹¹ Simón Pedro otlejkok ipan on barco niman okitilantiaj on matlatl hasta atlatenko tentiaya ikan michimej uejueyimej. Okajsikej michin se ciento uan tlajko ipan yeyi. Niman maski sanoyej miyek katka, on matlatl xotsayan.

¹² Kemaj Jesús okinmijlij: —Xuajlakan, xtlakuakij. Niman nion semej de on nomachtijkej* xokinemilij kitlajtoltis akin yejua, pampa kimatstikatkaj ika yejua inTEKO.

¹³ Kemaj Jesús okinnisiuij, niman okontilan on pan niman okinmakak, niman sano ijki okichiu ikan on michin.

¹⁴ In yejua tej, ika yexpa okinnotitij Jesús on inomachtijkauan* ijkuak yoyoliu* niman yonoketsteu ipan itlalkon.

Jesús okiyolkuitij Simón Pedro

¹⁵ Ijkuak yotlakuajkej, Jesús okitlajtoltij Simón Pedro: —Simón, ikoneu Jonás, ¿más tinechtlajsojtla* xken yejuamej in? Pedro okinankijlij: —Kemaj. NoTEKO, tejua tikmati ika nimitstlajsojtla. Jesús okijlij: —Tla ijkon xkintlakualti noborreguitos.

¹⁶ Ika okpa oksejpa okitlajtoltij: —Simón, ikoneu Jonás, ¿tinechtlajsojtla? Pedro okijnankijlij: —Kemaj. NoTEKO, tejua tikmatstikaj ika nimitstlajsojtla. Yejua okijlij: —Tla ijkon xkincuidaro noborregos.

¹⁷ Ika yexpa okitlajtoltij: —Simón, ikoneu Jonás, ¿tinechtlajsojtla? Pedro onajman pampa ika yexpa okitlajtoltij tla kitlajsojtla, niman yejua okinankijlij: —NoTEKO, tejua nochi tikmati. Tejua tikmatstikaj ika nimitstlajsojtla. Jesús okijlij: —Tla ijkon xkintlakualti noborregos.

¹⁸ Ika tlen melauak nimitsijlia ika ijkuak más tikonetl katka, san tiuajmotlakentiaya niman tiaya kampaka tejua tiknekiya, pero ijkuak ye tiueuentsin yes, san tikinuajmelauas momauan niman okse mitstlakentis, niman mitsuikas kampa xtiknekis tias.

¹⁹ Ijkuak Jesús ijkon okijtoj, okimachistij kenijki mikis Pedro niman ijki kueyilis Dios. Kemaj okijlij: —¡Xuajla nouan!

²⁰ Kemaj Pedro ouajnokuep, niman okitak ika kikuitlapanuiya on nomachtijketl yejuan Jesús sanoyej kitlajsojtlaya. (On nomachtijketl katka yejuan nemiya inakastlan Jesús ijkuak otlakuajkej, niman ijkin okitlajtoltij: “NoTEKO, ¿akinonon yejuan mitstemakas?”)

²¹ Niman ijkuak Pedro okontak, ijkin okitlajtoltij Jesús: —NoTEKO, niman in uej, ¿tlinon ipan nochiuas?

²² Jesús okijlij: —Tla nejua nikneki para yejua ma nemi hasta ijkuak oksejpa niuajlas, on xejua motekiu. Tejua xuajla nouan.

²³ Yejua ika intech on nomachtijkej* opeu kiteneuaj ika on nomachtijketl xmikis. Pero Jesús xokijlij ika yejua xmikis, yej okijtoj: “Tla nejua nikneki para yejua nemis hasta ijkuak oksejpa niuajlas, on xtejua motekiu.”

²⁴ In yejua nomachtijketl yejuan kitemachistia nochi ken okitak in tlajtlamach*, niman okijkuiloj nochi in tlajtlamach* ipan in amamoxtli*. Niman tikmatij ika on tlen kijtoua, yejua tlen melauak.

²⁵ Niman no onkaj okseki miyek tlajtlamach* yejuan Jesús okichiu. Niman niknemilia ika tla nijkuiloskia cada se de nochi on tlajtlamach*, xonyaskia kanon kintlaliskiaj ipan in tlaltikpaktli nochi on amamoxtin. Ma ijki nochiua.