San Juan 20 - El Nuevo Testamento

Jesús oyoliu niman onokuiteu ipan itlalkon

¹ Saniman ipan on tonajli domingo ijkuak sanken* tlayouatok katka, María Magdalena oyaj itech on tlalkontli. Niman ijkuak oajsik, okitak ika xok ompa onkatka on tetl yejuan kitentsakutikatka on tlalkontli.

² Kemaj onotlaloj ne kampa nemiyaj Simón Pedro niman on nomachtijketl yejuan Jesús sanoyej* kitlajsojtlaya*, niman okinmijlij: —Yokejkuanijkej toTEKO ipan itlalkon niman xtikmatij kanon okauatoj.

³ Kemaj Pedro niman on okse nomachtijketl okiskej niman oyajkej itech on tlalkontli.

⁴ On omemej onotlajtlalojkej, pero on okse más sanoyej onotlaloj xken Pedro niman achtopa yejua oajsik itech on tlalkontli.

⁵ Onopachoj para ontlachix ijtik on tlalkontli niman san okitak ompa onkaj on telas istakkej, pero xokalakito.

⁶ Kemaj Simón Pedro oajsik ikuitlapan niman okalakito ijtik on tlalkontli. Yejua no okitak ompa onkaj on telas istakkej.

⁷ Niman no okitak on tela yejuan ika okuatejkuixkaj Jesús. On tela yejuan ika okuatejkuixkaj xsan sekan onkatka iuan on telas istakej, yej tepayolijtikatka niman oksekan onkatka.

⁸ Kemaj no okalakito on okse nomachtijketl yejuan achtopa oajsik. Ijkuak kuajli okitak tlinon yonochiu, okineltokak ika Jesús nemi.

⁹ Yejuamej tej, sanken* xe kajsikamatiyaj on Yektlajkuilojli yejuan kijtoua ika Jesús ika onkatka yoliuis* niman nokuiteuas ipan itlalkon.

¹⁰ Kemaj yejuamej on nomachtijkej* oyajkej para inchan.

Jesús okinotitij María Magdalena

¹¹ Pero María onokau ikiauak on tlalkontli niman chokaya. Chika chokatikatka onopachoj para ontlachix ijtik on tlakontli,

¹² niman okintak omemej ángeles ikan intlaken istak. Yejuamej yejyeuatikatkaj ne kampa onkatka on itlalnakayo Jesús. Se yeuatikatka kampa itsontlan niman okse ikxitlan ika.

¹³ Niman on ángeles okitlajtoltijkej: —Siuatl, ¿tline* tichoka? Yejua okinmijlij: —Pampa yokejkuanijkej noTEKO niman xnikmati kanon okauatoj.

¹⁴ Kemaj ijkuak ijkon okijtoj, onomalakachoj niman okitak Jesús ika ompa ijkatikatka, pero xkimatiya ika yejua Jesús.

¹⁵ Kemaj Jesús okitlajtoltij: —Siuatl, ¿tline tichokatikaj? ¿Akinon tiktejtemoua? Yejua kinemiliaya ika on akin okinots, on yejuan kijtlapiya on kojtlakijloj. Yejua ika okijlij: —Señor, tla tejua otikuikak, xnechijli kanon otikauato para nejua nikonanas.

¹⁶ Kemaj Jesús okijlij: —¡María! Yejua onomalakachojtikis, niman okijlij ikan tlajtojli hebreo: —¡Raboni! —yejuan kijtosneki “Temachtijketl”.

¹⁷ Jesús okijlij: —Maka xnechkiktsi pampa xe niau itech noTajtsin. Pero xuiya niman xkimijliti nokniuan ika yeniau itech noTajtsin niman nemoTajtsin, itech noDios niman nemoDios.

¹⁸ Kemaj María Magdalena oyaj okinmachistito on nomachtijkej* ika yejua yokitak inTEKO, niman ika yejua okijlij in tlajtlamach*.

Jesús okinnotitij inomachtijkauan*

¹⁹ Sano ipan on tonajli domingo ijkuak tlayoua, on nomachtijkej* onosentlalijkej ipan sen kajli. Kuajli okintsajtsakukej on tsakuijlomej* pampa kinmakajsiyaj on hebreos*. Pero maski kuajli tlatsajtsakutoya, Jesús okalak niman onotelketstajsik intlajkotian, niman ijkin okintlajpaloj: —Xyolsejtiakan nemejuamej.

²⁰ Ijkuak ijkon yokinmijlij, okintitij imauan, niman no ijtinakastlan. Niman on nomachtijkej* sanoyej opakkej ika okitakej inTEKO.

²¹ Kemaj Jesús oksejpa okinmijlij: —Xyolsejtiakan nemejuamej. Ijkon ken noTajtsin onechajtitlan, no ijki nemechtitlani.

²² Niman ijkuak ijkin yokijtoj, okinmilpits niman okinmijlij: —Xselikan on Espíritu Santo.

²³ Tla nemejuamej nenkintlapojpoluiliaj intlajtlakoluan on tlakamej, intlajtlakoluan popoliuis. Niman tla xnenkintlapojpoluiliaj intlajtlakoluan, intlajtlakoluan xpopoliuis.

Jesús okinotitij Tomás

²⁴ Pero Tomás yejuan teuan tlapouajli intech on majtlaktli uan ome nomachtijkej*, niman yejuan kuitiaj kouatsin*, xompa inuan nemiya ijkuak oualajka Jesús.

²⁵ Yejua ika on oksekimej nomachtijkej* okijlijkej: —Yotikitakej toTEKO. Pero Tomás okinmijlij: —Tla nejua xnikita imauan kampa okalak on clavos, niman xompa nikalaktia nomajpil, niman no xnikalaktia noma ipan ijtinakastlan, xnikneltokas ika nemi.

²⁶ Chikueyi tonajli más sakin*, on nomachtijkej* oksejpa onosentlalijkej ipan sen kajli, niman ijkuakon ompa inuan nemiya Tomás. Kemaj, maski tlatsajtsakutoya kuajli, Jesús okalak, onotelketstajsik intlajkotian niman okintlajpaloj, okinmijlij: —Xyolsejtiakan nemejuamej.

²⁷ Kemaj okijlij Tomás: —Nikan xkalakti momajpil ipan nomauan. Xkinta nomauan. Niman xkuajki moma niman xkalakti nikan nojtinakastlan. Maka sa xometlamatstia, yej xnechneltoka.

²⁸ Kemaj Tomás okijlij: —¡NoTEKO niman noDios!

²⁹ Jesús okijlij: —Tomás, tejua otitlaneltokak pampa otinechitak. Sanoyej tlatiochijtin on yejuan xonechitakej niman otlaneltokakej.

Juan okijkuiloj in amamoxtli* para kixmatiskej Jesús

³⁰ Jesús okichiu okseki miyek milagros* imixpan on inomachtijkauan* yejuan xtlajkuilolnestikaj ipan in amamoxtli*.

³¹ Pero yejua in tlen okijkuilojkej, okijkuilojkej para nemejuamej xneltokakan ika Jesús yejua Cristo iKonetsin Dios, niman para ijkuak nenkineltokaskej nenkipiyaskej nemilistli itechkopa JesuCristo.